
約咗個求職者上嚟見工,嗰位部門經理慣例叫埋我呢個HR一齊in,其實之前in咗幾位都正常嘅,我指個過程正常,點知下晝in一個男仔嘅時候,部門經理忽然跳掣,問咗對方一條摸不著頭腦嘅問題。
事緣呢位求職者之前做過兩份工㗎啫,第一間就因為公司結業,第二間就downsize大裁員,部門經理咁樣問人:「你做嘅公司唔係執笠就裁員,你當時點解要揀呢啲公司呀?」我坐喺隔籬聽住,其實唔多明白呢條問題嘅含意,究竟佢係想表達……A) 求職者揀公司眼光好差?定係B) 諷刺求職者好黑仔,連累咗嗰兩間公司。
唔知你會點樣理解部門經理呢番說話,可能係加埋當時嘅語氣啦,我自己覺得偏向B,即係有少少寸個求職者。
然後求職者嘅回答就令我更肯定,佢都get到部門經理嘅出發點係想寸自己,即係不懷好意。
求職者:「咁我想問下你,你有冇買過六合彩?你覺得一定會中?如果唔中,咁你當初點解唔買頭獎嗰堆number?」
又有啲道理喎!打工仔揀公司好被動,你估個個都手執幾個offer任揀咩,何況有時為生活,邊間請就要做邊間㗎啦,點知若干年後會執笠或者裁員呀?
部門經理:「你繼續講吖,我聽緊。」乜嘢呀?人哋咪答完囉,仲寸返你添,點樣繼續講呀?
求職者:「我講L完喇喎,你仲想聽啲乜?」唉,第二句就著咗,仲爆粗……
我作為HR都要控制下氣氛:「呀……唔好講粗口,不如我哋講下你之前份工嘅工作內容吖!」
部門經理:「吓!咁就講L完嗱?上一間公司downsize啫,即係未執啦,點解你有份被裁先?個個都唔L裁,淨係裁你?屌!講都冇L人信啦!當我on9咩?」
求職者今次望住我講:「你聽到啦,佢都講晒粗口㗎!」
係囉!呀部門經理,做咩落我面呀?我上一句先叫求職者唔好講粗口,你下一句就爆返幾個粗口出嚟!
部門經理:「你唔好轉移話題,而家係我問你,你答L咗我先啦!」
求職者:「DLLM你唔知就唔好鳩估啦,公司炒咗廿幾人呀,咁佢哋要郁啲細,保住啲大,關我L事呀?」
部門經理:「咁咪得囉,你唔講清楚我點知啫,係咁屌嚟屌去都唔知你屌乜?」
求職者:「我冇屌嚟屌去喎,我淨係屌9你之嘛!你問埋啲on9問題就預咗畀人屌啦!」
我諗要再形容得細緻少少,喺佢兩個屌嚟屌去,又L又9嘅對話過程當中,求職者係好勞氣,真係嗌交tone,不過部門經理就係軟皮蛇tone,冇大聲,冇激動,好似老油條咁,所以唔好誤會兩個人係扯高衫袖嗰隻,火藥味當然有啦!但個求職者後段明顯畀部門經理影響咗,變咗寸寸貢咁爆粗,而唔係聲大夾惡嗰種爆粗,形成雙方互窒嘅局面。
求職者:「問L完未㗎?我仲有第二份工要見,冇你咁得鳩閒。」
部門經理:「我都好L忙㗎喎,有消息通知你啦,咪L漏低嘢呀!我唔L負責㗎!」
求職者:「屌!」
冇錯,呢個interview就喺一聲「屌」之後結束,我全程睇佢兩個表演。
見工見到粗口橫飛,係咪匪夷所思?未算!更匪夷所思嘅係,interview之後一日,個部門主管打內線畀我,佢咁講:
「你問下噚日個男仔如果1號返工得唔得?唔得就4號啦,因為2號同3號係星期六日。」
我:「咪住先,唔好咩1號2號3號,邊個男仔呀?」
「咩呀,之前係in咗幾個,但噚日total in得兩個人之嘛,朝早嗰個女仔唔得啦,晏晝上嚟嗰個男仔呀,仲有第二個咩?」
我:「你哋爆晒粗喎……」
「So?爆粗唔代表唔請喎,我幾鍾意呢個男仔,起碼夠膽,敢講嘢。」
我:「唔好玩啦……」
「唔係玩呀,認真㗎,快啲啦!你問下佢1號得唔得?」
我:「真係唔好玩啦……你要CV都仲有,我可以再安排其他interview㗎!」
唔理咩夠唔夠膽,敢唔敢講嘢啦,你兩個見工都咁重火藥味,一齊做嘢仲得掂嘅?不過部門經理再三確認佢唔係玩,仲話唔想浪費時間做interview,又強調趕住要人,覺得呢個男仔嘅background最啱……總之佢真係決定要請,咁嘅劇情真係無定向喪心病狂喎!原來你同人屌嚟屌去係出於欣賞呀?咁點解interview嗰陣唔客客氣氣呀?
匪夷所思嘅見工過程,匪夷所思嘅請人決定,我唯有無奈地打畀個男仔,話佢知有offer同埋想佢1號返工。
我:「喂,你好呀,噚日你上咗嚟interview,想問你1號可唔可以返工?」
求職者:「CLS!變L態㗎你哋,打嚟叫我返工,玩鳩我呀?」然後個求職者就cut咗我線。
唔係黑心唔想請佢,但真係唔合邏輯吖嘛,個部門經理問嘅問題又鳩,大家都講晒粗口,你而家話請人,換轉係我都唔想做啦!好在個結局唔係匪夷所思咋,至少個求職者聽到有offer之後嘅態度係正常,見工梗係互相尊重㗎啦,唔通不屌不相識咩!(完)