入咗一間冇人講嘢嘅公司。
第一日返工，經理淨係交低啲嘢畀我做，呢次係佢有史以嚟同我講最多嘢嘅一次，亦係唯一一次。
經理冇介紹同事畀我識，其實佢見工時已經好寡言，interview嗰陣佢話：「介紹下。」
我自介完，順便講講上一份工，佢又拋出一句：「點解辭職？」
咁我講完一輪，feel到佢惜字如金，所以成程interview都係我主動講嘢，最後個經理話：「Ok！」跟住就起身，個勢表示今日到此為止，連啲例牌對白「有消息通知你」都冇講，以為佢唔請我啦，點知唔係喎，過咗一日已經收到HR電話叫返工。
經理冇介紹同事我識唔緊要，自己主動打招呼囉！
「Hello我叫阿Tom！」坐我左邊嘅同事冇表情點咗一下頭，唯有再向右邊嘅同事講「Hello我叫阿Tom！」呢位有啲笑容，但都係不發一言，淨係對住我豎起手指公，即係……讚我叻？嗰陣我心諗，你班友係咪啞㗎？
返工第一日冇人提出welcome lunch，其實我唔介意，只係本住要有禮貌嘅諗法，我輕輕問過同事一唔一齊食晏？但佢哋依然唔講嘢，只係耍手示意唔去，然後我見班同事係各自出去食，曾經諗過係咪夾埋排斥新人，不過做落就知唔係，我自己去食lunch嘅時候，無數次見到啲同事係單拖喺餐廳食，佢哋之間唔會約埋一齊。
最有趣嘅一個畫面係，有次我落公司樓下茶記食lunch，隔一張枱見到個同事自己食兼用電話煲劇，再望過對面又有另一位同事係自己食，我哋三個明明係識（有一個係隔籬department），但就分開喺茶記各自食飯，同陌生人冇分別。
其他部門私下有冇WhatsApp我唔知，但我個department就肯定冇WhatsApp group，彼此亦唔會喺office hour以外搵對方，我舊公司唔係咁，啲舊同事周不時WhatsApp講無謂嘢，而呢度就不相往來，你會覺得大家喺同一個地方返工，每星期對足5日，但人與人之間嘅感情好淡薄。
仲有，我哋公司冇咩聖誕party、annual dinner、春茗，但有開工利是，而經理派嘅時候都係得一個字：「嗱！」然後就遞畀各人，你同佢講多謝，佢就點下頭行開，多一句都冇。
初初好唔慣，office亦理所當然好靜，不過後期我適應咗喇，仲覺得咁都幾好，唔使應酬，唔使特登搵嘢講，精神上其實好放鬆，唯一係每次放工都feel到自己個口有啲臭，因為講嘢嘅機會實在太少喇！