今日去interview，個HR問我上一份工點解辭職？
我：「拖糧，每個月都遲十日八日先出。」
HR：「有冇諗過你自己有咩問題，所以公司至會拖你糧？」
雖然係兩三秒間嘅事，但都稍為形容下自己當時心理變化，我第一個反應係愕然，你叫畀人拖糧嘅受害者反省？
其實我有猶豫過呢位HR係咪口快快講錯。
第二個反應係嬲，當時枱上面有杯水，有少少衝動都一嘢淋埋去，然後問返佢：「你有冇諗過自己有咩問題，所以我先會淋柒你？」
不過我好快已經冷靜落嚟，因為知道唔值得，所以我冷笑咗一聲，再問個HR拎返張reference letter。（我帶咗正本reference letter上去，佢一路in我一路逐張睇，佢問呢個白痴問題嗰陣正正拎住我其中一張reference letter。）
拎返自己啲嘢之後我就起身離開，聽到個HR問：「你去邊？未in完喎！」
落到樓唔知點解我已經冇嬲，仲覺得件事好好笑，名符其實先係嚇一跳，然後得啖笑，你咁嘅問題都問得出？呢份工唔見都唔使恨啦！
後來我都有同朋友講起件事，朋友叫我應該要淋柒佢，其實我係驚淋濕自己啲文件咋！
讀者投稿：Emilia