上星期公司搞咗個「部門最優秀員工選舉」，成件事都幾無謂，獎品係兩盒雙黃白蓮蓉月餅，邊個想要呀！屋企啲月餅都食到聖誕啦！
呢個「部門最優秀員工選舉」係用匿名投票方式進行，阿姐話唔想畀人覺得偏袒任何一位下屬，所以佢話自己會投棄權票，妖！整色整水，阿姐根本自己想贏，佢份人唔係為月餅，係為面子啫！
最憎人扮晒蟹，我就特登唔投阿姐，投咗畀部門裡面最勤力嗰位同事，可惜吖，最終點票結果出爐，阿姐都係以12：1大獲全勝。
成班擦鞋仔全部投畀阿姐，明白既，搵食艱難！點知阿姐好在意唔係全票當選，竟然走去串嗰位同事：「咁叻仔有1票呀？你係咪自己投畀自己呀？好似唔得㗎喎！」嘩！阿姐你都大比數勝出啦，使唔使咁講嘢呀？搞到嗰位得到1票嘅同事尷尬苦笑。
放工嗰陣呢位同事問我：「你覺得係邊個投我1票吖嗱？」
正當我想衝出嚟認嘅時候，個同事又補多句：「真係想知邊條契弟咁大整蠱，明知阿姐小器㗎啦！投畀我即係跣9我啫！」
好在頭先趕唔切認咋！
希望佢唔會估到我就係嗰條契弟，我出發點唔係想害佢㗎～～～