返緊工嗰陣老豆打電話嚟：「阿女，你喺公司係咪負責請人？剛叔個仔想搵嘢做，你幫下佢吖！」
我：「邊個剛叔？」
「以前做中港車啲舊同事呀！你唔記得嗱？嚟過我哋屋企食飯㗎！剛叔個仔年幾兩年搵唔到工，你話得事㗎嘛！」
冇印象邊個係剛叔，人哋個仔做開咩工佢又唔知，成日下巴輕輕答應人，老豆要威要有義氣，都冇理由要我夾硬請個人返公司吖！礙於要畀面老豆，焗住打去佢提供嘅電話號碼，跟住就精彩喇！
剛叔個仔唔係年幾兩年冇做嘢，係幾年冇做嘢呀！開始嘅時候話自己醉駕坐監，講多幾句原來係無牌駕駛再撞傷人（不過都可能係醉住咁無牌駕駛，我費事問……），呀剛叔個仔仲要求3萬人工，問可唔可以返中更？即係中午先開工，原因係冇咁早起身！
而其實未坐監之前，剛叔個仔又做咩㗎呢？佢淨係答咗我兩個字－－－睇場。
唔緊要啦！都冇諗住請佢，話之佢睇足球場定羽毛球場，然後老豆仲係咁打嚟問我請咗未？
我：「冇請！」
「有冇搞錯呀！我應承咗人㗎！」
做女嘅我真係唔想鬧老豆，何況又喺公司呢，唔方便咁燥底，唯有打畀阿媽告狀，話老豆迫我請個唔知咩人嘅仔，再吹大啲話老闆而家詐我型，阿媽聽完仲講畀阿哥聽，佢兩個已經幫我鬧到老豆狗血淋頭！