相信大家都知道interview大忌係講舊公司壞話，但原來一本通書唔可以讀到老，有個求職者早排上嚟見工，全程就係咁樣鬧舊老闆、舊公司、舊同事，大約鬧咗40分鐘啦！仲要夾雜唔少粗口：「不L知所謂，成日叫我哋唔好就啲客，人哋買幾多都冇折，一啲都唔識變通，守舊到PK！」
同個經理一齊sit in見咗陣，因為我有其他嘢做要出返去，心諗呢個求職者都凶多吉少㗎喇，點知再過多15分鐘，經理行出嚟同我講：「喂，原來個男仔係畀舊公司炒，佢哋最後仲搞到好唔愉快，上晒勞工處，遲啲唔知會唔會報埋《東張西望》添喎，你都見佢頭先幾激動啦！」
我收到嘅Resume冇提到被解僱，都好合理嘅，其實CV同Resume可以有少少留白，畢竟見工時face to face表達會更加好，但呢個男仔上嚟填form都冇寫到係被炒，我哋張application form有一欄係填past experience嘅離職原因，佢明明寫住Looking for new opportunities㗎喎！
我：「但係佢張form唔係咁填。」
經理：「唔緊要唔緊要，唔係要追究你或者追究佢，我決定咗請呢個男仔㗎喇，佢話1號返工冇問題，你一陣同佢整埋啲手續吖，佢唔想返工先簽約喎，想而家簽。」
我：「咁快決定？你今日仲有兩個人要見喎！同埋未做reference check，你之前唔係一定要等埋reference check結果㗎咩？」
其實我作為HR都好唔鍾意做reference check，因為真係有好多公司唔合作，變相我要三催四請咁樣求人哋公司，但呢位經理請人不嬲都要我做，今次咩事咁一反常態，仲要九秒九拍板呢？
經理：「我同你講吖，佢舊公司係我哋其中一個competitor，既然佢咁憎個舊老細，敵人嘅敵人即係我哋朋友，直頭係盟友添呀！」
我：「講係咁講啫！頭先你都見佢爆晒粗鬧舊公司，原來仲係畀人炒……」
經理：「嗱！我就係要呢團火，你都見佢幾憎舊公司㗎啦！過到嚟唔使鞭策都會撬晒啲客，人爭一口氣，佛爭一柱香，做Sales就係要有呢種復仇心態先會成功，你嗱嗱臨同佢搞咗份約先啦，費事佢喺度等，1號返工呀，記住喎！」
人爭一口氣，佛爭一柱香真係咁用㗎咩？點都好啦，個部門係你管，請完返嚟又係under你，最緊要呀經理滿意，我負責執行㗎啫！
請完呢個男仔返嚟係咪有團火燃燒呢？真係有呀！不過唔係咩復仇之火，而係經理嘅一肚火，個男仔返工第一個月已經累積10日 Sick Leave，咁講實會畀人鬧，病都唔可以請假咩！咁但係第一個月就請10日假會唔會太over呀？佢仲有3日no show喎！
No show點解釋我就冇問詳細，因為個男仔係同經理對口，但佢兩個就喺office炒咗鑊金，最後個經理決定解僱個男仔，反應算快㗎喇，起碼係試用期內第一個月，總算乾手淨腳，如果過咗一個月甚至過埋試用期，可能呢單嘢又要升級到勞工處跟進。
淨係知經理叫我準備解僱信嘅時候講咗句：「唔怪得佢之前畀人炒啦！」
妖！你話㗎嘛！敵人嘅敵人即係朋友吖嘛！經理仲叫我call返之前一個表現唔錯嘅candidate，人哋一早搵到新工啦！而家點呀？咪再出job ad請人囉！最終都係煩到我。