好多人都話見完工冇下文好灰，但我再灰啲，send咗起碼50份resume出去，直頭冇電話打嚟約我見工，呢種情況持續咗兩個半月有多，上星期終於否極泰來，有間公司嘅HR搵我interview！
當時距離見工仲有幾日時間，我特登去剪頭髮，想個樣望落乾淨啲，整齊啲，而除咗每日上網參考interview question之外，我亦開始落街跑步，雖然臨急抱佛腳（臨急去運動）幫唔到幾多，不過我希望自己嘅精神狀態好啲，始終褶咗喺屋企兩個幾月，唔知點解個樣有啲頹。
剪頭髮無可避免要洗錢，但染髮就自己染，慳得就慳啦！先前有啲color已經退色，乾脆染返全黑，想斯文啲。
講咗咁耐，去到見工嗰日……我唔知醒。
間公司喺九龍，我住屯門，Interview約10點，我10:00先醒，呢樣係最折磨，一係自認唔知醒，一係老作話塞車，不過真係太遲亦都太假喇。
其實冇工返嘅日子，我一般係8至9點就自然醒，呢次較晒鬧鐘反而醒唔到，有個朋友同我講，咁係因為我平時冇做開運動，而家突然連續幾日跑步，體力透支大咗，個人自然攰過之前，可能係咁先至會較晒鬧鐘都遲過平時起身。
好嬲自己，嬲咗幾日都無法釋懷，雖然有得去in唔代表實請，但send咁多resume得一份工有得見，我竟然唔知醒冇去interview，重點係平時咁早起身，見工先至搞啲咁嘅嘢。
我覺得自己好廢好冇用呀！