嗰次約咗11點見工，因為我本身待業，所以就同老豆老母飲埋茶先出發，眼見時間差唔多，準備埋單去interview之際，我電話響起，係嗰間公司嘅HR搵我：「Hello Marcus，唔好意思呀，一陣咪約咗你11點嘅，你過嚟嘅時候可唔可以順便幫我買啲嘢？」
唔知係咪以為我哋好熟？其實呢位HR只係約我時間interview嗰陣打過嚟一次，今次就係佢同我第二次交談，我連佢個樣都未見過，叫個三唔識七嘅人，仲要係求職者幫你買嘢？會唔會唐突咗啲呀？我當時諗係咪呃人，唔通見工騙案發展到要買點數卡？
我：「買咩？」就睇下你叫我買咩先至再決定去唔去見，坦白講，我有一刻估佢叫我幫手買M巾，可能因為做做下嘢嚟M唔方便，同事又冇得借啩！
HR：「麻煩你買包純萬吖！一陣會畀返錢你，唔該晒！」
我一時load唔到，因為冇諗過吖嘛，所以再問多次：「咩係純萬？」
HR：「煙呀，你求其去一間便利店同收銀講要包純萬就得㗎喇，唔該晒！」
我唔食煙，如果你直接講萬寶路我當然get到，但你一開始講「純萬」，我唔知都好正常，而且我冇諗過見工要幫你買煙囉！
我「哦」咗一聲就收線，其實當時思路有啲複雜，始終send咗好多份CV出去，真係打嚟約interview得呢份，如果我惡言相向一句落閘，所有期待同希望都似乎會落空，但係interview搞到要幫個HR買煙……又的確係講唔通。
老豆老母見我面色唔同晒，隨即問我咩事，我亦講咗畀佢哋聽，老母反應好大：「痴線！咩公司嚟㗎？見工叫人買煙，不知所謂！」
老豆就冷靜啲：「係咪呃人㗎？不過又冇理由呃你一包煙咁少吖！可能真係冇煙又唔方便落街買，你記住問佢收返錢喎！」
老母叫我唔好去in，老豆話一試無妨，因為買包煙唔係乜嘢大錢。
我唔知相同嘅事如果發生喺大家身上，有冇人真係會幫個HR去買包純萬，大前提係份工未見成，所以稱唔上係幫同事買，而家係幫緊陌生人買，我反而唔係concern一包煙嘅價值，我著眼嘅Point係～～～究竟係咩垃圾HR同垃圾公司，會叫個candidate見工前幫手買煙，呢間嘢好似唔對路喎！
而結果我係有買……幾廿蚊啫，我前一晚用咗好多時間上網睇見工資料，又走去study嗰啲熱門interview question，為咗今次interview真係落足心機，何況我待業三個月喇，手上又冇其他面試邀約，差一步行埋佢啦！結果我真係去咗7仔買純萬。
上到去，form都唔使填，HR直接叫我入房，喂！個HR幾靚女㗎喎，廿幾歲妹妹咁大煙癮？
HR：「唔好意思，無端端叫你買煙，包純萬呢？」你唔係煙癮大到想一路in一路食煙呀？
我喺褲袋拎包純萬出嚟遞畀佢，HR連隨喺meeting room打內線：「喂，人哋幫你買咗喇，入嚟攞啦！」
唔使10秒就有個男人走入meeting room，佢當時手上已經拎住錢，連聲多謝畀錢我然後拎煙，個男人仲叫我同HR傾住先，佢出一出去。
HR：「嗰個係我哋老細，佢chur完煙會入嚟㗎喇，我同你見住先。」
哦！唔係靚女HR食煙，係個老細指示佢嗌個求職者買煙……但都係不知所謂啦！
當時我對呢間公司嘅印象分真係麻麻，不過HR喺interivew嘅時候又的確有紋有路，然後我哋傾咗大約10分鐘，個老細又走返入房，好明顯聞到好大陣煙味，我估佢最少食咗兩支煙先返入嚟。
老細：「Sorry，因為公司附近行出去買煙都比較遠，最近嗰間便利店都要行10分鐘，報攤啲煙我唔信，有朋友買過假煙……」結果呢位老細係咁解釋佢點解搵我幫手買煙，佢仲分享咗有次嗌外賣，remark叫個外賣速遞員幫手買煙，寫埋會畀20蚊tips，點知人哋冇show佢，唔知係睇唔到定係唔想幫……究竟呢個老細為食煙可以去到幾盡？
我唔知幫手買煙同見工兩件事有冇直接關係，最終間公司請咗我，仲要係同日已經收到HR打嚟confirm offer，咁我有冇做？
🙈🙈有呀🤣🤣好在有咋！因為我send咗咁多CV出去，得呢份有回音，其他係見都冇得見，我根本就冇其他選擇。
而家偶爾都會幫老細買純萬，唔多嘅，一個月可能一兩次，因為有時佢都會嗌其他同事買，原來佢老婆唔畀佢食煙，所以佢平時個身盡量唔袋住，加上畀老婆mark實，好少自己去買，好心佢就戒煙啦！
好想問下其他人，如果interview前收到電話要求你幫手買包煙，你仲會唔會去見呢份工呢？