見工被洩露資料，我真係覺得好嬲。早兩個星期我請假去interview，第二日返到公司即刻畀Manager叫入房。
「你噚日去見工呀？」
我：「冇呀！」
正常都唔會認啦！我以為Manager疑心重，見我請半日假就懷疑我去見工，點知佢有真憑實據。
「冇？你噚日唔係上咗XXX（公司名）咩？入面好多人以前都跟過我㗎！唔使唔認喇，點呀，喺度做得唔開心咩？」
事已到此，我焗住要認：「唔係唔開心，想試下唔同嘅發展啫！」
「間房得我同你，唔怕講喎！你係人工唔滿意定係點先？」
我當時已經冇心機聽Manager講嘢，因為真係有啲火，去interview被告密到而家做緊間公司，換轉係你嬲唔嬲？同埋講咩「入面好多人以前都跟過我」吖，啲人就算跟過我Manager，都唔會識得我㗎喎，點講都唔通啦！所以好明顯就係in我嗰個人向我Manager告密。
事情嘅發展係點呢？Manager隔多日再叫我入房傾，主動加我人工，其實我都冇第二條路揀啦，除非裸辭㗎啫！咁我本身係打算搵到先轉，去interview間公司篤爆我，即係唔會請我啦，而家間公司又加薪留我，所以唯一可以做嘅就只有留低。
我有坦白同Manager講，想告對方侵犯我私隱，不過Manager叫我唔好搞咁多嘢，如果追究會令佢難做……我明，始終Manager識得in我嗰條友，但係條氣好唔順囉！
你就算請我然後做reference check，事先都要得到我同意啦！而家你唔係請我，但就同我現任Manager講，有冇諗過會害死人㗎？表面上加人工係因禍得福，但係Manager同我個心裡面亦已經有條刺，成件事搞到好核突囉！