今日有個下屬向我請假，嗰期公司比較忙，同時間仲有兩個人拎咗大假，不過佢同我講：「好難得買到Adele㗎！最多我睇完就返啦！請2至3日假啫，我會夾埋星期六日！」其實我對娛樂嘢唔係跟得好貼，所以當時個腦load咗一陣，睇演唱會要請兩三日假？
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
我：「你去邊度睇演唱會呀？」
「Las Vegas囉！」
我：「咁遠？」唔怪得要特別同我講請幾日假。
「Adele而家長駐Las Vegas，佢又冇明年或者之後嘅行程，我都唔知佢去完Las Vegas之後會唔會搞巡迴，可能休息一排又唔定，就算係搞，都未必嚟香港，所以呢……可唔可以批假畀我呀？雖然Ian同Amanda到時都會放，我知人手有啲緊張……」
我：「兩三日？梗係唔得啦！」
呢位下屬個樣即刻有啲委屈，其實我意思係：「去得Las Vegas淨係請兩三日假，畀你夾埋星期六日，最盡都係5日4夜，你咁樣嘥晒張機票呀！放多幾日啦！你仲有6日大假吖嘛，用晒佢囉！唔夠咪最多no pay leave，放啦，玩得開心啲！」
下屬聽到之後勁開心，又返埋位重新規劃行程，因為我批佢放盡啲，咁成個trip就唔使咁趕。
我：「Adele呢啲級數開演唱會賣幾錢張飛？」
「$3218！最正中最前喇！」
我：「三千幾好貴喎！我之前買機票去首爾旅行都唔使三千幾。」
下屬以驚訝嘅眼神望我，佢唔係質疑我去首爾，佢係質疑我對$3218嘅誤解。
「$3218係美金，即係二萬五千幾港紙。」
我：「唔係啩！二萬五千幾港紙睇一場演唱會！」我盤算緊可以去到幾多轉首爾。
呢位下屬幾錢人工我當然知啦，咪正正係二萬五囉！佢用一個月人工睇一場show，仲要未計飛去Las Vegas嘅機票，雖然我冇check過，但點格價都應該接近或者超過5位數啦！另外酒店同食呢？粗略估計佢睇Adele演唱會嘅總成本慳極都要三萬幾四萬，原來一個人唔一定要有錢先可以任性，有時為咗自己鍾意嘅嘢，一樣可以好任性。
我個年代買演唱會飛比較簡單，當年雖然都有炒黃牛，但係發售時係可以去城市電腦售票網排隊，即係各區大會堂，同埋我後生嘅時候可能資訊冇而家咁發達，加上歌手會開好多好多場，買飛係難，不過對比起而家相對上會容易啲。
我仲記得自己第一次睇演唱會係1984年，唔係個人演唱會，係叫「龍虎群英演唱會」，有葉德嫻、陳潔靈、梅艷芳、張國榮、小虎隊，陳慧嫻，仲有黎芷珊，係咪冇人知道芷珊姐姐唱過歌？
呢個演唱會嘅名同埋歌手組合都有啲奇怪，但一直係我童年最真摰同珍貴嘅回憶，因為我係同老豆去睇，我老豆而家都唔喺度喇！
演唱會呢樣嘢真係開一場少一場，每個歌手、樂隊，或者組合嘅演藝生涯都好有限，有幾多個可以好似胡楓咁樣，而家仲開緊演唱會吖，就算個歌手好唱得，佢都未必有興趣再開show，王菲就係一個例子，所以無論你鍾意邊個，如果有機會睇live真係要好好珍惜。
雖然我覺得下屬飛到咁遠睇Adele好昂貴，但同時好佩服同埋替佢開心。
人好奇怪，有時間嘅時候未必有錢，不過你仍然會一擲千金，到你搵到錢嗰陣，可能又會冇時間，隨住年紀愈嚟愈大亦會改變價值觀，可能一千幾百你都嫌貴，所以最重要係活在當下，自己覺得值，咁咪去做囉！開心先係無價。
最終我批盡個下屬啲假，希望佢無後顧之憂好好咁enjoy個show，公司冇話冇咗邊個唔得，放鬆啲，長命功夫長命做。
我反而好想知道邊個歌手開演唱會，可以令你大破慳囊，肯捨得買最貴嘅飛入場呢？我係老人家喇，如果梅艷芳同張國榮仲在生，我應該都會捨得買最貴嘅飛，張學友都會考慮買最貴。
聽完下屬講，我即刻帶earphone聽咗幾首Adele嘅歌，係好好聽嘅！(完）
老細震怒！忘記cut自動轉帳，同事離職半年繼續出糧。
https://youtu.be/DUs8WXcPyHY