3點開會，老細同另一位高層遲遲唔見人，大家喺會議室等到呆，終於等到佢哋現身。
高層：「真係頂你個肺！啲控煙辦咁得閒嘅，喺街食煙啲人唔捉？肯定唔夠數要追KPI啦！」
老細：「如果唔係你扯住我，頭先就打柒佢！捉賊唔見咁叻！禁啲煙入口囉！唔捉煙草商？」
原來佢兩個喺後樓梯食煙，遇到控煙辦巡樓，老細仲一口咬定係大廈嘅保安員走去報串，因為控煙辦好人好姐冇理由走嚟巡商業大廈。
除咗老細，有班同事都經常喺後樓梯煲煙，去親廁所都要食佢哋二手煙，勁臭！
控煙辦網頁有教人「即時向該場所的管理人投訴，要求場所管理人執行禁煙條例。」情況再冇改善就可以直接搵控煙辦，但試問我又點方便出面吖，仲要喺度返工㗎嘛！一陣唔知邊個保安篤我出嚟，老細知道就瀨嘢啦！
所以…係我報控煙辦…
當日報嗰陣，我都唔知控煙辦幾時「做嘢」，不過班煙民同事日日喺後樓梯煲煙，幾時嚟都捉到啦！而家一捉就捉到最大嗰兩個，真係very good！
最近佢哋唔敢喺後樓梯煲煙喇，全部落晒樓下，我覺得自己今次真係做得好好。