想分享一單嘢，話說我早兩個禮拜要見工，因為遲咗出門，我屋企樓下又例牌冇乜的士兜入嚟，所以就call咗架Uber，其實我呢3個幾月interview都in到冇晒感覺，份份都冇下文，又唔知衰乜，自信心都跌到最低點，已經冇鬥志到一個地步係唔識緊張，因為心態上覺得見完都係嘥氣，最終都係「返去等通知」，然後不了了之。
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
唔知大家有冇試過搭的士或者Uber遇到司機撩你講嘢？嗰次我個Uber司機其實好安靜，只係開車途中佢忽然電話響，佢係用hands free聽，內容大約係咁：「而家？而家我做緊嘢喎，你搞掂啦……okok，咁你畀我同佢講兩句……Hello, 你係Jason？我姓張，你叫我Thomas得喇，唔好意思因為我揸緊車，簡單問你兩句，Have you ever worked in a multidisciplinary team？」
突然爆句英文，搞到望緊風景嘅我都專注聽佢講電話。
「唔唔……How familiar are you with the different operating systems？」
聲音語調同問題內容都似係HR，唔係咁癲做緊interview呀？
「Ok, Do you have the skills to keep our data safe？」
「What is a SQL injection attack, and how can it be prevented？」
講電話嘅過程其實大約15分鐘左右，後來見佢傾完，我就忍唔住問：「你係HR嚟㗎？啲問題好似咁專業嘅？請IT？」
呢位叫Thomas嘅司機大佬笑晒咁答我：「我唔係HR，我係間蚊型公司老闆啫，最近要請個IT人，但係HR唔識點問，個求職者又上咗office，佢咪打嚟叫我幫手隔住電話問幾句囉！」
一般嚟講，細公司未必會特登請個IT，因為外判出去比較抵，我估佢係謙虛啦！
我：「你又要打理公司，又要揸車，咁咪好忙好辛苦囉！」潛台詞其實係做老闆仲出嚟揸Uber？咁但係大家第一次見，佢未必會feel到我份幽默感，所以講嘢都係客氣同禮貌啲比較好。
「公司嘢我唔插手㗎，請咗咁多叻人返嚟，放手畀班後生做啦，係頭先請個IT人特別啲，我以前係IT出身吖嘛，HR又唔敢揸主意，講樣嘢畀你聽吖，我夢想嘅工作其實係揸車，只係出嚟社會之後冇機會做之嘛，後來有Uber就正喇，終於可以圓夢，得閒咪揸下囉！」
唔知點解，聽完佢咁講又突然間覺得有啲「水份」，係咪吹水唔抹嘴㗎？
我：「夢想係揸車？即係做一啲類似司機嘅工？」
「係呀，我意思就係咁，因為我老豆以前揸的士，成日車我周圍去，放假又揸住架的士同我去沙灘呀，去咩雍雅山房呀，全部都係童年回憶，我成日覺得佢每日載唔同嘅客好過癮，目的地又要人哋上車先知，好刺激，不過老豆話揸的士唔好，想我做白領喎！唉，讀咁多書去揸車又真係會激死佢嘅，後來我創業就更加冇可能啦，好在呢個世界又出現咗Uber呢樣嘢，咁我一得閒就做囉，又可以滿足自己，又可以當賺下錢食飯，幾開心呀！Office hour一得閒我又走落街接單喇！你呢，你冇一啲工係好想做㗎咩？」
我：「我冇你咁高層次，而家淨係想有份工請我。」
「哦，搵緊工呀？你成套西裝咁，而家就係去見工？趕唔趕呀？」
我：「唔趕，我預鬆咗，不過唔緊要啦，呢段時間見啲工全部等消息，陣間去見嗰份都冇乜信心。」
「咁你又唔可以咁喎，未打先認輸？其實見工冇你想像中咁難，人哋叫得你上去in，即係睇過你resume，基本條件一定附合佢要求，所以係差臨場表現同應對啫，你代入個interviewer嘅角色就得㗎喇，你唔好掛住諗自己想答乜嘢，你要諗如果你做in人嗰個，問完candidate一條問題之後，你會想聽到乜嘢，做人同見工一樣，識得易地而處去諗人同埋諗事情，咁你衰極就有個譜。」
司機講嘅嘢有啲道理，又有啲虛，始終理論同實戰係兩回事，但聽佢講完之後，我真係有思考。
「我而家同你好快咁模擬一次，你試下用英文自我介紹先，唔使驚，你當搵我練習。」
大癲！坐Uber坐到有人陪練interview，我見大家咁好傾，又真係用英文自我介紹一次，最正係司機仲一路畀意見幫我改善，之後又試咗幾條interview question，佢又教我點樣答比較好，臨落車佢仲要咁樣同我講：「你ok㗎！硬件冇問題，我都想請你呀，總之一陣唔好怯場就得㗎喇，記住我教你嘅嘢，interview使乜驚呀！放膽啲！見唔成工打嚟，我請你！你add咗我WhatsApp先！」
而我真係同佢交換咗WhatsApp，當然唔係為咗見唔成要佢請我啦，因為呢位Thomas真係好好人，好似阿爸教仔咁，再加上我後來見工搞掂咗，唔可以話同Thomas有直接關係，不過成程車有佢陪我練習，加上語言上嘅鼓勵，我的確喺interview嘅過程中增加咗自信，心理上點都幫到忙。
後來同個friend講起呢單嘢，朋友話Thomas應該係呃計傾，唔信做老闆會揸Uber，不過我又唔係咁睇，從談吐舉止同埋經驗分享可以見到，Thomas的確係有啲料，我有WhatsApp同佢報喜呀，佢答返我呢句：
「咁掂啦！你下次要車可以call我喎，費事畀Uber賺！」🤣咁都要拉生意，仲唔係老闆嘅特質？(完）