英雄救美被錯愛 贏得女同事青睞

有個女同事叫Sharon,佢早排忽然對我好好,真係突然之間,我哋共事咗兩年有多喇,每日只會同對方講4隻字,就係「早晨」同埋「Bye Bye」,因為Sharon係receptionist,我同佢喺工作上唯一嘅重疊點就係朝早返工入門口say morning,同埋放工走嘅時候say good bye!

由於工作性質比較貼近CS,所以office hour 6點鐘過咗就會停止工作,大家唔會再接電話,放工十分準時。雖然冇明文規定,不過Sharon一般最遲走,好似話係Admin個阿姐覺得佢冇嘢做,特登order佢熄燈鎖門,而其實公司有好幾位同事都有鎖匙,包括我。本來相安無事,直至某日放完長假返公司,我見到Sharon畀老細鬧到喊。

嗰朝我踏入公司門口已經見到老細扯晒火,原來佢鬧Sharon喺長假期前冇熄燈同埋冇熄冷氣,話咁樣好嘥電同埋嘥錢。究竟連續三日開燈開冷氣會用咗公司幾多電費呢?呢樣我真係冇頭緒,不過當時冇一個同事敢插嘴,我見Sharon喊得咁淒涼,所以就做「炸兩」行埋去幫口。

我:「下次我都幫幫眼睇下有冇熄燈熄冷氣啦,Sharon冇心嘅,唔通特登咁樣開晒啲電咩!佢下次會記得㗎喇!」

「下次下次!電費唔係你哋交吖嘛!」老細連我都鬧埋。

我:「其他同事都有責任嘅,不過講咗正經嘢先,上星期有個客問可唔可以waive咗個檢查費,我唔敢決定呀,問咗你先。」其實我係想轉移話題,等老細唔使再企喺reception度係咁鬧鬧鬧。

冇諗過經過呢次之後,Sharon就忽然對我好好,朝早買早餐請我食,耐唔耐又會喺tea time請我飲啡或者珍珠奶茶,而且做到好出面,搞到全office都知Sharon對我咁好,公司又多低能仔呢!個個好似小學生咁傳我哋拍拖,拎我哋開玩笑,講埋啲咩「幾時結婚呀?」又得閒無事喺我面前叫Sharon做阿嫂,妖!仲細咩!玩一次就夠啦!日日重複真係好煩。

Sharon都係一樣,想多謝我幫佢解圍,請食tea已經夠晒啦!搞咩三日唔埋兩日放個早餐喺我枱面,有時又拎啲零食同朱古力畀我,over咗喇!明知其他同事咁多口,呢啲令人誤會嘅行為可免則免吖嘛!

情況愈嚟愈失控,Sharon問埋我拎WhatApp,因為之前唔熟,所以佢係冇我電話,雖然一場同事要知應該唔難,但Sharon就選擇直接問我,仲要每晚都send msg嚟,成日send佢屋企隻貓啲相同片畀我睇,Diu!你養貓關我Q事咩!不過我都會禮貌地畀下心或者講「好得意」。

我feel到佢對我有啲嘢,亦知佢動情個位係上次我引開老細,令佢不致繼續被鬧,咁但係我對佢真係冇意思吖嘛!然後Sharon就直接約我去街喇,我已經推咗8至9次,推得多加上係同事又唔好意思,始終佢係女仔都做晒主動,結果我應承放工一齊食餐飯,想借呢次機會同佢講清楚。

我:「你唔好再買早餐畀我喇,因為我通常喺屋企食埋先返,而且班同事好多口㗎!」喺餐廳坐低,我menu都未睇就講重點。

「唔使理佢哋點講啦!你唔鍾意我買早餐,一係下次帶lunch box畀你吖!早一晚整定之嘛,想唔想試我手勢?」

我:「吓!唔好啦!我都唔興帶飯,每日就係等lunch time出去行下抖氣,唔會想留喺office叮飯囉!」

「咁一係聽日約你食lunch吖,喺度做咗咁耐又真係冇試過同你食lunch喎!」

我:「其實你係咪想多謝我上次引開老細啫?得㗎喇,呢啲嘢心領,同事梗係你幫下我,我幫下你㗎啦!唔係呀,班友仔傳我哋拍拖,有時講啲說話好難聽㗎!我係男仔冇所謂,你係女仔,費事啦!」

「咁你有冇諗過我哋真係可以一齊吖?到時咪唔係傳囉!」

講到咁白?

我:「唔好玩啦,我唔會同公司同事拍拖㗎,呢度食唔好呢度屙吖嘛!」

「咩食咩屙啫!你當我大便咩!再唔係我可以轉工喎!反正上次畀老細鬧完都唔係幾開心,有朋友介紹我去佢公司,又係做receptionist,人工差唔多……」

有件事我一直瞞住Sharon,如果講出嚟應該可以制止佢對我嘅錯愛,不過真係講唔出口,當晚我選擇支吾以對迴避,所以截至投稿嘅呢一日為止,Sharon仍然有買珍珠奶茶擺喺我枱面,班同事仍然傳緊佢係「阿嫂」,其實……

嗰次office長假期冇熄燈冇熄冷氣係關我事,話說假期前一日,我放工約咗朋友喺公司附近食晚飯,期間發現自己漏咗揪屋企鎖匙,見咁近梗係返office拎啦,返到去我hea咗陣,因為喺ebay bid緊嘢,睇中件貨就快夠鐘,咁咪開一開冷氣bid埋先囉,唔通焗死自己咩!

可能慣咗平時放工直接走,我第二日醒起自己好似冇熄返燈同埋冇熄冷氣,又唔係好肯定,是L但啦!我住新界,公司港島,冇理由返去檢查吖!跟住星期一返到office就見到老細捉住Sharon鬧喇。

你估我真係咁有正義感,走去幫Sharon解圍咩!好衰唔衰佢又覺得我英雄救美,後來就搞成咁。

係呀!其實Sharon放假前係熄晒所有嘢先走,公司長假期開足幾日冷氣,我先係始作俑者🙈

error: