剛剛有個新同事返工，正當阿頭向新人講解緊工作流程嘅時候，阿John走埋嚟加把嘴：「呢間公司啲系統好容易㗎咋！最緊要你個檔案號碼入得啱，咁sort返出嚟咪輕鬆囉！跟住有三版嘅，你再撳個next……」阿頭一路講解，阿John又不斷講，兩個人嘅說話交疊埋一齊，搞到個新人都唔知聽邊個好。
阿頭份人不嬲大體，佢先向阿John微笑，但阿John又對返佢笑，仍然繼續「教路」，唔好話新人啦，我呢個做咗兩年嘅「舊人」都聽到好迷糊好混亂，結果阿頭一路講一路向阿John做個OK手勢，可惜阿John都係未停口，最後阿頭用眼神向我求救，得！識做！我即刻搵個話題同阿John吹水，等阿頭可以專心教新人。
阿John已經70歲，三年前被公司叫退休，不過我係兩年前入嚟做，當時同呢位新仔一樣，唔知頭唔知路，只係發覺公司呢位叫阿John嘅老員工好nice，朝朝同我打招呼，有時我同自己班同事講緊嘢，佢又會走埋嚟加把嘴，偶爾我對住部電腦做嘢做到入晒神，阿John失驚無神就喺我耳邊教路，老實講真係嚇親，佢行路冇聲。
當年我仲留意到一件好奇怪嘅事，就係阿John冇自己個位，佢日日返工好似打游擊咁，邊個同事放假冇返，佢就會直接坐落去，所以有次我請大假去旅行，隔籬位同事就同我講：「仆街喇，你放5日，即係阿John嚟緊5日都會坐我側邊，肯定煩L死！」咁當然啦，輪到我隔籬位同事放假時，我都會有類似感覺。
有時全公司full team冇人放假，阿John就會游嚟游去，時而坐reception前面張梳化，時而坐pantry，時而坐同事張枱，又試過坐會議室，有人要入嚟開會先至返出去。
正所謂不懂就問，我當時做咗一排就問阿頭：「其實阿John係做咩㗎？高層？點解好似咩都關佢事，又好似咩都唔關佢事，老細啲親戚？」
然後我得悉阿John一早已經被公司嗌退休，畀足錢冇拖冇欠，老細仲打咗個金牌仔畀佢，完全係分手快樂嗰隻……咪住先，退休幾年仲返公司，而且係日日返，早過9點到，遲過6點走，咁有冇人工㗎？
阿頭答我：「冇㗎！阿John真係日日返嚟做義工，老細好婉轉叫過佢唔好咁辛苦，因為我哋唔可以正式出糧畀佢，公司立場又要有勞保又要盛，阿John個年紀再加勞保會好貴，拉高晒條數，總之就搞唔掂啦，但阿John叫極都唔聽。」
我：「阿John 8:50就返到公司，淨係遲過receptionist（因為我公司個receptionist係返8:30），仲要日日著西裝，仲『四正』過我同你喎！」
阿頭：「係呀，有啲位尷尬㗎！特別係星期五全公司著便服，阿John仲係成套西裝，比老細更加似老細，曾經有客上嚟誤會過啦！」
初初我入職作為新人嗰陣，有個老員工係咁教自己做嘢，好友善咁同自己打招呼，的確係心生溫暖，不過久而久之都覺得Over咗，因為阿John會喺你同人傾緊嘢嘅時候，唔了解情況就搭嘴畀意見，又會行埋嚟聽你同客講電話，不斷喺側邊講嘢教你點答同埋點做，大佬呀！我唔係用speaker，你都聽唔到另一邊講乜，咪一輪咀教我點講啦，啲客又聽到我背後有把聲，我又要好集中先聽到個客講乜，好困擾㗎！
有一次又的確好離譜，話說有人上嚟公司見工，咁開頭一定係坐reception前面張梳化填form㗎嘛，阿John竟然走埋去同個求職者傾計……
「後生仔，睇你好緊張喎，點稱呼呀？」當時我喺reception個位收緊份件，見到阿John撩個求職者講嘢都呆一呆。
求職者可能見阿John成個老細咁，好禮貌地回答：「Hello，我叫Edward！」
阿John：「Edward你之前做開啲咩㗎？邊間公司做？」
我同receptionist地位低微，開聲又唔好意思，咁始終阿John以前喺公司做咗咁多年，好在冇幾耐HR出咗嚟，叫做阻止咗阿John幫人「Pre-Interview」，否則個場面更加搞笑，因為阿John臨尾仲同個求職者講：「睇好你呀！呢間公司好好㗎！第日正式返工我請你食飯！」
喂呀！人哋都未入房in，唔好畀個假希望人啦！
退休三年，明知冇糧出，阿John仍然日日返公司，Office hour仲要跟到足，佢自己已經講過無數次，咁樣係因為半世人都喺呢度打工，太習慣公司，太習慣個環境，退休後試過留喺屋企，點知周身唔舒服，甚至覺得有抑鬱，阿John話反正唔等錢使，不如返嚟睇下有咩幫到手喎！
無功都有勞，加上老細年紀仲後生過阿John，所以大家對佢好寬容，雖然試過無數次勸阿John唔好再返，可惜冇用，結果就發展到而家個局面喇，只係理解還理解，但阿John有時真係幾煩㗎！