全team人嘅resume都收齊晒，場面何其壯觀！都好嘅，畢竟我新嚟，完全唔了解班下屬嘅background，因為佢哋冇一個係經我手去請，加上HR又走咗去放大假，咁咪順便逐個逐個慢慢睇囉！
我發現Joyce、Sharon、Michelle、Elaine、Joseph，同埋遞咗信嘅Sun都有一個共通點，就係搵緊工🤣🤣🤣講笑啫，佢哋嘅共通點係年資有返咁上下，但係人工就偏低，始終我喺呢行做咗一段時間，之前喺舊公司都有下屬，對比完真係發覺佢哋份糧係同市價脫軌。
諗佢哋做咩想集體跳槽嘅同時，我都諗緊自己係咪上錯賊船，咁多年都係呢個價？呢間公司唔加人工㗎？不過我自己做呢個Project Manager份糧又唔錯㗎喎，起碼高過之前份工15%，否則我都唔會轉過嚟啦，照計公司肯畀呢份糧請我，又冇理由對其他人咁刻薄吖！
Headhunt：「點呀？嗰幾份resume係咪好好呢？你想見邊個吖？成班都可以約畀你見㗎！不過最好分開唔同日子啦，因為嗰幾隻fit馬係同公司，一齊請假好容易被發現，你明㗎啦！」
個headhunt不斷催促我揀人，仲懶醒咁提議分開約Joyce、Sharon、Michelle、Elaine、Joseph，同埋阿Sun，話費事人哋公司發現喎……有你咁嘅headhunt，想唔畀人發現都難啦，好在HR放大假咋，你差啲累死人呀！
我特登揀咗另一位candidate上嚟interview，個headhunt覺得好奇怪，點解我唔係揀Joyce佢哋其中一個，但我已經懶得同佢作藉口，叫你約就約啦！同埋當時距離阿Sun嘅last day已經愈嚟愈近，人就點都要請㗎喇，見咗先算。
Candidate上嚟interview嗰日，我班下屬個個牛咁眼望住，眼神充滿敵意，又要問多句「到底發生過甚麼事」？你哋係憎我呢個新上司吖，憎人哋嚟見工吖，定係有反社會人格呢？點解好似唔多友善咁嘅？
見完呢個candidate之後，我都未決定請唔請，已經有第二個同事遞辭職信喇……
Joseph：「唔好意思呀，我想resign，呢封係我嘅辭職信，另外我仲send咗email畀你同埋人事部。」
相比之前阿Sun辭職繞過我直接遞去人事部，其實Joseph嘅做法已經正統好多，不過諗諗下又可能係因為 個HR放緊大假，佢唔想耽誤咗辭職嘅日期同流程先至遞畀我。
我：「點解呀？做得唔開心？有咩問題可以搵我傾喎！你搵到新工未呀？如果未不如留多陣啦，因為我搵人都需要時間，阿Sun又走你又走，我啱啱嚟冇幾耐，冇咗你哋真心會搞唔掂。」
Joseph：「我啱啱搵到新工喇，所以唔可以留多陣，唔好意思呀！」
Joseph用詞雖然客氣，但你完全feel到係冇計傾，你哋明唔明白嗰種感覺？既然Joseph嘅態度係婉轉地排斥，又講到自己搵到工要準時離職，咁我亦都唔強人所難喇。
不過問題仲未完，喺HR放完假返嚟之後，我仲得悉Joyce同Elaine都先後遞咗信，嗱！HR一返嚟就全部繞過我resign，呢下真係覺得有啲難受，你可以唔尊重我，不過都畀我了解下發生咗咩事吖，我連阿Sun個replacement都未搵到，一嚟又連走3個？Total咪要請返4個人？
先後叫咗Joyce同Elaine入房傾，一樣傾唔到啲咩，佢哋態度好好㗎，不過就係過份客氣擺明想保持距離嗰隻，其實都明嘅，我自己都辭過職，嗌得走就唔會返轉頭，有得傾亦唔會打呢封信同埋行到呢步，所以resign嘅同事向你講真話係人情，唔同你講都有佢嘅道理。
