上星期去見一份工，見完個HR之後，對方就安排我即刻in埋第二round見個team head，心諗咁梗係正啦，一次過搞掂晒唔使煩，又唔使再請多一日假上嚟interview，得就得，唔得就唔得，作為求職者最想快靚正。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。（其他人士或專頁如在Facebook按「share」原文，則不在此限。）
Team head係個男人，初時佢行入房其實cool cool地，一坐低又叫我介紹多一次自己，仲強調係用英文，咁當然冇問題啦，呢啲程序都已經預咗，但係我Self-introduction只係幾句之後，個team head就打斷咗我。
「你做緊XXX公司㗎？而家仲做緊喎！」sorry，我唔開current嘅公司名喇！
我：「係呀，仲做緊，今日都係請假嚟見工。」
「咁呀偉哥仲喺唔喺度呀？」
我：「偉哥？」
「David呀，我好少叫佢英文名㗎！我哋識咗好耐，叫慣咗偉哥！」
我：「哦！David係我阿頭……」大鑊喇，世界真細小小小。
「偉哥係你直屬上司呀？唔怪得啦，我見你份履歷都靚靚仔仔，我講份履歷呀，唔係講你，哈哈！講笑講笑！你都靚仔！」
唔好笑囉好冇！個team head見我冇出聲就繼續自己講嘢。
「我同偉哥識咗十幾年喇，2010年？我記得好似係，嗰陣我哋喺另一間公司，偉哥仲未升上神枱，佢係senior，好睇啲後輩，教識我好多嘢㗎！所以我當佢係恩師，算係帶住我出身！」
你識個偉哥同我識嘅David究竟係咪同一個人？還是十年人事幾番新？我直屬上司如果係好人，我都唔使搵工跳槽啦！不過咁，每個人嘅位置都唔同，呢個team head話識咗David十幾年，當時又唔係上司下屬關係，相處方式同埋工作衝突係唔一樣嘅。
「偉哥有冇帶你去開會？」
我：「哦，我哋成日都出去同客開會㗎！」
「唔係呢啲會呀，茶舞晚會呀！早會都有！早場平好多！嗰陣時佢成日拉大隊帶我哋去！」
嘩！咩年代呀！而家仲興呢啲嘢㗎咩？我平時識嘅David係正人君子嚟㗎喎！
我：「冇呀，冇呢啲……」
「咁你就走寶喇，可能佢而家年紀大咗唔玩呢啲，嘩！以前幾開心呀！偉哥仲好有guts，你有冇見過佢鬧客？有次同佢去client visit，個客遲咗30分鐘先入房，佢即刻反枱走……（下刪1000字）」
成個interview都冇再進行落去，全程聽呢位team head想當年，憶述佢以前同David點樣闖蕩江湖，由夜場講到職場，講講下職場又唔知點解講返夜場。
就係咁樣過咗40分鐘，個team head以呢句作結：「差啲唔記得有個會要開，真會，唔係茶舞嗰啲，哈哈！我叫返HR入嚟，你等陣。」
咁即係點呀？大家見工成日話最怕聽到「有消息通知你」，而家個team head講嗰句仲衰，成程interview又冇講任何工作嘅嘢，又冇問我嘢，然後隔咗兩三分鐘個HR就入嚟喇，佢仲好笑，劈頭第一句問返我：「點呀？有冇話O唔OK？你哋傾成點？」
我：「佢冇講咩喎，冇講O唔OK。」
你冇嘢呀？你係HR，個team head係你同事，我第一次上嚟咋喎，我求職者嚟㗎！O唔OK？請唔請我？傾成點？你唔係應該直接同個team head交流咩？你問返我？
不過我想講成件事最惡夢嘅位唔係見完工等如冇見，而係我第二日返自己本身份工嗰陣，我發覺David（即係偉哥）嘅態度唔同咗。
David嗰幾日對我嘅態度已經特別差，佢有份嘢明明叫我下星期交，無啦啦走嚟追我，仲當眾大大聲斥責：「叫你下個星期交你就真係一啲都唔做？少少嘢都有得睇住先啩！你諗住下星期磨到最後一刻先畀我呀？」
就連身邊啲同事都問我咩事，佢哋話David好少咁樣話人，似乎係我某方面引起咗David不滿。
我諗我知道係咩事啦，因為幾日後開會又有說話聽……
嗰次開會唔記得咗傾緊啲咩，David講咗句：「Loyalty！我哋要令到啲客有loyalty，好似我哋對公司咁，最緊要係咩呀？Loyalty！」講呢番說話時，David淨係望住我，再加多句：「即係忠誠度呀！你哋有冇？」
連其他同事都睇得出故意向我強調，我估自己應該冇feel錯啦！
雖然David一直冇提我去見工嘅事，不過傻嘅都知道佢應該收到風。
最慘係去見嗰份工完全冇回音，你唔請唔緊要吖，你唔好同我現任上司講吖嘛！嗰位team head同埋David冇表明啫，但係咁大變化都知咩事啦，有冇道德㗎！
而家我喺公司真係度日如年，已經兩個幾星期喇，David仲係處處針對我，其實去見工根本係好平常嘅事，唔使咁呀？唔通我哋將來求職要調查好晒人物關係圖先去咩！