非常有趣嘅招聘經驗，嗱！我真係會用「有趣」去形容，完全冇嬲，因為對我嚟講係不痛不癢，甚至冇製造出任何麻煩，我只係唔明白點解有人可以過咗三輪interview，再加個reference check，通通都過晒關，offer仲要高過佢本身填嘅expected salary，但最終都係選擇no show唔返工啫！
成件事要由兩個半月前講起，當時公司出招聘廣告請人，Senior Level唔係請緊散仔，其中幾份resume都唔錯，咁我就約啲candidate上嚟interview啦，其中一位candidate叫Nathan，佢算係好突出，作為HR嘅我真係睇好佢，結果第一輪面試毫無難度通過。
第二輪interview係要見兩個大粒佬高層，嗰次Nathan同佢哋傾咗兩個幾鐘，一半時間係面試，一半時間係傾計，咁投契，我都估到冇問題㗎喇，果然不出所料，秒過！大粒佬高層仲叫我嗱嗱聲約老細視像in埋最後一round，冇問題就即刻confirm offer叫Nathan返工。
其實公司唔係想見咁多round，亦唔係想將簡單事情複雜化，只係呢個職位要管太多人喇，其次係我哋個大老細係法國人，佢長期唔喺香港呢邊，請Junior當然唔會加意見啦，不過請Senior Level就通常會in埋一份，Anyway，我哋亦好快約實時間等雙方用zoom見面。
結果法國老細呢關都過埋，進入reference check程序，零難度，Nathan嘅舊公司好配合，隔日就send返個reference check過嚟。由於表現好理想，我哋公司開出嘅offer甚至好過Nathan本身個expected salary，同埋講就講三輪interview，但其實成件事都係兩個星期內搞掂，比起其他大公司嚟講算好快。
Ok！Nathan accepted offer，嗌咗佢返工，但係第一日就no show，我哋等到朝早10:30先至call佢。
「Hello Nathan？你去到邊呀？係咪返緊嚟？」
Nathan：「返嚟？哎呀！唔好意思，我記錯咗，星期一返工呀呵？我記錯咗1號返工，唔好意思！唔好意思！」
咁嘅情況……都冇計啦！職位高，加上係法國老細欽點（因為in完Nathan之後，法國老細直頭唔in其他人），唯有叫佢第二日準時返囉！
好喇去到第二日9:00，依然唔見Nathan出現，大約9:30左右收到佢電話。
「唔好意思，今日個胃好唔舒服，我想聽日先返呀，唔想第一日返工就咁病，仲隨時要早退。」
咁我可以講咩？唔通叫人哋病住頂硬上返新工咩？跟住我再同兩個大粒佬高層講，佢哋嘅面色已經變晒㗎喇，仲要瞞住法國佬，一來唔想大老細對Nathan有壞印象，二來Nathan都係兩位大粒佬當日力薦，你而家話唔要呢個candidate，咪間接承認自己眼光唔好？
第三日，Nathan繼續no show，今次連電話都冇，不過我覺得大家都係成年人，如果我再打電話去問長問短，而你又要再諗原因覆我點解冇返，其實就真係好冇癮，加上連我都覺得第一日唔記得，第二日病，第三日冇交代，呢個人已經好難再共事，所以嗰兩位高層亦覺得Nathan唔可靠。
講到呢度，相信你一定會諗－－－可能人哋有更好嘅offer，咁咪用住拖字訣先囉！冇錯，我都係咁諗，仲覺得打工仔咁做無可厚非，良禽擇木而棲，我都係打人哋工，點會唔明白呢個道理吖，不過Nathan嘅故事原來未完。
大約過咗三個禮拜左右啦，我收到Nathan嘅email，佢話自己撞咗車，不過已經出院，過埋個weekend就可以返工……
我唔識點覆佢，叫佢唔使返又好似冇頭冇尾不近人情，安慰佢又太假，因為我都覺得個藉口好假，而最好笑係因為當時仲未請到人，高層竟然話由得佢，如果Nathan真係嚟返工就照請……唔係啩！用人不疑，疑人不用喎！
點都好啦，我嘅顧慮係多餘，因為過完weekend，Nathan都係冇出現，冇電話亦冇再send email嚟，嗱！大門為你一次又一次打開，係你自己放棄咋！
出job ad再請人，好快已經搵到喇，一樣係三輪面試，法國老細一樣有參與，一樣有reference check，唯一唔同嘅係今次個candidate有返工，事情解決，然後……我哋收到Nathan嘅resume（因為請到人之後，個job ad仲未喺招聘網站remove），即係佢第二次send嚟，好似所有嘢重頭開始，當冇發生過一樣。
其實會唔會係佢當初真係take咗其他offer，不過做做下又冇返，想食回頭草呢？相信只有Nathan自己先至知道，我已經出咗email話我哋請到人喇，希望唔會無端端有一日見到Nathan返工啦！