上星期五見咗份工，兩個字講晒：有料！
傾完一大輪，過程正常，去到後尾佢語氣似係準備請我，爭咗未出口話 confirm offer，然後in我嗰條友忽然話：「我哋呢度係員工自己買電腦，因為你知而家呢個世代，人人用電腦嘅喜好都唔同，有啲鍾意用Apple、有啲鍾意用聯想、有啲鍾意用Dell，我自己就用Microsoft Surface嘅。」
心諗你冇嘢呀？電腦都冇你哋學人開公司？要員工自己買電腦？
可能條友見我個樣充滿疑問，好快佢又接住講落去：「不過唔使擔心，公司會負責畀錢，budget係$15,000之內，如果超過呢個數你就要自己畀差價，即係假設你睇中部腦係$10,000嘅，咁冇問題啦，公司全額資助，如果係$18,000，咁公司就畀$15,000，另外嗰$3,000就係你自己負責。」
我：「哦……咁又合理啲。」其實連電腦都冇提供畀員工，我覺得點講都唔合理，不過當時畀佢呢個所謂嘅公司措施嚇一嚇，係咁易都要講啲嘢，點知更驚嚇嘅policy係未講完。
「咁公司就會分兩年去畀返啲錢你。」
我：「兩年？」真心唔明。
「係呀！舉個例，你買咗部$14,000嘅Mac機，兩年就即係每個月畀返$583你。」
當時已經覺得不知所謂，但我想繼續聽笑話，所以都問返對方一句：「咁如果我期間辭職唔做呢？係咪一次過畀埋尾數我？」
「Good question! 如果員工兩年內唔做，咁公司就唔會再出呢筆錢，會停咗個分期。」
你可能會問，咁過份點解唔嬲或者拍枱走？唔係呀！個原因係你根本冇心理準備，點會去interview然後間公司話唔提供電腦，叫員工自己買，呢頭話分期畀返你，嗰頭又話兩年內走會唔負責，成件事係震撼我嘅思維，消化都要時間。
而事實證明我太天真喇，條友仲有最重要嘅一句未講。
「咁兩年後呢，部電腦就歸公司，好正常吖係咪先？因為兩年後公司分期畀晒你，即係供完㗎啦嘛！」
有料！有料！即刻講咗句份工唔適合我就起身走人，喂你唔好嘥我時間啦！後來我喺度諗，即係點？你公司請人係咪想搵人幫手免息分期買電腦？