早幾日有個女求職者上嚟見工，見我嘅時候都好正常，咁ok就直接叫阿姐in埋第二round啦！跟住嘅發展就令我畢生難忘，完全演譯咗只要你唔尷尬，尷尬嘅就係人哋……但其實可能得我一個人覺得尷尬啫，阿姐應該係樂在其中。
事緣個阿姐係六十歲嘅女人，而且我哋公司係比較Casual，唔止大家衣著都比較隨意，就連女同事都唔會點化妝，阿姐就更加啦！點知個求職者應要求再一次介紹自己之後，緊接問咗阿姐一條問題：「有冇人話過你似明星呀？」
乜嘢呀？你知唔知你自己見緊工㗎？
阿姐：「咩明星？」其實阿姐都畀佢嚇窒，因為interview冇諗過對方忽然爆句咁嘅嘢。
求職者：「吖！叫咩名呢？《愛回家》晚晚都見到㗎！」
我心諗，係唔係群姐呀？髮型同年齡都好吻合喎！
求職者：「呀！記起喇！熊心如呀！真係好似喎！」
阿姐：「熊心如？」
求職者：「即係蘇韻姿呀！劉丹個女，熊若水呀長腳蟹個細妹，而家冇出場㗎喇！」
蘇韻姿我識，喂你唔好咁過份吖！阿姐應該生得出蘇韻姿喇喎，你唔係話佢似群姐都算喇！或者你話佢似林漪娸或者馬海倫都唔同你計，雖然人哋都仲係靚好多，但起碼啱返個年齡層，你而家話個就嚟可以拎強積金嘅阿姐似蘇韻姿？
阿姐：「我記得邊個喇！冇人話過我似喎！」梗係啦！除非你身邊嘅人失明㗎啫！
求職者：「你後生係咪好多男仔追㗎？如果可以睇下你後生個樣就好喇！」
見工啫！唔使咁樣呀？正當我以為求職者太浮誇嘅時候……
阿姐拎咗自己部電話出嚟撳，我坐側邊見到佢碌緊相簿，佢搵舊相呀！！！不過當你係iPhone第一代，照計你所謂「後生」都已經係30至40年前，嗰陣會唔會仲用緊call機或者大哥大呀？
唔知佢搵咩相啦，咁搵相都要時間㗎嘛！不過冇悶場呀！個求職者繼續化身誇誇群，起勢係咁讚阿姐件衫靚，又話佢隻戒指靚，聽到我都起雞皮，然後終於等到有相。
阿姐：「後生啲相就冇喇，嗱！呢張全家福喺屋企個客廳影，後面掛住嗰張係當年嘅婚紗相，你拉大睇下喇！」
一個人嚟見工，一個in緊人，你叫佢拉大張婚紗相嚟睇做咩呀？
求職者：「似喎！你老公係咪爭贏好多人先至娶到你？」唔好咁樣啦好冇？
阿姐：「咁又冇，不過我以前試過行街畀人跟咗幾條街，最後個男人衝上嚟問我拎電話號碼。」
有個男人跟你幾條街？你係咪爭人錢呀？
求職者：「咁你有冇畀呀？」
阿姐：「冇啦，嗰陣時我已經同我老公拍緊拖。」
求職者：「哎呀！你應該畀個機會人吖嘛！即係當時你未結婚啦！」
阿姐：「我好專一㗎！」
求職者：「咁又係呀，而家後生嗰班嘅價值觀變晒，一腳踏幾船又有，玩交友App，咩約炮，咩sp，真係搞唔掂！」
阿姐：「咩係sp？」
喂！Hello！我呢個HR透明㗎？嘗試打斷佢哋先：「不如我哋講返份工先！」
然後閘住我嘅人，竟然係阿姐……
阿姐：「你畀佢講埋先，咩係sp？」
然後個求職者又真係解釋，而家見工呀！呢度公司會議室呀！講咩sp呀？
不過你唔好理，阿姐同佢傾咗足足45分鐘，搞到下一round嚟interview嘅另一位求職者等咗好耐，仲要壯烈犧牲埋，點解？因為第二個求職者只係in得5分鐘咋，阿姐已經「心有所屬」，揀定咗話佢似明星嗰位女求職者喇！
我唔否定佢識講嘢，但如果齋「硬件」同經驗，我覺得呢位女求職者唔係最適合，不過我只係HR，話事權喺個阿姐身上。
最難頂係呢幾日阿姐周圍同人講：「有個女仔嚟見工，話我似《愛回家》個熊心如……」似喇似喇，難為其他同事要附和佢，阿姐吖嘛，唔認同都唔可以笑出嚟。
好在嗰位浮誇求職者下星期就會返工，得啦！以後擦鞋同講大話嘅工作就交畀佢，但唔好再咁誇張喇，我哋其他人都要畀反應，驚接唔到呀！
【2024最新】日本手信十大🇯🇵東京駅人気手土産🏆第一位連續多年No.1
