「Dickson你要請食飯啦，我教咗你幾多嘢先？臨走點都要請返餐慰勞下我啩！」Office裡面一個old seafood大大聲講嘢，另一個senior同事又和應：「咪係，樓下間茶記我唔收貨㗎！點先？係我就揀餐廳㗎喇，聽晚有冇問題？」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
Dickson雖然做得一年，不過喺我哋公司仲算新人，始終old seafood多，例如我呢種做得兩三年嘅簡直係小角色，當時我見證住Dickson離職被一班資深同事嘈住請食飯，小朋友邊識得拒絕吖，又或者係唔好意思say no，結果Dickson就答應咗請食farewell飯。
我唔知呢啲習慣同傳統係因人而異，定係因公司而異，我之前份工係舊同事夾份請我食farewell飯，而家就成班老嘢迫個小朋友請，呢啲唔係睇意願㗎咩？咁都要用群眾壓力？
因為係同一個部門，嗰晚我都被邀請出席，臨出發先知道係去尖沙咀某酒店食buffet，我第一個反應係：「吓！食buffet？幾錢呀？最平都幾嚿水啦，我唔想食咁貴喎，何況buffet我麻麻地，小鳥胃唔爭氣，肯定回唔到本。」食buffet，我並冇諗過由Dickson請，第一時間諗AA，咁梗係覺得貴啦！
其中一個old seafood回答我，但冇望住我，因為佢全程望住Dickson講：「貴咩啫？又唔使你出錢，Dickson請吖嘛！你係咪睇唔起Dickson先？」
Dickson禮貌地微笑，不過笑得好牽強，呢種表情又唔算罕見，平時啲old seafood自吹自擂嘅時候，我哋都試過夾硬擠出笑容。
嗰日做嘢真係好忙，完全冇時間作太多討論，跟住放工就一行7人去某尖沙咀酒店，包括我、Dickson，Old seafood(s），仲有個秘書。
由於班old seafood係全程同Dickson講嘢，我都冇機會埋身，所以我一直都係溜後同秘書傾計，佢話係當日下晝先畀其中一個old seafood嗌埋一齊食飯，又係臨放工先知道食buffet。
秘書：「Dickson咁豪嘅？定係講下笑咋，唔通請晒我哋咁多個呀？Buffet平極都要幾百蚊一位啦！」
我：「呢間我頭先快手search過，自助晚餐成人HK$718，仲有加一，我估佢哋講笑啫，七七都四十九，五千幾銀喎呢度，Dickson份糧都係萬幾蚊，臨走唔通仲要請同事食咁貴？」
為咗避免任何尷尬場面發生，我同秘書決定後join，一齊過去酒店對面個商場撳現金先。
跟住喺buffet期間，因為大家都會出去夾食物，我就趁機會同Dickson講：「今餐你唔會真係埋單呀？」
Dickson嘅笑容又開始尷尬，佢答：「我都覺得好貴，冇諗過佢哋會食自助餐。」
我：「應該講笑啫！」
埋單嘅時候先知唔係講笑呀，成班人起哄嗌Dickson請，有人叫侍應遞張單畀Dickson，我同秘書早有準備，即刻拎頭先撳嘅cash出嚟，話呢餐咁貴唔好玩Dickson啦！
其中一個old seafood：「我有coupon呀，本來7個人連加一要五千幾，而家四千幾咋！你哋畀返錢即係唔畀面Dickson啫！」嘩！班old seafood認真㗎喎！
作為「局外人」，我同秘書淨係可以幫到呢度，可惜Dickson都係唔好意思拒絕，竟然拎咗張信用卡出嚟找數，跟住班old seafood就係咁講：「多謝晒！」即係焗佢請啦！
其實Dickson當時嘅面色係尷尬又難睇，你say no吖嘛，有啲嘢一定要你自己出聲㗎！冇理由我同秘書玩拍枱代你出頭㗎明唔明？大家成年人喇，唔通我湊仔咁樣護住你咩？Cash都遞埋出嚟畀位你入，我同Dickson年紀差唔多都係廿幾歲，你自己出句聲啦！
點都好，最終Dickson都係碌卡埋咗單。
散席離場，班old seafood喺酒店門口圍住Dickson講多謝，又祝佢前程似錦乜乜乜，我同秘書再一次遞上現金，點知畀其中一個old seafood阻止，Dickson可能見已成定局，又加一句：「唔使啦！」
不過我同秘書始終唔好意思，啲人散晒之後陪Dickson去搭車，沿途塞返錢畀佢。
Dickson：「真係唔使喇，請得佢哋冇理由淨係收你兩個。」
結果我同秘書要扮到好躁底唔肯畀佢請，Dickson先至收返啲錢，喺街將啲錢推嚟推去真係又婆媽又樣衰。
你可以怪Dickson軟弱，但係班old seafood玩群眾壓力，現場環境的確令Dickson騎虎難下，不過講到尾都冇可能嗌個同事請咁多人食buffet啦，你按返人工比例又好，身份又好，交情都好，點講都係唔通㗎喇！
幾日後老細知道咗件事（後來我知道係秘書講），嬲到大發雷霆行過嚟我哋部門鬧人。
老細：「你哋係唔係人嚟㗎！叫Dickson請食buffet？有coupon都四千幾銀埋單，你哋好唔好意思呀！」
我反應好快：「我有畀返錢Dickson呀！食完畀返cash佢！」
老細：「我知，得你同埋Coco（秘書）有畀，其他人呢？」
其中一個old seafood：「Dickson自己話請㗎！」
老細：「請乜春啫？佢幾錢人工？你幾錢人工？畀返錢人啦！你哋第日走係咪都請食buffet先？唔好咁過份啦！」
傻啦老細，呢班人點會走呀，我肯定班old seafood會做過世。
老細當時火氣係幾大，至於班old seafood有冇call Dickson話畀返錢就暫時未知，因為老細發火都係上星期嘅事，我WhatsApp Dickson問又好似有點兒那個，遲啲再跟進。
不過認真講句，Dickson自己都要學下拒絕，否則呢種性格去到邊都會蝕底。(完）