女同事上個月向我辭職，我問點解，佢答：「我準備分手。」
我當時仲寸佢九唔搭八：「問你食乜就答凍奶茶，飲乜就答乾炒牛河。」
「唔係呀！我真係準備分手呀！條仔癲㗎！佢一定會騷擾我。」
呢位女同事向我透露，佢已經有另一個新嘅電話號碼，亦搵埋新屋，部署緊之後同條仔分手就即刻停用而家個number，好在佢喺香港係一個人住，爸爸媽媽喺英國，條仔唔知佢兩老任何聯繫方式，辭工係因為公司地址曝咗光，條仔有佢卡片，亦接過佢收工。
我唔懷疑呢個世界有恐怖情人，只係覺得佢辭工搬屋改電話號碼太誇張喇，點都好啦，同事要走，始終係佢嘅選擇。
女同事正式離職之後，公司上星期開始收到電話騷擾，嗰個恐怖情人唔信自己女朋友走咗，話我哋「包庇」佢喎……包庇呢個詞語唔係咁用喎先生，係咪想講我哋收埋佢呀？
恐怖情人唔係浪得虛名，佢甚至踩上嚟office搵人，MK look，十足十去尋仇咁，唔怪得女同事驚到要轉工啦！
電郵都有，因為女同事走咗，email暫時forward去我度，裡面啲內容好得人驚，最癲係話要公開親密照。我想轉告畀女同事知，勸佢考慮報警，不過我已經冇佢新電話號碼喇！
其實男男女女都好，拍拖睇清楚先，未認定對方前要有少少保留，否則遇著呢種恐怖情人，真係會永無寧日。