「我淨係介紹咗兩個candidate畀個客啫，一個係你啦，另一個就係男仔嚟嘅，總之二分一機會，個客自己都唔想嘥時間，你見之前仲有咩問題都可以隨時打畀我，加油呀！Good Luck！」Headhunter幫我約時間見工，佢交代得都算清楚。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。（其他人士或專頁如在Facebook按「share」原文，則不在此限。）
跟住個時間上去，填緊form嘅時候咁啱有個男仔上嚟，佢同receptionist講係嚟interview，receptionist就反問個男仔：「唔係約你12:00咩？你早咗45分鐘喎！」
男：「係呀，我諗住早少少到吖嘛！」
早少少？早咗成個鐘咁滯喎！結果receptionist都畀埋張form佢填，大家填完之後就齊齊坐低等，呢個時候另一個男職員行出嚟，佢同receptionist傾咗兩句之後就同我哋講：「你哋介唔介意一齊in？反正都到齊。」
其實我介意，不過個男仔就秒速話ok，咁我可以點吖？
男職員帶我哋去嗰間房係喺office最尾位置，所以沿路行入去嗰陣幾乎係巡視咗間公司一次，我見到有個人伏喺枱瞓緊覺，當時只係朝早11點幾，唔知佢係開完通頂定係唔舒服呢！
再行多幾步，我又見到另一個人晾咗對腳上枱，雙手就揭緊本雜誌，唔知以為佢去咗馬爾代夫啲海灘度假。
終於見到有3個女仔好專心咁圍埋一齊睇mon，哦，原來呢間公司都有人係認真工作嘅，但係當我再望真啲，原來佢哋係睇緊MIRROR嘅MV……帶緊我哋入房個男職員都見到，仲要同呢3個女同事點頭打招呼。
有個阿叔同事仲好笑，佢冇食煙，但係耳背係攝住咗支煙，呢位阿叔同事仲要著白恤衫，十足十茶記侍應咁，我相信佢應該係成日行出去煲煙，為咗方便起見，所以都費事將支煙擺喺煙盒。
差唔多行到入房，同我一齊in嗰位男求職者都見到，佢擰過嚟用一個好疑惑嘅眼神望我，雖然係第一次見面，但唔知點解我feel到佢係同我講：「嘩，呢度咁都得？」
入到房，嗰位男職員表示自己係經理，今次請呢個position亦都係under佢，真係失覺晒，咁我改返口叫佢做經理啦！
經理一坐低就同我哋講唔好介意，因為佢晏晝拎咗半日假，所以都想嗱嗱聲完成個interview，仲嗌我哋介紹下自己。
仲以為會lady first，點知個男求職者又搶先自我介紹，仲要自動波用英文自介：「Hi! I’m Benjamin and I’m so excited to meet you. I’m a passionate, driven person who wants to do……」
經理突然打斷咗呢位Benjamin：「呀！你用返中文得喇，因為呢度啲同事都好少講英文，如果唔係對客，我哋內部同事啲email有時都係用中文，所以你用返中文做自我介紹會好啲。」
咁又係喎，人哋用廣東話問你，你搞咩一開口就講英文呢？不過公道講句，公司用中文email往來又的確少見嘅。
其實喺我哋interview嗰陣，已經不時聽到出面班同事大聲喧嘩，雖然唔係好清楚聽到佢哋講乜，但都真係幾嘈，仲成日聽到有條女笑得好大聲，後來有幾句係男人聲，呢幾句就聽得好清楚喇。
「DLLM！係咪CLS㗎！咁都得㗎咩？」
「係喎！你知嗰個迴旋處勁多盲毛㗎嘛，個牌都唔知係咪淘寶淘返嚟！」
之後佢哋仲有幾把聲都係粗口橫飛，如果冇估錯應該係講緊揸車啦！
見工嘅過程冇咩特別，經理1 vs 2都係前後in咗30分鐘多啲，佢送返我同Benjamin出去嗰陣可能已經12點接近食lunch，我見到office裡面啲同事仲hea過頭先，唔係傾緊計就係游嚟游去，驟眼睇似乎係冇一個人認真做緊嘢。
經理話會盡快決定同埋通知個headhunter，然後講聲bye bye就入返去，留低我同Benjamin等電梯，呢個時候Benjamin就同我傾計：「你見唔見到呀？瞓覺、晾腳、講粗口，咩都齊。」我笑一笑代替回應。
電梯落樓期間，可能因為冇人，Benjamin繼續發表佢對呢間公司嘅不滿，又話個headhunter提過有我呢個女仔同佢競爭，但就斬釘截鐵表示就算請都唔會take offer，唔知佢係咪仲嬲緊經理打斷佢個英文自介呢？
落到樓我哋分開走，唔夠一個鐘已經收到headhunter電話。
Headhunter：「喂，如果頭先份工請你，你做唔做呀？不過我老實同你講咗先，個客原本係想請個男仔嘅，點知個男仔say no，佢話間公司啲人好hea，瞓覺晾腳講粗口，真係咁樣咩？」
我：「哈哈，係呀！」
Headhunter：「咁你點吖？而家你冇對手。」
我：「我做呀！我就係鍾意呢啲環境！」
Headhunter好明顯畀我嚇親，首先佢擔心我係後備，人哋唔揀Benjamin先揀我，怕我介意，其次佢覺得我係女仔，如果環境真係咁樣，照道理女仔會唔鍾意。
我：「可能頭先嗰個Benjamin好有大志啦，不過我就係想搵一份輕輕鬆鬆嘅工，頭先office有幾個女同事圍埋傾MIRROR，我幾想埋去join呀！同埋我唔係嗰啲聽到粗口會打冷震嘅人，我覺得冇所謂喎，有糧出咪得囉！如果間公司啲人好認真好冷漠，咁我仲驚，hea就最啱我，唔通想做到隻牛咁呀？」
Headhunter聽到之後好開心，因為佢又搞掂一隻job，我亦絕對唔介意做後備頂上，都係嗰句啦，最緊要有糧出。
我已經正式返咗工㗎喇，呢度果然同我in嘅時候一樣，同事鍾意瞓覺就瞓覺，晾腳就晾腳，其實粗口都唔係成日聽到嘅，係個別幾個同事啫，而且佢哋唔係鬧人，通常都係傾計傾起某啲事先會講，有時我發覺好搞笑添！
至於食煙，你又唔係喺office裡面食，又唔係向住我噴，何況我都食……不過冇佢哋咁密，而家間唔中攞正牌落樓下煙break吹水都唔知幾開心，總之喺呢度返工時間過得特別快。
後來經理都有同我講返點解最開頭係想請個男仔先……
經理：「你知呢度啦，班友仔又大聲又粗魯，我驚女仔唔慣，你應該聽個headhunter提過啦，唔係嫌你唔好，驚你唔鍾意啫，所以唔好介意。」
痴線！攰就伏低，悶就傾計，個個6點準時放工，呢啲工我鍾意呀，你唔請我就真係介意喇！