唔理咁多，火速請返晒啲人先，見咗幾個都ok嘅，但始終唔及而家呢班下屬，結果我做咗一個決定，就係請返4個junior少少嘅返嚟，再內部提升一個做Assistant Project Manager，我一個人管唔掂咁多新人吖嘛！
直接同老細講呢個諗法，再提議升Sharon做Assistant Manager，因為我都冇得揀啦，條team 6個人走咗4個，唯有喺Sharon同Michelle之間作出選擇，而Sharon又畀Michelle資深，我唔熟悉佢哋之前係點做嘢，只可以用年資做住指標先。
我都冇待薄Michelle，雖然佢title不變，但我同時提議加Michelle人工，大佬呀，人哋做咗咁多年，你仲出緊呢份糧好唔好意思呀？坦白講，我請個新人返嚟嘅人工同Michelle唔係差好遠㗎咋，點計都唔啱數啦，然後老細竟然覺得我嘅決定好奇怪。
老細：「升Sharon做Assistant Manager？聽講佢做嘢甩甩漏漏㗎喎！我有啲保留。」
我：「Sharon甩漏？唔係喎，佢跟得啲嘢好貼，好多時仲自動波，我連交代都唔使，其實我覺得Joyce係最好，可惜佢已經resign，所以我喺Sharon同Michelle之間揀，Michelle都唔差㗎，做咗4年，加返啲人工畀佢啦，呢排又多同事走，我希望可以留住Sharon同Michelle。」
老細：「可能你嚟嘅日子仲短，以前阿Paul對佢哋嘅評價係一般，阿Paul即係上一手個Project Manager，幾年前我都嗌佢升一個做Assistant幫輕下，佢話呢班人冇個得。」
經老細咁樣講完，我都有啲懷疑自己嘅決定，會唔會係蜀中無大將，自己又想留低Sharon同Michelle先至會急於做上述決定呢？但我真係覺得Sharon同Michelle冇問題喎，做嘢從來唔使我操心，結果我一意孤行，都好多謝老細接受我嘅意見。
因為要親自派升職加薪信畀Sharon同Michelle，所以我分別搵咗佢哋入房，睇到個人工升幅，Michelle瞪大咗對眼，佢係一個喜怒哀樂都擺上面嘅人，之前有人嚟見工，佢嗰種敵視嘅態度亦係一眼睇得出，今次驚喜嘅表情同樣遮唔住。
我：「滿唔滿意？都加咗你20%㗎！」本身想加佢25%，不過老細話有保留，又話之前個Project Manager講到佢哋好差，所以我就稍稍退一步，加20%啦！
Michelle：「滿意呀，不過點解嘅？」
我：「做到嘢就要加人工㗎啦，冇咩點解。」你份糧咁低，其實加咗都係追近市價咋！呢句我冇講出口。
Michelle：「唔係呀，我意思係公司年年都講冇budget，呢一兩年唔係生意仲差咩？」
我：「邊個話公司冇budget？」當HR話啲budget多到要夾硬用headhunt請人嘅時候，你同我講公司冇budget？
Michelle：「之前個Manager講㗎，佢話幫我哋爭取咗好多次，老細都係唔批，每年最多加$500，所以我估唔到今次加咁多。」
我：「之前個Manager即係阿Paul？」
Michelle：「係呀，你識佢㗎，你哋應該未見過，因為佢走咗兩個月你先至嚟。」
我未見過阿Paul，亦都唔識阿Paul，不過我收返嚟嘅訊息唔係公司冇budget，而係呢個前上司阿Paul話班人做嘢唔掂，唔值得加咁多人工，似乎同Michelle描述嘅情況有出入。
後來叫Sharon入房通知佢升做Assistant Manager兼加人工，我就更加清楚發生過咩事，因為簡單祝賀Sharon升職，勉勵佢畀心機之後，Sharon又係一副難以置信嘅表情，仲問返我轉頭：「公司唔係唔會開Assistant Manager個位咩？」
