或者每個人都遇過工作上嘅豬隊友，但係豬到咁嘅地步，相信冇人可以超越我，試下投稿講講自己嘅經歷，我承認係心地唔好，希望見到有人分享更惡劣嘅例子，因為咁樣我嘅心理先會平衡返少少。
話說我條team有個女下屬叫Rita，樣好正常，智力方面就……唔肯定，最大原因係我唔知佢有心定無意，有時我都覺得自己EQ好好，唔發火不特止，仲可以控制住唔黑面，就講今朝單嘢先吖！
我：「唔該幫我print三份T&C同一份contract！」
Rita：「好，三份T&C，三份contract！」
我：「一份，一份contract！」
Rita：「明白，一份T&C，一份contract！」
我：「三份，三份T&C，一份contract！」
Rita：「得，知道，三份T&C，一份contract！」
以為佢明，過咗一陣Rita拎咗三份T&C畀我。
我：「仲有一份contract呢？」
Rita再出去影印，然後我收到三份contract……
又有一次，我叫Rita幫我attach份文件send畀一個叫Andrew嘅客，因為有cc埋我，所以我見到……佢send咗畀另一個叫Andy嘅客。
我：「Andrew喎！你send咗畀Andy呀！你recall返個email先，有報價單喺裡面！」
Rita：「下！哦！點recall呀？」
教完佢點做，然後份文件終於send到畀Andrew喇，不過就空白嘅，佢send啱電郵但忘記attach份文件。
第三次send，呢次終於記得attach文件畀Andrew，但我見到email個上款係打住「Hi Andy」……點解要咁樣呢？豬隊友見得多，蠢到咁真係未遇過！
其實由Day 1開始，我已經唔敢畀一啲複雜嘅嘢Rita做，全部都係畀啲好簡單嘅指令，難度最高已經係類似print三份T&C同一份contract呢種任務，但係咁樣都錯。
如果畀啲入data嘅手板眼見功夫Rita做得唔得呀？嘩！Data錯咗第日要搵返出嚟仲煩，所以我而家直頭唔敢畀嘢佢做，佢亦唔會主動問我，係有時啲同事睇唔過眼Rita咁得閒，先至係咁易叫佢print下嘢或者執下嘢。
有時我懷疑Rita係特登做錯，然後換嚟冇人搵佢做嘢嘅局面，肯定係有心，否則就一定智力有問題。
既然廢到咁都唔炒？我自己攞嚟？點炒呀！老細個女嚟㗎！唔好話炒啦，我鬧佢都唔敢呀！
當日係老細帶個女返office「巡場」，然後話要Rita留喺度學嘢，我以為自己好醒啦！即刻笠水唔出聲，隔籬team個Manager仲擦鞋擦唔切咁叫Rita加入條team，原來咁先係最醒呀！
Rita做咗兩個月唔夠，個Manager就話自己個部門冇乜嘢學，內部彈咗Rita去Sales Team，然後Rita自己話做Sales要成日出街好辛苦，咁點呀？IT佢做唔嚟，會計又要識計數，倉務嗰邊就擔擔抬抬，結果揀冇可揀就嚟咗我條team，內部已經冇其他department可以畀佢再轉喇！
難為老細仲成日走嚟我嗰度講：「畀多啲嘢佢做吖！第日佢都要接我棒，遲啲我想個女學下做管理層。」
咁就真係恭喜你間公司喇，印三份T&C同一份contract都搞唔掂仲要做管理層，公司嘅前路一定好康莊！
無論係真傻定假蠢，我都覺得Rita將來唔會有心機打理呢間公司，因為而家冇嘢畀佢做，我見佢都係樂得清閒，上網睇劇，煲電話粥，有次我仲見到Rita擺部手提電話喺會議室張枱，然後錄自己跳舞……做咩啫佢！
有時真係好醜命生成，我哋做到隻狗咁都係平凡打工仔，識得投胎就傻下傻下都生活無憂，你話個世界幾唔公平！
最慘係Rita霸佔咗我條team一個head count，我條team冇薪酬空間去請多個人，同埋個department已經冇吉位，所以請多個人都冇地方可以坐，好在其他同事都明白發生緊咩事，知道我呢個阿頭係身不由己。
【最高1万円放題🎉】老闆出錢 池袋扭蛋夾公仔 日本女生加分🥰夾娃娃高手
