見工嘅時候HR問我上一份工點解辭職，我答佢50%係想有更好發展，另外50%係因為公司嘅環境令我好不安，係人身安全方面嘅不安，HR聽完之後好驚訝，佢以為係嗰啲有同事欠債惹收數佬上門，如果係咁簡單反而容易解決，因為我舊公司嘅情況係複雜好多。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我初初喺舊公司做唔係咁，直至兩年前隔籬office換咗租客，係一間水牌寫住做工程嘅公司，自此之後就發生好多事，第一個引爆點係佢哋喺走廊食煙，雖然係工廈啫，你都冇理由喺走廊食呀？仲要唔係一支兩支，有時佢哋幾個人煙駁煙，搞到成地都係煙頭，又臭，真係烏煙瘴氣。
其實佢哋個單位有時會傳出一啲類似大麻嘅味道，我估班人喺office裡面食得仲勁，咁好心佢哋食煙就死返入去啦，做咩要喺走廊食，影響埋其他人呢！如果你坐電梯上嚟，基本上一開電梯門就聞到呢陣味，成層樓都好臭煙味，真係完全冇公德心。
除此之外，呢間公司啲人仲試過撩我哋嘅女同事，包括我，唔係畀人望一眼就以為人哋鍾意自己嗰種，佢哋係會對住你吹口哨，甚至兜口兜面問你拎電話號碼，啲行為同埋對白似足古惑仔電影：「靚女，收工呀？一齊飲嘢吖！」
我同埋其他女同事都唔會理，然後班人試過話：「使唔使咁寸呀？做個朋友啫！」跟住後面又會有啲嘍囉跟住起哄：「串嘴好喎，我鍾意。」
由於佢哋唔知做咩會成日喺走廊徘徊或者食煙，呢種場面係常見，就算唔撩你都會打量你，作為女仔點會自在呢？
隔籬公司見到我哋女同事會撩，但係見到我哋嘅男同事就會互睥，仲試過口角，雙方嘅對白都極之老土：
「望望望，望咩呀！」
「你唔望我點知我望你呀？」
「咁你望夠未呀！隻揪吖！」
「你郁手我咪報警囉！」
「嘩！報警呀？我好驚呀！」
呢種情況發生過不下五六次，雖然次次都係齋講，冇真係打，不過換轉係你都會有心理壓力啦！
你係咪好奇怪點解又食煙又有大麻味都唔搵管理處、控煙辦，甚至報警？你諗到嘅我哋公司通通做過，管理處嗰幾個阿叔仲驚過我哋，報警又冇實際作用，仲見過隔籬office班友兇返控煙辦轉頭。
其實我哋老細曾經唔知用咩方法想聯絡隔籬單位個業主，想話畀對方知，如果佢唔制止個租客咁樣，有機會係違反契約，但呢個世界好多規則雖然白紙黑字訂明，可惜要實行起嚟就非常困難，老細後來仲得悉隔籬單位個業主同個租客本身係認識，換言之唔係租畀街外人，個關係密切成咁，啲投訴難怪會好似石沉大海，叫天不應叫地不聞。
據我所知，唔止我公司投訴過，工廈樓上樓下都有人投訴過，因為佢哋夜晚間唔中會好多人開P，大大聲播歌，又會大叫，我哋試過OT嗰陣都聽到，直頭唱埋卡拉ok添！唔知以為係party room，咩工程公司究竟係唔係掛羊頭賣狗肉呢？
由於勸又勸過，鬧交又鬧過，我辭職前聽到老細話要出絕招報復……
老細：「淋屎吖！我哋搵一晚等佢哋走晒，淋屎喺佢哋門口，我有留意過，佢哋門口冇裝cctv，得罪咁多租戶，佢點知係邊個做呀！」
同事都有叫老細三思而後行，但老細話我哋門口有大大部cctv，量對方唔敢報復。
我遞信嘅時候已經叮囑老細唔好咁做，無可否認正常投訴渠道係冇用，但如果你真係淋屎，咁就連我哋呢啲受害嘅辦公室租戶都錯埋一份，更何況嗰班友唔係好人，更加唔係善男信女，你話冇cctv死無對證啫，不過班友如果發起矛，要報復你都冇辦法㗎喎，我哋話晒係同一層，嘈又嘈得最多，矛頭一定直指我哋公司，我擔心樓上樓下有人走去淋屎，一陣入埋我哋數添呀！
我舊老細正常唔敢，佢應該係講下㗎啫，我而家都走埋，心理壓力冇咁大喇，唔使再為隔籬office嘅事咁操心同埋神經緊張。
講返見工，呢份工個HR聽完都覺得好驚訝，咁我又唔係完全因為咁樣而辭職嘅，但多多少少有影響啦，試問邊個想喺咁嘅惡劣環境下返工吖！
或者因為搬office太麻煩啦，啲登記又要轉，郵寄地址又要轉，卡片又要印過，所以我老細先至諗到淋屎都冇考慮搬，雖然我已經quit咗，但都希望舊公司盡快解決呢個問題啦！（投稿已完，但希望你留一留步，睇埋下面一段小文字……）
雖然《辦公室日報》YouTube每次做人物訪問，觀看次數都遠遠比講故事低，但只要有一個觀眾，我哋都會繼續做落去。
「日本職場」不問學歷 無須經驗 免費睇波 人工8000
https://youtu.be/15mCL4_TaBc