去見工嘅時候，HR有機會問你之前工作嘅離職原因，如果對方有心請你，就算你之前同舊僱主鬧反一樣會請，同樣地，若然對方係雞蛋裡挑骨頭，咁就算有幾合理嘅reason都好，佢一樣會針對你，而喺云云嘅離職原因當中，我相信被舊公司拖糧已經係無可爭議喇啩，點知……
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
HR：「你上一份工做咗唔夠1年就辭職，但係resume冇講原因，介唔介意話我知呀？」
我：「因為我舊公司每個月都拖糧，合約白紙黑字寫咗係1號出糧，但係佢哋最早都5號，有時7號，10號之後都試過兩三次，你都話我只係做咗1年唔夠，但呢種情況係持續發生，咁我真係冇信心再喺呢間公司做落去。」
HR：「點解呀？」
我：「點解？」
佢問緊咩？拖糧喎！都話contract有寫，5號7號係例牌，10號打後都兩三次喎，佢問點解係指間公司點解拖糧？
HR：「係呀，點解會冇信心做落去嘅？」
呢條真係問題？我真係咁樣都要答？
我：「如果間公司咁樣拖法，即係慣晒，通常最後都有機會爛尾，我唔想有一日要去勞工處或者啲咩小額錢債處。」
HR：「咁……你可能唔太適合我哋公司。」
唔係啩！斷估你唔會當我bad mouth舊僱主呀？呢個reason都唔夠力支持我轉工？難道打工就要愚忠，被拖糧都要默默承受？
我：「點解唔適合呢？我講真話咋喎！」
HR：「唔係唔係，你誤會喇，其實係咁嘅，我哋公司都會拖糧……我都係唔想你入嚟之後又因為同一個原因走，呢度同你之前係有啲相似。」
我不能理解，因為HR嘅對答並唔係我意料之內，而且大家都分別講得咁白，呢次interview亦相信會係咁先，但我強調自己當時語氣並唔係差，亦唔係質問，只係平常心問返個HR：「咁你又叫我上嚟見工？」
HR：「我約你上嚟嗰陣，唔知你係因為前公司拖糧先轉工，坦白講我哋老細係一定會出糧，但有時真係會遲，試過遲成20日，雖然咁樣係抵觸僱傭條例，不過呢度嘅同事都習慣咗，大家都明白點樣遲都好，嗰個月點都會出到。」
我：「你哋個個月都遲？咁都ok？雖然最後都有出，但如果你有數要找，遲咗都要罰息啦，唔通問公司拎返啲息咩？」
HR：「又唔會咁惡劣嘅，始終正常都有積蓄可以應付，不過我唔係話拖糧冇問題，絕對唔係呢個意思，同埋我哋唔係每個月都咁樣，可能一年有5至6次囉！」
咩料呀？一年先得12個月，5至6次咪即係一半囉！咁唔通叫正常呀？可能見到我冇嘢講，個HR又喺度補充。
HR：「你呢個position係因為上一手同事辭職去進修，唔關遲出糧事㗎！」
我：「明白，不過都真係唔適合，好多謝你同我講實情，起碼大家都清楚條底線，無謂做落先有啲咩唔開心嘅嘢。」
由會議室行返出去嘅時候，我目測呢度大約有廿幾個員工，其實我舊公司都係得20人，size好接近，但無論大企業又好，細公司又好，都唔應該遲出糧，呢樣係好基本。
初時估我因為被拖糧而離職，個HR聽完唔賣帳，仲想留難我，但原來唔係，雖然嚟見呢份工的確浪費咗車錢同時間，不過我心裡面都感激呢位HR咁誠實，一陣推咗其他offer走嚟做，發現又行返條舊路，到時肯定更加沮喪。
好心啲老闆唔好咁啦，經濟環境差係一回事，準時出糧係本份嚟㗎！我身邊都有朋友曾經被長期拖糧，甚至連MPF都可以過期冇交，最後公司突然結業，臨尾嗰期糧就即刻爛晒尾，因為間公司咁樣拖法，某程度上已經反映咗財政好有問題。
冇錯，雖然講咩勞工法例係有得追討，不過你要個打工仔來來回回去投訴就夠晒麻煩啦，唔使搵食咩！上嗰啲政府部門好嘥精神同時間㗎！我嗰位朋友最終都追唔足最尾份糧，個老細仲不知所終，打份工搞到咁幾無謂呢！（完）
情迷下屬親大佬 女上司隨時變阿嫂
https://youtu.be/nWfN74b93a0