2023大約年頭左右，我家姐間公司想搵人搞過晒啲logo同埋brochure，因為平時唔使designer，所以佢問我識唔識人做freelance，我有friend真係做呢瓣，咁就「撮合」佢哋啦！
個friend接咗我家姐公司份freelance之後準時交貨，但係條freelance數就遲遲唔找，一眨眼3個月，然後半年，再到9個月，2023年嘅job去到2024年都未埋單，幾千蚊咋，咁都拖足一年？
為咗呢單嘢我同家姐嘈過幾次，家姐次次都咁回應：「唔關我事㗎，會計唔找我都冇辦法！」
其實呢句好不負責任，最初搵人幫手做嘢係你，做完嘢唔找數你就賴會計，ok！就當係會計問題，咁你哋都係同一間公司吖，係一體㗎！如果用呢個邏輯，採購部幫公司買完嘢唔找數：「唔關我事㗎，會計唔找我都冇辦法！」；Admin幫公司訂完枱食飯唔找數：「唔關我事㗎，會計唔找我都冇辦法！」；甚至老細租完office唔交租，你都可以話：「唔關我事㗎，會計唔找我都冇辦法！」
家姐又好，會計又好，老細又好，你哋叫人做嘢係有義務找數，會計唔肯做嘢你都要幫手追，我個friend連你公司個會計叫咩名都唔知，唔係要人走上你office親自搵會計呀？
當時正值2024農曆新年，我同家姐講：「你拖到過年呀？因住行衰運呀！爭人錢唔可以責過年㗎！」佢梗係冇理我啦！
家姐都係咁話，啱就啱，錯就錯，但原來「爭人錢責過年會行衰運」係真，家姐2024年去日本旅行學人租嗰啲滑板自動車，唔知係唔慣定係唔識揸，總之就失控炒咗，冇生命危險，不過就撞歪咗個鼻同埋崩咗門牙，我見佢show返啲相出嚟係成面血。咁都未算，家姐條仔原來一直有玩交友App，後來識咗第二條女飛咗我家姐……
呢啲係小菜一碟，主菜係家姐間公司執咗，而家佢冇得做喇，最後一個月糧仲拖住，佢哋成班同事上晒勞工處，我家姐係失住業咁踏入2025年，之前佢見過幾份工都衰晒。
唔係話咒佢定係心涼，只係想講爭人錢責過年真係可以好邪！至於條freelance數，我私人找咗畀個friend喇，一開始係我介紹，自己家姐衰啫，我都要對朋友負責任㗎！