係咪所有父母都會偏心，分別只係有冇做到出晒面呢？
公司有人攞大假陪父母旅行，然後大家就傾起呢個話題，由於我冇參與，有個同事就問：「好少聽你提起屋企人喎，有冇試過同阿爸阿媽旅行？唔係講笑，真係好攰㗎！下次寧願畀錢佢哋join團！」
我只係回應咗一個字：「冇！」唔係唔合群，同事平時傾乜都得，但傾屋企人就唔使預我。
我屋企不嬲重男輕女，中學嗰陣阿媽曾經叫我唔好讀書，想我幫佢哋出去擺檔，因為阿爸會拎啲舊嘢去擺地攤。父母對我講得最多嘅說話係：「女仔讀咁多書冇用㗎，搵個男人嫁出去，讀完書廿幾歲，出嚟做嘢就搵雞碎咁多，做到50歲都未賺返學費啦！跟我擺檔仲賺錢！」
記得咁清楚，係因為細個成日聽，雖然有時啲字眼會唔同，但意思一樣。
有次我答：「咁好賺你唔叫個仔去擺檔？點解要我去呀？」跟住阿爸就一巴車埋嚟。
我仲有個阿哥，阿爸阿媽不斷叫我唔好讀書，但同時就話要供阿哥讀大學。
我17歲已經每晚返part time，自己生活費由自己負責，諷刺嘅係我讀到大學，阿哥讀唔到。
十幾年前阿哥話要帶女朋友搬入嚟我哋間公屋，當時父母叫我搬出去，原因係如果阿哥同女友出去住，屋租加埋燈油火蠟開支好大……Hello，咁我一個女仔搬出去住就冇開支？
結果我租咗間劏房，地方雖然細，個公共走廊亦頗為污糟，隔籬房仲有一對成日嗌交嘅南亞情侶，但唔知點解我仍然住得好開心。
後來我死慳死抵買咗個細單位，叫做有自己個竇，為咗擁有呢個屬於自己嘅小天地，我而家呢份工做咗12年都冇轉，唔係對公司忠誠，純粹係我唔敢搏，始終每個月要供樓。幸運地我份工雖然唔算好好，但起碼叫做安穩。
上年年尾大約聖誕前後，阿媽打嚟同我講：「阿哥話鍾意你層樓呀！你賣畀佢啦！佢而家未夠錢，你轉咗名畀佢先！」
其實十幾年前搬出嚟住之後，我同父母已經好少聯絡，係大時大節返去食飯，而佢哋打親嚟永遠都有目的，只係呢次個「目的」大過以前好多！
我沉住氣反問阿媽：「唔畀錢轉名咁叫買咩？賣咗畀阿哥之後，我又住邊呀？」
阿媽：「你放心，阿哥想買啫，佢唔係要即刻住，阿哥會租返畀你，咁你每個月交租，阿哥到時儲夠咪畀錢你買囉！」
曾經諗過我會唔會係執返嚟，真係親生？所以我層樓要供兩次？乜都要畀晒你個仔？細個嘅時候你哋咁對我，而家我三十幾喇，仲玩緊重男輕女？
我Cut咗線，自從呢次之後就唔再聽屋企人電話，阿媽同阿哥嘅WhatsApp都block晒（阿爸冇用智能電話），農曆新年我都冇返去食飯。我唔理無條件轉名再交租畀阿哥嘅說法係講笑、偏心、定係認真，但你講得出即係有諗過，咁其實你哋都唔當我係屋企人，我又點解要為你哋而影響情緒呢？
所以同事問我點解咁少提起屋企人？我真係唔識答，匿名投稿喺度抒發ok，我做唔到喺同事面前講自己由細到大嘅經歷，因為呢個世界有好多人冇經歷過呢種事，然後就會質疑你老作，覺得你矯情。如果你想像唔到有咁偏心嘅父母，甚至覺得呢個係大陸膠劇嘅劇情，咁我恭喜你，證明你喺一個正常嘅家庭成長。