一切從個「屌」字開始……做做下嘢，新同事突然屌咗一聲：「屌！唔小心delete咗個file添！」大家都忙緊，根本冇人得閒理佢，得另一位女同事答：「咁你咪去垃圾筒撳個掣還原囉！唔使大驚小怪，咪再手殘喺垃圾筒撳清空就得啦，有幾大件事呀？咁都要教？」
新同事照做，但冇幾耐又有問題：「呢個係咪你嚟㗎？Silvia吖嘛！有相有名，個file你仲要唔要？頭先我一次過還原垃圾筒啲嘢，如果你唔要我就delete返！」Silvia完全唔知佢講乜，順勢就坐住張電腦凳碌埋去，然後好驚訝點解會有一份自己嘅檔案喺新同事部腦入面。
呢份word文件有Silvia大頭相，係來自佢WhatsApp個profile pic，但係拉落去仲有幾張，原來係取材於Silvia個人嘅social media，例如FB同IG，有一樣嘢更加唔知好嬲定好笑，Silvia個名喺個word file係括住咗～～～「熟女系」。
當時有幾個同事圍埋去，包括我，個別仲識笑，後來就笑唔出喇，因為我哋發現呢份喺電腦垃圾筒被還原嘅folder裡面，唔止有Silvia嘅word file，公司仲有好多女同事被「開file」，而且全部都係括住咗「乜乜系」，隔籬部門有幾個女同事分別被標註為「妹系」、「痴女系」、「貧乳系」、「細身系」、「地雷系」……
訊息量好大，大家梗係好奇啦！特別係女同事，又驚又想知道咩事，男同事就更加唔使講，一個二個湊熱鬧，有啲女同事個word file係冇相，不過有真名，而呢個被還原嘅folder裡面，仲有好多text file，而且全部係……咸故！
《女上司以權謀私，我每晚都要做佢性奴》，睇到呢個text file名，我哋個女上司即刻叫新同事click開，睇咗幾句已經見到Rebecca個名，係呀，女上司真係叫Rebecca！
故事大綱係第一身嘅男主角做錯嘢，以為要接大信封炒魷，點知女上司夜晚call佢出嚟飲嘢，仲提出只要聽聽話話就可以保住份工嘅offer，跟住就係一篇又一篇嘅咸故，內容重SM成份，女上司係S，男主角做M。
我冇質疑Rebecca有冇當男下屬係性奴，因為小妹我都有出現喺云云嘅text file裡面，我更加被標註為「ぽっちゃり系」，我唔識日文，即刻問有冇人知點解，結果得一個識日文嘅男同事答我：「你唔好知喇，睇算啦，都係一個稱呼啫！」
喺文字檔案嘅創作咸故當中，我係不斷色誘男同事，發生關係嘅地點包括洗手間、後樓梯、夜晚同事走晒之後嘅office，場景全部圍繞呢間公司，乜咁睇得起我呀？
後來我唔甘心，一定要知道咩係ぽっちゃり，結果google translate係咁樣翻譯：「胖乎乎的」，睇完之後真係好嬲。
嬲嘅當然唔止我一個，因為幾乎所有女同事都做咗咸故女主角，連一個放緊產假嘅媽媽級女同事都有份，file裡面括住「妊婦」，好在當事人唔喺公司，我真心驚佢會激到產後抑鬱。
其實呢啲嘢係邊個做已經呼之欲出，檔案裡面有啲同事已經離咗職，所以唔會係發現folder嘅新人做，好明顯係上一手姓馬嗰個奇怪男人，以前已經覺得佢眼神好怪，當然今時今日再講係有啲馬後炮，但呢位馬生係好少同我哋交流，除咗公事之外，佢係連lunch都唔會同大家一齊食，前前後後做咗唔夠一年半，連英文名都冇，我哋平時係叫佢馬生或者阿馬。
有個同事話之前睇《愛回家》都有一集係咁上下劇情，內容講個男同事幻想其他女同事色誘佢，寫咸故post上去討論區，我自己冇睇過，但覺得有冇公開都好，今次係嚴重得多，啲file全部指名道姓，又有同事真名同埋照片。
女上司Rebecca最嬲，佢即刻開speaker打畀呢位已經走咗，姓馬嘅舊男同事，Rebecca一開聲就鬧：「你用女同事相開file寫埋啲咩呀？你變態㗎？我一定報警……」然後我哋從speaker都聽到對面好快cut咗線，再打幾次過去已經唔再聽。
件事都去到老細嗰度喇，有同事話冇實質做過啲乜，所以好難告，亦有一個同佢有兩句嘅同事講，呢位姓馬嘅舊人透露過辭職後去英國，雖然唔知真定假，但如果真係離開咗香港就似乎更難追究，所以大家雖然覺得嘔心，不過都企晒喺度唔知點做。
大部分人都覺得佢係delete完啲嘢唔記得去垃圾筒清空，有個IT同事就分析，可能係佢有心畀大家發現呢啲咸濕故仔，因為變態嘅人唔可以用正常思維去諗，當事人做咗咸故主角，睇到之後有咁大反應，或者正中佢嘅下懷，我都唔知講咩好，總之核突啦！唯有得著係學識一個日文，ぽっちゃり＝胖乎乎的。