想講講我舊老細Samson，其實比較習慣叫佢盧生，好多年前喺佢間Trading公司打工，賣電話配件去日本同歐美為主，可能公司細細而且長期得8至9個員工，所以呢個老細係冇乜架子，亦能夠同同事打成一片，後來輾轉換過兩份工作，雖然彼此關係疏離咗，但過時過節都會互send祝福短訊，印象中亦出嚟食過兩三次飯。
半年前盧生主動約我，出到嚟閒話家常，佢講下自己兩個女，我講下工作方面嘅煩惱，後來我提到而家做緊嗰間公司請跟單，係臨時職位，用嚟頂一位生BB嘅同事，由於合約期太短，HR想問咗內部同事有冇介紹先，真係冇就出招聘廣告，所以我逢人都問，加上呢個position係直接under我，少咗個人幫手之後已經踢晒腳，有啲下屬要做埋大肚同事嗰份，開始feel到佢哋有怨言。
冇諗過盧生竟然問：「我可唔可以apply呀？短期職位都得喎。」
換轉係你，相信反應都會同我一樣：「點請得起你呀盧生，咪玩啦！」
盧生好認真同我講：「其實今次約你出嚟，本身都想問下你有冇好路數，我公司做唔住喇，你知今年咩環境啦，不過你放心，我唔係問你借錢，唔想日日吽喺屋企啫，老婆同兩個女都擔心我。早幾日我有搵過大吉同阿米佢哋（另外兩位Trading公司舊同事），但佢兩個而家份工都唔穩陣，我就冇同佢哋透露太多喇，始終自己公司執笠都唔想唱通街。」
我：「認真㗎盧生？」
「唔通我咒自己公司執笠嚟同你開玩笑咩！頭先你講嗰份跟單，係咪唔請男人？」
我：「唔係唔係，因為之前冇聽你講，我仲未接受到Trading公司冇咗呢個消息。」
「咁我好認真問下，有冇可能請我？臨時工真係ok。」
我：「呢個短期position嘅月薪budget得22000蚊，我唔好意思呀！」
「有咩唔好意思，22000好好喇，不過我明白你嘅難處，突然請個阿伯返去都要同你公司交代，唔得唔好勉強。你問我，我認真想做，但煩到你，就唔好喇。」
出於對呢位舊老細嘅恩情，所以我冇拒絕，而家間公司亦好易話為，畢竟只係臨時職位，我肯請盧生，其實HR仲開心，因為唔使佢哋再搵人，我心裡面最大嘅顧慮只係～～～請我舊老細做下屬？呢件事好難形容。
遵守承諾，叫咗盧生返工，佢仲要坐我前面個位，昔日大家嘅角色同位置交換咗，雖然我只係佢上司，唔係佢老細，但感覺依然好奇怪，幾個同事都投以奇異目光甚至私下問我：「點解會請個伯伯返嚟嘅？」
而我盡量會將工作一次過畀盧生，因為唔慣成日吩咐佢做嘢，我想盡量簡化。某日朝早，我要同盧生交代有張單要點樣拆開嚟出：「盧生，同你講下呢個客先，佢有特別要求，好鬼死麻煩。」
「叫我Samson啦！其他同事聽到你叫個下屬做盧生，一定會覺得好奇怪。」
我：「我……哈哈，唔慣呀，因為我真係好尊重你。」
「傻啦，而家係你畀工作機會我，你亦真係我上司，唔使唔好意思㗎，如果我做錯嘢即管鬧，公還公，私還私。」
我：「好佩服你，真心，要你屈就喺度做跟單，我唔好意思。」
盧生：「唔好咁講啦，我以前嗰間只係細公司，成間公司都唔夠你而家一個部門咁多人，你唔想我難堪，更加要叫我Samson。」
我：「好，冇問題，Samson，等我講下呢個麻煩客想點樣分兩張單出。」
（上集完，下集待續）
投稿讀者：Rai
📣 即睇下集 👉 https://hkofficedaily.com/?p=15235