本身去見工，變咗做樹窿，因為個HR由第一分鐘開始已經講自己嘅愛情故事，正確嚟講應該係失戀故事先啱，所有嘢都源於我個名，HR睇到我張application form好大反應：「咦！你send嚟份CV叫Raymond Fong，而家先見到你中文名原來有個『俊』字！」
HR嘅語氣好似認為我蓄意隱瞞咁，其實send CV通常都簡單啲，唔寫中文全名好出奇咩？如果唔係上到嚟又要填你張application form，我都唔想畀你知我中文全名呀！不過就算有個「俊」字又點呢？嗰下我都唔知HR想表達啲乜？
HR：「叫得阿俊都係仆街！」
雖然現實中冇慢鏡重播，但我好肯定自己當時有O嘴，咩事呀？我嚟見工咋喎，做咩話我仆街？
其實我唔係脾氣好，只係反應唔到，點估到喺呢種見工場合會畀人嗌仆街？
個HR完全冇理我，自顧自繼續講：「我之前兩個男朋友都叫阿俊，兩個都偷食，一個畀我check到佢有SP，證據確鑿仲想抵賴！另一個仲衰，一腳踏兩船，又問我借錢，真係賤到冇人有。」
明白……理解咗發生咩事之後，我同個HR講：「但我冇SP，都冇一腳踏兩船，同埋我今次上嚟係見工咋！」
HR：「我知，唔係話緊你，不過叫親阿俊都冇好嘢㗎喇，即係好似啲人話叫Jessica都係八婆一樣，個名會影響一個人嘅性格。」
呢下真係畀佢殺個措手不及，正當我唔知點接落去嘅時候，個HR又發表偉論：「我發誓下次識男友唔會再搵個叫阿俊，而家玩交友App第一件事唔係問對方住邊或者做咩，我會直接問對方中文名，有個俊字即刻躝屍趷路！唔使再傾落去！」
哦！原來你以前啲仔係交友App識嘅。
喺會議室見工大約40分鐘左右啦，個HR起碼用咗30分鐘講佢前男友點衰點衰，我全部齋聽冇回應，咁真係唔知點應吖嘛！佢講嘢又好似機關槍咁，加上講得好激動，差在未喊㗎啫！我要去到尾段先捕捉到佢嘅唞氣位。
我：「不如講返份工先吖！」
結果我成功爭取到10分鐘真正interview！由飾演樹窿再變返求職者嘅角色。
點解我講到咁輕描淡寫？好似冇火咁？因為到尾聲嗰陣啱啱好1點，呢位HR叫我自己出去食lunch先，佢隨即安排我兩點返嚟second in見 Manager，呢下有少少感動呀！我係請假嚟見工，咁即係意味住我唔使再請多日second in，一日內搞掂咪好囉！
講真呢位HR見工係見得好求其，平心而論，佢係極度唔專業，不過求其有求其好，是是但但就咁畀我再進一步見Manager，second in冇HR份，所以過程正常返好多，重點係呢份工仲請咗我，而且expected salary方面我係填30,000至35,000呢個range，佢畀到最高35,000我，完全冇壓價，咁當然～～畀到最高未必係HR嘅功勞，但總括嚟講係順利嘅。
而家過咗試用期先敢投稿咋！原來呢位HR喺公司出晒名係怨婦，其他同事都知道佢過往兩段情史……
我Manager：「我唔知佢以前男友叫阿俊喎！佢淨係猛咁呻自己蠢，又話係男人都會偷食，反正係咁，以後寧願搵個靚仔嘅男朋友，覺得咁樣抵啲喎！」
同事A：「好似話有條仔借咗佢8,000蚊一直未還吖嘛！仲要分咗手之後都問佢借錢，唔知佢有冇借呢？」
同事B：「佢同你講叫親阿俊都係仆街？點解你唔爆佢呀？其實你可以投訴佢㗎喎！不過算啦，你都入咗嚟做，無謂搞大件事喇！」
原來真係個個人都有講，點解唔寫出嚟再print晒畀大家睇啫，咁咪唔使重複講廿幾次囉！
雖然interview嗰次佢當我係樹窿，但係入職之後就冇再同我呻喇，畢竟大家唔同部門，平日工作根本冇機會接觸，可能咁啱見我中文名有個「俊」字，所以interview嗰次先會咁激動啦！應該唔會同每個candidate呻一次咁癲啩？
唔係叫阿俊就一定仆街嘅，係你自己冇帶眼識人啫，而且聽佢嘅口吻，相信係長期玩交友App識男仔，呢啲App咩人都有，扮溝女其實做傳銷又有，結咗婚扮單身又有，5呎未夠扮180都有，希望個HR唔好再遇人不淑啦！