開心得滯好想分享，我喺某個外賣平台做嘢，淺白啲講即係外賣仔，早兩日接咗張單之後如常咁做啦！一上到去客人嗰層樓發現好熱鬧，有一男一女同個管理員企咗喺度傾嘢，費事理佢哋繼續送我張單，e……度門打開咗，原來就係送嚟呢間屋，正！撳門鐘都慳返！
「係咪叫咗外賣？」問完之後，個女人答係，咁我遞畀佢就打算走，好衰唔衰架電梯已經落咗，唯有等下啦！呢個屋苑嘅走廊應該係冇窗，又焗又熱，真係想快啲落樓，等電梯嘅時候聽到管理員同呢一男一女講：「我唔方便幫你㗎，你哋自己搞掂啦！」
唔係八卦，不過等電梯焗住要聽埋落去。
男人：「幫幫手啦！畀500蚊你好唔好？」
管理員：「唔係錢嘅問題呀！畀上頭知道我收你錢仲麻煩。」
女人：「你唔幫手，我哋今晚冇覺好瞓㗎！唔該你啦！齊頭畀1000蚊你！」
管理員：「唔好喇，你兩公婆搞掂咪得囉！你都係男人嚟㗎嘛，使乜驚呀？」管理員一路講一路指住個男人，如無意外呢對男女係兩公婆啦！
男人：「外賣哥哥，你有冇時間呀？幫幫我哋吖！」
我：「幫咩？」其實我企咗喺度等電梯咁耐，仲未意識到佢哋討論緊乜。
管理員加把口：「捉曱甴呀！你幫佢哋啦！」講完之後，呢個管理員就行咗去後樓梯，唔知係咪要巡樓？
我：「唔好搞我，送外賣唔入屋！」
女人：「而家我畀你入吖嘛，1000蚊！你幫我捉咗隻曱甴，我即刻畀1000蚊你！而家畀定你都得。」
我：「唔好喇，我趕住送下一單。」
男人：「2000！你送多單都冇呢個數啦！」
因為我從未聽過人哋出2000蚊叫人捉曱甴，真心覺得呢對男女有啲怪，一陣入咗屋發生咩事咁點算呀？你話我送外賣擅闖民居又得，一陣裡面有其他嘢隨時仲煩到自己，唉！唔好搞！
我：「唔好搞我，你搵朋友或者屋企人幫你仲好啦！」
女人：「3000蚊！3000蚊得唔得？」
雖然我頭先又話乜又話柒，懶清高咁，不過聽到3000蚊就開始動搖喇，正想開口答應，部衰電梯咁啱就到咗……
男人：「5000蚊！幫我捉咗隻曱甴！我哋而家唔敢返入去呀！」
雖然我唔知佢點解3000之後唔係4000，而係一嘢跳上去5000，但呢個時候唔應該再扮有型喇，5000蚊捉隻小強咋喎！我仲要唔驚曱甴，嚟啦！
我：「真係5000蚊？係咪畀現金？」
女人：「現金現金，即刻畀你！」
入到屋我淨係問咗3條問題：
1）喺邊？
男人：「喺房，我用緊電腦做嘢，突然見到腳邊有隻曱甴經過，都未驚完，佢就去咗入去衣櫃。」
2）識唔識飛？
都係個男人答我：「唔知，我淨係見到佢喺地下行入衣櫃，見唔到佢飛，可能識，我唔知。」
3）幾大隻？
仍然係個男人答我：「手指公再大少少，好黑㗎！唔係啡色！」
原來個女人係冇見過隻曱甴，男人喺房見到然後衝咗出客廳，跟住佢兩個就一齊驚，我都唔知佢哋係call管理員上嚟定係咁啱人哋巡樓，總之而家單「生意」就落咗我手。
打開佢個衣櫃，周圍郁下啲衫，再check下啲角落頭都係冇發現，期間一路聽住佢兩個自辯點解驚曱甴。
男：「想打佢已經打唔切喇，好快攝咗入衣櫃。」
女：「明呀！平地就易打啫，攝咗入去真係打唔到。」
咁你可以打開個衣櫃追殺佢吖……
男：「獅子老虎我唔驚呀，曱甴細隻你好難防佢吖嘛！」
女：「係囉，又肉酸，我寧願佢係好大隻啲野獸，起碼可以同佢鬥智鬥力，曱甴冇性㗎！」
肯定信你驚曱甴但係夠膽同獅子老虎搏鬥啦！
搵咗15分鐘都係無功而還，仲以為會同呢5000蚊擦肩而過，諗緊佢哋會唔會畀返一兩千我當茶錢，好在呢個時候隻曱甴終於出現喇，當我fing緊佢哋啲衫嘅時候，有隻曱甴忽然跌落地，的確係手指公再大少少，我一嘢就踩落去，扁晒！
與此同時，呢一男一女喺度依嘩鬼叫，仲退到出去間房外面，死咗啦，唔使驚喎！
個女人好驚青嘅同時仍不忘指揮我要執返啲殘渣，而個男人就請求我順手抹埋地下呢一撻，冇問題，受人錢財，替人消災，做畀你！
雖然佢兩個好搞笑，因為隻曱甴連間屋都想唔要咁滯，但總算遵守承諾畀咗5000蚊我，疏爽！
20分鐘賺5000，收完錢講bye bye就走先，計時薪勁過補習天王，我都知呢啲「快錢」冇下次，不過有得賺都真係開心嘅，有冇得搞一檔幫人捉曱甴嘅生意呢？滅蟲公司通常好大陣仗，而且收費都唔平，如果我係逐次收一千幾百幫人上門捉曱甴有冇得諗？又或者逐隻計又得，大隻加多幾百，識飛又加幾百，好過做外賣仔喎，預計夏天仲有機會爆單！