老婆同幾個朋友去芬蘭，展開佢哋嘅極光之旅，呢幾個月不停聽到佢問我：「你真係唔去呀？去啦！Amy老公都去呀！」而我一次又一次推搪，因為我對旅行冇興趣，又或者可以話好厭惡，唔理你芬蘭荷蘭定波蘭，總之我就唔想去機場，唔想過海關，唔想坐飛機。
記得喺10年前左右，有個舊同事將十幾日大假打散嚟放，我問佢做咩咁浪費唔儲埋去旅行，個舊同事答我：「最憎去旅行，我都唔enjoy，返嚟咪又係大把嘢積住要做，我寧願得閒放下平日，咁就真係可以休息下喇！」年輕時嘅我聽到佢咁講，第一個諗法係～～～痴線！
乜呢個世界會有人唔鍾意旅行㗎咩！
後來我轉工，interview嗰陣個HR問我：「呢份工成日飛㗎喎！你得唔得㗎？」
我係咁答：「成日飛點會唔得呀？我最鍾意搭飛機，最鍾意去旅行。」
老細：「一個月飛兩次就梗㗎喇，之前好多人都嫌辛苦，你上一手係女士，佢初初都話好鍾意飛，飛飛下就辭工喇！」
我：「可能係性格問題啫，不過有得飛我好開心喎，希望有機會加入你公司。」
結果我真係加入咗呢間公司。
個HR冇呃我，嗰幾年我不停飛不停飛，有時一個月兩次，有時幾次，有時長途，有時短程，最誇張係一個月飛四次，其實一個月都係得4個星期，頭一浸飛杜拜，跟住去法國，仲要遇小偷，第三個星期快閃加拿大，公司因為要慳錢，被迫要轉機，來回兩程加埋用咗40個鐘左右，中間只係停留兩日，最後一周仲要飛印度。
唔止飛唔同國家，講緊係短時間內飛兩三個唔同洲份，準備嘅衫可以熱同凍好兩極，其實幫公司做嘢唔係廿四小時，總有時間可以出去行下街，我亦試過偷得浮生半日閒，走去join啲local tour，甚至自費加錢改機票加酒店玩多一兩日，但呢啲都係入職初期嘅事。
做耐咗，我開始覺得好攰，係身心俱疲嗰種，身，當然就係要動身去咁多地方，時差不斷轉嚟轉去，有時會唔記得咗何年何月何日，甚至係AM同PM，仲有時差；心，就係要準備嘅嘢，唔止衣著，連乜嘢地方乜嘢電壓，要用三腳定兩腳插頭，通通都要記住同埋齊裝備，雖然大部分酒店都可以幫到你，但自己唔齊始終好麻煩。
「旅行又點同工作呢？心情都唔同啦！」好多人同我講過呢番說話，包括我老婆，但我唔理係私人定公事，最令我心力交瘁其實係搭飛機嘅過程……舉例，下午3點鐘機，望落好似仲有半日，實則你兩個鐘前要到機場，外國有時去機場唔似香港咁近，呢度又要預時間，基本上你起身check out已經等於完結。
去到機場，樣樣嘢都要排隊，有時係幾折騰，唔同地方可能會對入境有唔同要求，要準備嘅嘢又有少少唔同，可能你又會話：「車！咪又係填幾張form，有幾煩呀？」一年去兩三次旅行，一年填兩三次，咁就梗係唔煩啦，又要排一大堆時間做安檢呢樣嗰樣，嗰種煎熬我都唔識得點形容，做得耐，真係好攰。
執行李又係煩，去程還可以，返嚟先嘔血，好多嘢要洗，唔係間間酒店好瞓，五星級酒店都唔一定舒服，遇到個唔好嘅枕頭，可能條頸又唔舒服幾日，床墊都一樣，有時好硬，有時好軟冇承托，頻繁轉換酒店好難適應。老實講，有蝨嘅床我遇過，換咗第二間房都係咁，嗰次仲要住三晚。
有經血漬嘅床單我遇過，因為半夜先至捐上床，半夜先發現，即刻打電話去服務部叫人換，雖然經血唔會死人，但核突囉！
有鬼嘅房都住過，入房之後有條走廊，仆佢個街用感應燈，有人行過先著嗰種呢，結果成晚著下熄下，又要叫人上嚟整，同一晚成張被畀啲唔知咩扯走，感覺到有嘢瞓我側邊，有聲不斷沉吟（係沉吟，唔係呻吟），唔知講緊咩，大佬呀，點樣身經百戰都驚啦！
仲有一次去國內，開房門已經見到地下有啲叫雞卡片，我冇理，再隔一陣有人敲門，我都冇開，然後就聽到有人敲我隔籬房門，仲聽到「北方佳麗」同隔籬房講：「先生，需唔需要服務？」
好在我冇心癢癢要呢啲服務咋，當晚就聽到隔籬房好嘈，都唔係呻吟，係類似鬧交咁，起碼有幾把男人聲，後來仲知道有公安嚟咗，我冇八卦呀，但以經驗去分析，9成係嗰啲捉黃腳雞嘅天仙局，希望冇搞出人命啦，第二日我又馬不停蹄要坐車去另一個城方喇！
我頂唔順，總之諗起要執行李，提早去機場、過關、安檢、編行程（工作都要編行程，有時要知距離同埋點坐車）、轉酒店、離開再去機場，又過關，又安檢，返到香港嗱嗱聲又執行李洗衫……我愈嚟愈厭倦，身體亦都覺得愈嚟愈攰，最終我轉咗另一份工。
疫情嗰段時間冇得飛，我反而輕鬆咗，但由於當時好耐冇同過老婆旅行，上年我終於破戒同老婆飛轉台北，雖然係好短嘅機程，但我仍然種厭惡感。
老婆啲friend都問過我：「芬蘭喎！極光喎！點會唔鍾意旅行㗎？有人唔鍾意旅行㗎咩？」
有呀！呢個世界真係有人唔鍾意旅行㗎！雖然係少數，但我都想知有冇同道中人，我係有搭飛機同過海關恐懼症，一諗起就好鬱悶。(完）