公司大，有啲同事你認得咩樣，但都要諗一諗先記得個名，新人就更加要時間認識，唯獨有個新嚟叫Cindy嘅女同事就令我印象深刻，唔係因為佢特別省鏡，而係佢好自戀好煩！每次路過Cindy個位，呢條女都係玩緊自拍，試過爆完石出嚟佢仲selfie緊，嗰度大大話話有成15分鐘，有冇影咗過百張相呢？
有一次終於有機會近距離接觸Cindy，話說我同佢條team其中一個同事都幾friend，嗰位同事叫我食lunch，Cindy又跟埋嚟，咁就是但啦！起初Cindy問我哋想食咩，我提議去街口間茶記，點知Cindy話有另一間餐廳好想去，哦！一早有諗法，咁直接講啦！
頂你個肺間餐廳要行成廿分鐘，坐低嗌埋嘢食之後lunch time已經冇咗一半，正想咋咋臨快食啦，個Cindy仲喝住我，話要相機食先，叫我同另外嗰位同事縮開隻手，拎走枱上面啲紙巾，否則個構圖唔靚喎！
後來佢仲叫我幫佢影相，舉咗機一陣，發現佢搞咗一大輪頭髮都未ready，開始等得唔耐煩，開口問佢影得未？然後佢話：「吓！乜你仲未影㗎？」天呀！原來佢已經ready好晒，係我未ready，佢想我影佢唔望鏡頭嘅相呀！你扮咩不經意啫，根本就好作狀！
求其影咗幾張之後畀返部電話佢，Check咗兩眼Cindy唔收貨叫我再影過……
Cindy教我點樣撳「人像」攞景深，又要咩「三分構圖法」，要影到隔籬幅牆啲裝飾，又要影到少少後面隻窗滲入嚟啲陽光，你老味仲要甚麼推光，仆你個街仲難服侍過我自己條女，如果唔係考慮到一場同事要一個星期見五日，我真係屌咗佢十世！
後來我同返嗰位同事講：「下次有呢條女一齊食lunch就唔好嗌我，煩到hihi！」
同事：「就係因為佢纏住要我一齊食lunch，我先至叫埋你咋，之前佢約我放工去M+，入到去指揮我幫佢影咗幾廿張相，之後仲要詐我型，話影得唔好。」
我：「好心你就唔好同佢去啦！」
同事：「嗰陣時唔知佢咩料吖嘛！我未講完呀！M+而家要畀錢入場㗎嘛！Cindy係完全冇睇過啲嘢，目標淨係去某兩三個位打卡，又準備咗另一部機叫我幫佢拍片，打完卡就走，$120一張飛，我完全冇機會參觀，呢條女好有機心，最癲係影完之後一日，Cindy send咗條link畀我，話人哋影同一個景影得好靚，痴孖根！佢嗰啲link係專業攝影師啲IG，人哋用大機又執晒相先post出嚟㗎！」
我：「我唔想知你哋啲嘢，總之第日有佢就唔好叫我，見到佢咁樣影相就想作嘔，正一自戀煩hi！你都唔好再同佢食飯去街啦！」
不過呢個問題唔使再煩喇，因為上星期老細已經炒咗Cindy，事緣呢條女拍咗條片擺上social media，內容係佢好自戀咁影住自己打字做嘢，重點係條片影到晒email裡面嘅內容，包括客戶名稱同埋一啲內部價目表，老細見到之後嬲到黐線。
你應該會問點解老細會見到係咪？差啲唔記得講，嗰日食完lunch之後，Cindy已經show咗佢嘅social media畀我睇，包括IG同埋小紅書，係咁叫我follow佢，仲有記得like晒佢啲post，原來佢癲到叫晒成個department仲有老細follow，嘩！公司想請個OL啫，點知請咗個KOL，犀利呀呢次！
知道佢被炒之後，我即刻同上次個同事講：「而家我有興趣follow佢喇，想知佢post公司內部文件跟住被炒，會唔會影返輯靚相呃like，有冇喺公司門口打卡，不過我冇小紅書呀，你有冇得睇？」
睇真啲～～～嘩，IG萬幾個followers喎，click入去睇下先，啲fans有Mohammed、Abdullah、Hassan，咩嚟呀？非洲人呀？ovuvuevuevue啲friend嚟喎，另外有一位同事有小紅書，睇到Cindy個account名已經唔開胃，叫咩「嗝哈」唔知咩，呢啲係咪要迎合返國內社交媒體嘅名？246個粉絲，妖！
洩漏公司資訊張相應該remove咗喇，不過小紅書有上次食lunch我幫佢影嗰張相，個description都特別乞人憎，用簡體字打住「主打一个感觉」，主咩打啫！
先唔計佢用唔用小紅書，我覺得呢啲同事真係好煩，食個lunch都要幫佢影十幾張相，做佢男朋友應該仲慘，我做咁耐都係第一次見老細炒人。