表姐見我搵工搵咗好耐，所以介紹我畀佢個friend識：「呢個朋友啱啱自己創業，上次先提起想請個人幫手，不過真係細公司，要一腳踢，你介唔介意先？」仲有乜好介意吖！我搵工搵咗3個半月喇，再係咁落去都唔係辦法，我比較介意冇錢開飯。
結果表姐好快就幫我穿針引線，隔咗幾日就去埋佢個friend間公司interview喇，但與其話係interview，不如話直接返工仲貼切，因為表姐個friend又唔睇學歷，又唔睇resume，甚至唔問我之前嘅工作經驗，呢鑊真係有呼吸有心跳就請！
另外我想問下大家，細公司嘅定義係咩？20人？10人？3至4個人？表姐個friend叫Marco，佢係one man band，咁樣應該叫一人公司，連細公司都稱唔上，可能係因為咁，呢位Marco先至會咁容易就請咗我，佢根本唔係約我上嚟見工，而係約我上嚟直接返工。
Marco：「你係Alice表弟，冇問題啦！今日有冇約人或者特別嘢做？」
我：「冇呀，冇特別，見完工都係返屋企。」
Marco：「咁不如就今日開工啦！」
之前send咗幾廿封求職信，真係有人約去interview就得5份，但我全部都好比心機準備，偏偏炒晒粉，估唔到而家有份工咁求其就請咗我，有時際遇嘅嘢……
Marco第一日已經教咗我好多嘢，包括公司做啲乜、佢嘅創業理念係乜、點搵客、點覆客，連未來3至5年嘅plan都講埋，真係好詳盡，不過當我夜晚返到屋企先醒起佢講漏咗一樣嘢，所以即刻打畀表姐：「喂！你個朋友Marco呢，有冇同你講會出幾多人工畀我？」
表姐：「痴線，佢點會同我講你幾錢人工呀？你自己返工唔問佢？」
我：「今日冇一個位畀我入，同埋Marco嗌我返工真係太突然喇，我以為今日係見工咋！」
表姐：「你聽日問下佢啦！雖然係我介紹啫，但我知你人工都好怪，你哋兩個都係男人，唔使唔好意思喎，直接問佢就得。」
啱嘅，我亦唔可以因為Marco係表姐朋友就覺得尷尬，佢一人公司我預咗冇乜福利，不過人工幾多始終都要知，我亦預期冇bonus冇雙糧，得個知字囉！第二日我決定用「銀行戶口」做切入位，問下Marco出糧有冇話邊間bank會方便佢？
Marco：「出糧？」Marco嘅眼神同語氣都好驚訝。
我：「係，salary！I mean有冇邊間bank方便你出salary？」Marco講過自己之前喺美國讀書，慎防佢唔識聽中文「出糧」，我試下轉講英文Salary，「銀行」就轉做bank，應該夠晒清晰喇啩！
Marco：「我諗住大家係partner，公司賺到錢嘅時候就分錢，可能我同你表姐講得唔清楚，我係想搵個人返嚟同我一齊搏殺，一齊做開荒牛。」
我：「即係……你想分股份畀我，代替人工，係咪咁？」
Marco：「係呀，大方向係咁，哎呀，唔好意思，令到你誤會。」
如果佢唔係表姐個friend，我一定會爆粗同埋追返之前一日嘅人工，求其你畀200又好500又好，我就係驚冇錢開飯先搵工，你叫我嚟做partner同埋開荒牛？
即時孭返個背囊走人，我EQ低，最終都忍唔住問咗Marco一句：「你係咪覺得我好鍾意做義工呀？」
一路走一路用voice msg錄音畀表姐：「我而家先知自己似義工！」
表姐可能一時get唔到（佢當時未知Marco冇打算出糧畀我），佢聽完我個voice msg就打返字畀我：「二宮？二宮和也？邊忽似呀？Marco話你似呀？」
無視表姐覆文字，我再send多個voice msg去：「唔係二宮和也個二宮，係唔收錢個義工，你朋友叫我做partner，原來係冇人工㗎！」
聽講後來Marco搵過表姐，好鄭重咁say咗個sorry，表姐亦有同我講唔好意思，算啦！我自己都有責任，如果第一日就開門見山問人工福利，之後就唔會有一連串誤會，不過Marco呢種唔使錢搵partner嘅心態都好唔要得。
呢份工就冇得著喇，返咗一日冇錢收，淨係多咗個花名叫「義工和也」，而家連我女友、我圍內啲friend，仲有我阿媽都知呢個花名，除咗無奈，我都唔知應該講乜好。