我唔止破例見一個冇約到interview嘅求職者，隨後更即時引薦畀Line Manager進行second in，而其實當中嘅過程並唔算順利，Line Manager聽完之後係咁講：「即係咩？飛來蜢呀？點可以咁㗎？個個都衝上嚟話見就見，你唔覺得個女仔有問題㗎咩？」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我：「佢無情情走上嚟見工係奇怪啲，我開頭都好愕然㗎，咁反正都嚟到啦，咪見一見囉，而家又唔係個個衝上嚟office嘅，以前都冇試過，同埋佢真人ok呀，resume睇唔出，你咪抽少少時間in下囉，10分鐘又好，15分鐘又好啦！呢個女仔都幾有誠意㗎！」
最後Line Manager畀我說服到，不過真係見完15分鐘就出返嚟，合作咗一段日子，其實佢唔使講嘢我都已經知唔會揀。
Line Manager：「如果要揀我都係揀第一個男仔，聽日係咪仲有3個上嚟？」
咁始終係佢個department要請人，我呢個HR只係輔助，所以我幫Yvonne已經幫到盡。講表現呢，Yvonne臨場係好過嗰位男仔，但就算唔計Line Manager先入為主，Yvonne最後都會落選，因為第二日嗰3位求職者更加標青，所以就算順序排落去，Yvonne頂盡都係喺咁多個裡面排第4，唔緊要啦，有時interview都係一次經驗嘅獲取。
最終Line Manager叫咗個佢滿意嘅求職者返工，由於對方要一個月通知，所以就要等，點知隔咗一個星期，竟然有個新人走嚟話可以「試工」，冇錯，就係嗰位Yvonne……
同見工嗰次一樣，Yvonne都係冇預警嘅情況下走上嚟公司，我係呢度員工都9:05先返到，一推門就見到Yvonne坐喺度，reception姐姐話佢8:45到咗（我哋個receptionist係返8:30），但我唔理你7:45定係8:45到吖，都冇人叫你返工，搞咩呀？
Yvonne：「我見你哋仲未有通知，我想自薦嚟試工呀！唔收錢㗎！或者你哋試下我嘅工作能力再決定吖！我冇問題㗎！」
我：「而家唔係你有冇問題呀，係我哋冇試工呢樣嘢㗎！」呢次我唔係太高興，我覺得Yvonne嘅招式就係一味夾硬嚟！
Yvonne：「不如你幫我問一問上次個Manager吖，我真係好有誠意㗎！」
估唔到連食開花生嘅receptionist都插嘴：「不如你返去先仲好啦，上次已經畀你喺冇約到嘅情況下見咗工……」
呢啲嘢都係留返畀我講會恰當啲：「因為你見嗰個position嘅同事都未走㗎，你肯返工都冇位畀你坐，同埋你未係我哋公司員工，好多嘢唔方便畀你做㗎，我哋都有好多內部同埋客戶嘅資料，希望你明白啦，我哋唔會有試工呢樣嘢。」
呢個時候嗰位Line Manager咁啱返到，佢當然認得Yvonne，所以就問咩事，我亦簡單講咗Yvonne話唔收錢試工嘅要求。
Line Manager非常平淡咁講：「哦，唔使啦，我哋請咗人㗎喇，個新人未返之嘛，所以你試工都冇用，下次啦，如果我哋再需要人，你再send resume嚟，得閒留意下我哋公司嘅招聘資訊囉！」
Yvonne：「或者你試完我之後會再有決定呢！我冇位坐都得㗎，可以幫你送下嘢收下嘢。」
Line Manager：「真係唔使，唔好夾硬嚟喇妹妹，你返去先啦！」
當時我望住Yvonne，感覺有啲複雜，我覺得佢好堅持，又覺得佢好可憐，同時又覺得佢有啲乞人憎，我唔想咁樣諗人，又忍唔住有呢個諗法，後來Line Manager嘅一席話反而點醒咗我。
Line Manager：「你唔覺得呢個女仔好自私咩？佢表面上好積極爭取，但係我都話咗已經揀定人選，佢仲要死纏爛打落去，咁即係想我哋放棄原本請咗嘅人，即係你搵食就得，打爛人哋飯碗就冇所謂，換轉係你吖，你去interview然後畀人請咗，然後你同公司辭職，轉頭新公司又話唔要你，搞到你新工舊工都冇晒，咁你有咩感覺？」
由於呢件事有receptionist嘅「傳播」，加埋我同Line Manager都分別有同其他同事分享，所以公司好多人都知道咗，大部分嘅聲音都係覺得我做錯決定，根本一開始就唔應該容許一個冇約到嘅人嚟interview，因為大家都覺得Yvonne呢個女仔真係夾硬嚟。
我唔係想為自己辯護，只係第一次見Yvonne時心軟，全因對方表現得好有誠意，年中幾多人約咗interview都no show，而呢個女仔冇約到都衝上嚟搏一搏，真係好有決心同毅力。
故事仲未講完，係因為件事未完，「夾硬試工」事件過咗幾日，Yvonne又走上嚟，呢次係夜晚7點幾，我當晚已經收咗工，係第二日另一位同事話返我知：「喂，噚晚有個女仔差唔多8點撳公司個門鐘，嚇死我，佢問呢度仲有冇其他空缺，我頂你個肺吖！我以為撞鬼呀！嗰陣得我一個人咋！後來佢話上過嚟interview見過你，我就諗起大家呢幾日講嗰個女仔，夾硬見工夾硬試工嗰個吖嘛！」
我：「唔係咁癲呀？」
同事：「你有佢電話㗎嘛，你打畀佢講聲吖，嚇死人㗎咁樣！你叫佢唔好再無啦啦夜晚上嚟呀！」
因為我唔係第一身見到Yvonne 7點幾8點上嚟，所以我冇驚，反而係嬲，即刻打去叫佢唔好再咁樣做，但Yvonne話自己冇夜晚上嚟，咁我又冇理由係都要迫佢認吖，係唔係都好，我表達咗就算，更加冇理由要睇CCTV求證，又唔係失竊，睇CCTV要驚動好多人包括老細㗎！
雖然呢位同事之前冇正面見過Yvonne，resume又冇相可以認，但佢一口咬定係Yvonne，仲話冇理由咁巧合：「佢唔認啫，呢個女仔啲嘢我聽過啦，一定係佢！」
唔知公司班友係玩嘢定係點，之後有兩三個同事都話OT走嘅時候見到走廊盡頭有黑影，所以而家就多咗個傳說係呢層有鬼……
Yvonne就夾硬嚟，鬼就恐怖兼誇張，我都唔知點樣消化呢件事，或者搵次我OT睇下見唔見到黑影囉……講笑啫，人又好鬼又好飛來蜢又好，搭正6點即走啦！(完）
《飛來蜢》上集 求職者不請自來
https://hkofficedaily.com/?p=24665