我覺得自己做錯咗，直接或間接令到份工見唔成，雖然唔知真相，不過真係有啲後悔。
之前去咗間公司interview，過程正常，仲幾好傾添，去到尾聲有個男人敲門入會議室，佢同HR講：「仲未見完呀？啲嘢食到晒喇喎！」
HR答佢：「差唔多啦！你哋食先。」
男人：「你主角嚟㗎！一齊食囉，食完再in過。」個男人話「一齊食」嘅時候係望住我講。
我：「……」
HR：「唔使理佢，佢好鍾意講笑。」
男人：「咩講笑呀！12月壽星得兩個咋，全世界等你切蛋糕呀！嚟啦！一齊食多雙筷啫，雖然食Pizza唔使筷子，哈哈！」
HR同個男人你一言我一語，最後真係叫我一齊食，個HR仲話我知「每月壽星party」係公司文化，會買蛋糕同埋嗌到會，美其名為嗰個月生日嘅同事慶祝，實際上係循例gathering活動。
其實我唔為食，更加唔係想痴餐，但當時個氣氛有少少盛情難卻，我承認心態上覺得一齊參與，就好似成為咗佢哋一份子，彼此關係會好啲，提升受聘嘅機會，當時我係咁諗。
結果我尷尷尬尬喺呢間公司食到會（其他人唔知我乜水，你話尷唔尷尬…)，大約參與咗20分鐘左右，我已經主動同HR講走先，HR仲好好人答返我：「好呀！咁我有消息通知你。」
Interview過程愉快，又親切叫埋我gathering，我都好融入吖，點知一個星期之後冇電話、兩個星期之後冇電話，一個月後都冇，我忍唔住打返去問，HR喺電話度答我已經請咗人。
本來見工失手好平常，但可能我期望過高，當刻喺電話度唔知點解會咁問個HR：「係咪嗰日我一齊食嘢，所以你哋唔請我呀？」
問完都覺得自己好失禮，feel到HR喺電話另一邊都畀我嚇親，佢仲要安慰我：「唔係，點會咁諗㗎你，有另一個candidate畀你更適合啫！」
直至目前為止，我仍然覺得當日參與佢哋「每月壽星」係錯，硬係覺得如果冇一齊食，個結局或者會改寫，你認為關唔關事？其實叫我一齊食係咪試緊我？