份工我見成咗㗎喇，返埋工添，不過想講下當中嘅經歷。
當日負責first in嘅係一位同我差唔多年紀嘅女仔，初時以為佢係HR，後來先知係部門同事。坦白講，我覺得自己表現好差，英文自介雖然練過，但係都講到甩甩咳咳，緊張啩！有條問題更加聽唔明，要個女仔用返中文問我，我又用返中文答
然後佢問咗我一啲關於experience方面嘅問題，咁我真係唔熟同埋唔識，有啲嘢始終吹唔到，去到呢一刻已經feel到份工係咁先，點知個女仔同我講：「嗱，我而家叫Manager入嚟做埋second in，咁你唔使再抽時間嚟多次吖嘛，一陣佢問你咩都話識就得㗎喇，唔好話自己唔熟。」
我：「但你頭先問嗰幾樣嘢……我真係未掂過喎！」
「冇機會用到㗎！個招聘廣告寫到乜都要識㗎咋，你之前做過又點啫，間間公司都唔同，間間公司都要重頭學過㗎啦！總之你記住，問你咩都話識，OK？」
未等到我講OK，個女仔已經行出去搵Manager入嚟，跟住呢個所謂嘅second in就開始喇。
除咗Manager之外，嗰個女仔都有坐喺隔籬，仲幫我「擋」咗幾下，例如Manager問我英文O唔OK？個女仔竟然搶答：「冇問題呀！頭先用英文同佢傾過計，流暢！」
吓！我啲英文柒到喊喎，流暢都講得出？
Manager緊接再問我幾個問題，其實頭先個女仔已經問咗一次，今次我跟佢吩咐咩都答識，咩都答做過，就係咁，佢哋請咗我，仲問我可唔可以第二日即刻返工
（因為我本身待業，當然可以即時返啦！）
有offer當晚我又開心又擔心，開心係因為搵到工，加上覺得人間有情，有個陌生人咁樣幫你interview過關喎！仲唔係見工遇貴人？至於擔心方面，梗係驚自己胡混過關會做唔掂啦！
謎底喺我返工第一日揭曉，嗰個女仔好熱心咁教我嘢，正確嚟講應該係交接工作，原來佢last day喇！又原來佢個last day已經一而再，再而三咁delay，因為Manager要搵到replacement返工先放佢走，之前嚟見工嘅人唔係畀HR foul咗，就係個Manager唔要，直至遇到我。
公司唯一嘅HR嗰幾日放大假，所以呢個女仔自告奮勇做first in，過濾完先畀Manager見第二round，而咁熱心幫我，冇幫其他求職者，係因為我當時冇工，唔需要一個月notice，可以即刻返。
簡單嚟講，當時喺云云嘅CV裡面，唯獨我先可以幫個女仔盡快脫苦海……唔怪得我英文咁柒都話我好，又叫我咩都要答「識」同埋「熟」啦！
暫時返咗兩個禮拜，份工的確完全唔需要講英文，嗰啲技能同經驗要求都用唔著，個女仔話「冇機會用到」似乎又冇呃我，可能言之尚早啦，要再做多一排先至知，點講都好，搵到份工我係開心嘅，希望平平安安過試用期啦！