每逢打8號風球就會諗起公司發生過一單嘢，雖然8號波嘅機會真係唔多，不過真係太經典喇！5至6年前左右，有個同事一早請定大假做body check，佢每年都係嗰啲時候攞AL，但係嗰一次就撞正8號風球，天文台都預告定個波會喺第二日大部分時間懸掛。
咁呢位同事前一日睇完新聞衡量過，跟住就想同上司銷假，因為佢去做body check嗰度都肯定咗8號風球唔會開，要重新再做booking，點知個上司就唔肯幫佢銷假，仲話批咗就係批咗，冇得突然又走嚟話取消唔放，又搬埋老闆同人事部出嚟，強調呢個係公司嘅規矩。
個同事唔忿氣，喺office同上司嘈起上嚟，但所有嘢都維持原判，結果兩個人嘅爭拗持續到放工之後都未完，因為個同事選擇喺公司個WhatsApp group裡面「據理力爭」，HR都喺個group度，其實老細都係，只係老細平時好少send msg出嚟大group啫！
嗰晚應該大部分同事喺度睇msg食花生，上司同個同事一連串文字同埋voice msg爭拗之後，率先忍唔住出聲嘅係HR，佢搬咗勞工法例出嚟解釋：「冇風假呢樣嘢，風假唔係法定權益，所以你一早拎咗大假，公司批咗，咁就一定要放，每個人拎AL都有唔同目的，我哋冇可能因為你間診所唔開就畀你取消拎咗嘅假期。」
唔知你認為HR講得有冇道理，總之個同事就係唔忿氣，強調嗰日大假係一早攞定，而家打8號風球唔使返工，公司冇理由要佢硬蝕一日假。
HR又解釋：「其實批大假係要你同公司有共識，你話邊日放，公司話ok，就係咁簡單，同樣地，取消呢日大假，都要員工同僱主之間有共識，你話取消，公司唔批，咁就唔成立，又調返轉講，我哋已經批咗大假，到頭來又話要取消唔畀你放，你覺得合唔合理吖？」
同事：「咁所以我咪叫公司取消返呢一日嘅申請囉！我而家就係嚟同你哋攞共識呀！」
因為以上嘅溝通已經係用到voice msg，上司同HR嘅語氣都係好平靜，反而個同事就愈講愈激動，每個voice msg都係嗌破喉嚨。
後來個同事講到要報勞工處，又話要搵律師……我估佢都係嬲得滯先至咁講，唔通真係搵律師去告咩！人哋都未必接你呢啲case啦！就算畀你爭取到，你嘅日薪都唔夠cover律師費啦，所以有句說話係「衝動是魔鬼」，真係講得冇錯。
佢哋由前一晚開始不斷用msg來來往往，第二日打8號風球都係持續，大家由初初食花生去到最後已經覺得好煩。
第二日嘅8號波就好似今日咁，半日已經取消變返3號，但因為HR講過，其實打風唔可以稱之為放假，只係公司畀員工留喺安全嘅地方工作，即係你未返工就留喺屋企繼續開工，結果呢位同事喺天文台改掛3號風球之後，竟然第一個返到office門口等……睇嚟佢真係嬲到失去咗理智。
結局係公司最後屈服，其實又唔可以用屈服兩個字，因為老細唔想嘈得咁難睇，始終個WhatsApp group係全office都喺度，裡面又有一啲年資比較淺嘅新同事，老細覺得咁樣好肉酸，加上呢位同事改發3號風球返到公司之後仲繼續吵吵鬧鬧，無日無之真係唔知要嘈到幾時。
其實開頭都有其他人覺得個上司好衰，點解8號風球唔肯畀人銷假？不過隨住個同事歇斯底里喺度嘈，又鬥氣喺第二日極速返到office等開門之後，風向就有啲轉變喇，大家都認為佢over咗，搞到件事太肉酸。
隔咗冇幾耐，老細叫個同事同佢上司入房傾咗好耐，原來係勸個同事自己辭職，條件係公司照賠一個月人工，唔希望佢會覺得係無理解僱，而理由係經過打風嗰次事件之後，其實雙方嘅關係已經破裂。
聽返HR講，老細講咗句：「你自己走啦，無謂搲爛塊面 ，好坦白講我對你印象好差。」
或者個同事都覺得咁樣落去好無癮，加上公司叫佢辭職都照賠一個月人工，最後佢真係走咗。
唔知有冇人覺得成件事嘅導火線係個上司唔肯畀下屬提前一日銷假，如果最初嘅時候開綠燈，就唔會引發後續嘅一連串事件，不過個上司就話呢位同事由前一日想銷假時已經態度好差，講唔夠兩句已經發晒脾氣，繼而搞到件事好大，又特登喺WhatsApp group度嘈，要全部人都知，想所有同事支持佢，想用群眾壓力搞情緒勒索，結果令到所有人都好難落台，第二日衝返office等開門更加係夾硬嚟。
個同事走咗好多年喇，但係而家每逢打風都會令大家諗起呢件事。（完）
噚日篇文因為有敏感字眼，社交平台刻意壓低觸及率，如果未睇嘅朋友可以click以下連結：
https://hkofficedaily.com/?p=27098