#讀者投稿 有一年，女友提議玩情趣嘢，咁我就上網訂咗隻蛋（識震嗰種），一支棒棒（都係識震嗰種），一個手扣，仲有一件女僕衫，然後send去公司，主要原因係我同父母住，送去屋企唔得掂，阿媽平時連我啲信都拆，好危險㗎！
情趣嘢送嚟office當日，我咁啱等個熟客嚟拎sample，對方講明會夜啲到，無所謂啦，反正計OT，超過8pm仲有晚飯津貼，咁我咪嗌定外賣等囉！當晚最後一個同事都喺7:30pm走埋，見冇人就拆咗個包裹check下啲貨，順便上網book酒店同女友去玩，有一期香港好興Staycation，唔知大家有冇印象？
搵Staycation套票嗰陣外賣到，拎個飯盒去pantry食，繼續碌電話揀酒店，剛食完熟客就WhatsApp我話到咗樓下，我即刻衝去版房拎sample，個客好熟㗎喇，佢同我都係住屯門，見我等到8點幾，仲好好人咁話車我返大西北，求之不得啦！
我話要返上去熄燈鎖門，但由於公司樓下係禁區，熟客提我動作快少少，ok，我咪一支箭標上去囉，因為office啲燈掣喺晒門口，男人老狗又冇手袋話走就走，我驚連累熟客畀人抄牌，真係幾秒鐘搞掂落返嚟，繼而坐順風車入屯門，冇錯呀，我唔記得咗嗰堆情趣嘢喺自己枱面。
咁我係幾時先記得呢……第二日返工途中，時間係朝早8點幾，場景係巴士上面，我急到瀨屎，就算棄巴士截的士亦唔容易，你知香港返工時間咩情況啦！
落車之後仲跑得快過劉易斯，如果前一晚返到屯門先記得，我會毫不猶豫出返公司處理，可惜一切已經太遲，到office嘅時候搭正9點，班同事做嘢唔叻，最大優點係準時，我返埋自己個位嗰陣，四周圍嘅人已經坐喺度，而我批貨包括手扣同埋女僕衫都原封不動喺晒枱面，正確嚟講係枱面正中央，而識震嘅蛋蛋同埋棒棒都有原裝盒，粉紅色好sharp醒，有公仔圖，畫得好靚好有動感添㗎！
班同事全部冇出聲冇問，但咁樣係好唔正常，因為平時我擺包旺旺仙貝喺度，佢哋都會講：「咦！旺旺仙貝呀？」擺支綠茶又會講：「咦！道地呀？」就算我擺個鉛筆刨佢哋都會話：「咦！鉛筆刨呀？」呢班人好似未見過世間萬物咁，不過呢次成張枱都畀情趣嘢覆蓋咗一半，佢哋係冇問過一句，亦冇提過任何嘢，好厚道呀！雖然緊接落嚟班同事少咗同我講嘢，特別係女同事。
我寧願佢哋問，畀個機會我講兩句打圓場，不過佢哋冇，結果我兩個月內辭咗職，好傻係咪？唔知點解釋，總之心理壓力好大，我唔想面對。
上星期我結婚，老婆係我當年去Staycation個女友，百般滋味在心頭，所以突然又諗起呢件事，其實老婆同朋友都唔知，我連講出嚟都覺得羞恥，呢度冇人識我，純粹想舒發下。
有冇留意「讀者投稿」4個字今日擺頭？我驚你哋誤會係我嘅故事呀。😂