我：「係咪之前個Manager阿Paul同你講？」
Sharon：「佢唔係同我講，係同另一位同事講過。」
我：「等我估下先，阿Paul同阿Sun講？」
Sharon：「你點知㗎？」
我：「估咋，因為佢第一個辭職。」
Sharon：「個個都想辭職，呢度人工加得雞碎咁多，又冇晉升前景，所以我唔係好相信會升我做Assistant Manager，不過……多謝，你應該同老細花咗好多唇舌先至爭取到，之前阿Paul話傾到反晒枱都冇用，可能老細見到個個都走先開始驚，本來我都想走㗎！」
因為升咗職又加咗人工，Sharon對我放下咗戒心，言詞間亦feel到佢有份感激之情，但係愈聽得多就覺得人心愈恐怖，老細基本上冇阻撓我加下屬人工同埋加一個Assistant Manager嘅位，一直以嚟只係嗰個阿Paul撳住佢哋唔畀上。
呢種上司我都遇過，假意同你爭取，其實乜都冇做，你嘅功勞就搶晒，仲要周圍展示自己特別叻，甚至會叫老細唔使特別加薪或者加咁多，以為「幫公司慳錢」可以強化自己忠誠嘅形象，呢種職場小人個腦真係裝屎。
後來聽返Sharon同Michelle講，阿Paul成日讚佢哋做到嘢，可惜老細孤寒又唔愛才，坦白講，其實老細唔算孤寒啦，因為我份糧都唔少，根本阿Paul做嘅嘢就係肥上瘦下。
我冇特別同Sharon佢哋講返個真相，冇講阿Paul喺老細面前點樣彈佢哋，因為我冇需要做醜人，更加冇需要幫老細挽回啲咩聲譽，我亦唔知道其他幾個同事咁早就辭職有冇後悔，呢啲已經唔重要喇，一個Sharon一個Michelle帶住幾個新人都唔錯吖！
覺得員工或者下屬做到嘢，不如開少啲空頭支票，講多啲冇實際用途嘅讚美句子，用加薪說話，勝過千言萬語，但係阿Paul撳住班下屬唔畀佢哋上位，當中包含好多原因嘅，一來唔畀其他人功高蓋主，二來頭先都講咗，就係令老細覺得佢處處為公司著想同慳錢，三來係自肥，budget係咁多，用喺下面少咗，留畀上面就多咗，通常啲廢柴上司都有呢幾樣特質。
希望Sharon同Michelle，仲有其他新同事都做得開開心心，請人好Q煩㗎，請完又要教，教完仲要等佢熟習，不如快快脆脆，順順利利，夠鐘收工，咁唔係仲好咩，玩埋啲雙面人手段就最乞人憎，大家都係出嚟打份工啫，唔使咁多陰濕嘢同埋將工作搞到咁複雜嘅！
By the way，嗰條headhunt最後差啲搞到一鑊泡，原來佢同HR講，之前搵咗幾隻fit馬嘅resume，點知我通通都唔揀，要晒啲junior嘅人，跟住HR就覺得奇怪，叫個headhunt send多次過嚟。（ 最初HR放假，headhunt淨係send咗嗰批resume畀我。）
HR：「喂，你班下屬個個叫headhunt搵工跳槽，你唔講返畀我聽？一睇啲resume就知係佢哋啦！」
我：「咁又點啫？Headhunt日日都四圍撬人㗎啦，我個LinkedIn隔日就有人問我轉唔轉工，你冇咩？」
HR：「我都有，你有冇同老細講？」
我：「講咗咪盞尷尬，何必呢？反而你唔好再用呢個headhunt喇，連我哋分公司都搞唔清楚，啲resume亂咁send，害死人㗎，下次搵過第二間agency啦！」
呢個headhunt真係冇做過一件好事，點都好啦，就算HR最後爆響口，我都保得住Sharon同Michelle嘅，以前到底發生過甚麼事唔重要，向前看仲好啦！