請人返嚟戒煙真係未試過

我負責Interview,頭先問個Candidate上一份工點解辭職,第一次聽到咁嘅答案:「我戒唔到煙。」

「吓?」因為冇諗過佢咁答,真心反應唔切。

Candidate:「之前公司成個部門都食煙,雖然我都食,但其實一直想戒,喺嗰度戒唔到。」

然後個Candidate開始扮聲模擬佢前上司:「戒煙咁叻仔呀?幾時返埋教會呀?Hallelujah!」

佢再扮聲模擬另一位舊同事:「好人好姐戒咩煙呀?行啦乸型!食完同你去做義工呀!」

我:「你就咁講得㗎喇,唔使扮聲。」

Candidate:「總之每次拒絕佢哋叫食煙都好多說話聽,又話突然戒煙會暈同埋好快死,又話佢阿婆食咗煙好多年,而家80歲仲好健康,反而冇食煙嘅人無啦啦生癌,唉!聽得多都好煩,我唔想再咁呀!」

我:「所以你係為咗戒煙先至裸辭?」

Candidate:「係!進行中,努力戒緊!」佢嘅眼神相當堅定,唔知點形容,有種好認真地講鳩嘢嘅感覺,雖然reason of leaving唔係請一個人最重要嘅考慮因素,但換轉係你會唔會信呢個原因?

請個人返嚟幫公司做嘢就聽過,請個人返嚟幫佢戒煙真係未試過。

其實佢interview各方面表現都唔錯,由於HR仲約咗兩個人上嚟見工,我要見埋先可以決定,就睇下最後會唔會請佢。

error: