本身大把錢，打風流工嘅故事之前喺你個page已經睇過幾次，但係我呢個舊同事就有啲唔同，應該係話特別有型，與此同時，亦反映咗我公司嘅制度好死板，一啲都唔識變通。呢件事要由7月開始講起，嗰陣嚟咗個新嘅女同事叫Mandy，職位係文員，條女都幾癲㗎，第一日返工就遲到一個鐘。
就係因為成日遲到呢個問題，Mandy做咗應該唔夠一個月已經畀人炒，公司方面就話當時仲未整個autopay，加上第一個月點都係出票（我當年入職都一樣），咁就安排時間叫Mandy返嚟拎票啦，不過條女竟然喺電話同HR講：「唔使出啦！」點解唔係即場畀票而係電話通知呢？講埋落去你就會明。
其實Mandy返工頭幾日同我哋出去食飯，已經feel到佢嫌三嫌四，好唔滿意office附近幾間茶餐廳，又話污糟，又話唔好食，第4日佢直頭自己去食，後來有一次佢可能太悶，私底下叫我一齊去，咁我都冇乜所謂嘅，點知Mandy提議去公司過兩條街一間酒店食商務午餐，$850蚊一位……食lunch啫！唔使呀？
Mandy：「得啦！叫得你去，我請你！」
佢敢請，我梗係敢食啦！條女仲要另外叫兩杯酒，睇住埋單超過$2000，好癲！
我一早知Mandy月薪係15,000，咁除返開30日，即係日薪$500，你食個lunch就用咗5日人工，真係太誇張喇！咁都未算，Mandy原來係日日揸車返工，雖然我唔識車，但都知泊停車場再加埋啲油錢唔慌平，公司唔止佢一個有車，不過其他同事就講過唔揸返工係因為泊大半日好貴，而Mandy完全冇將呢啲錢放入眼內。
有一次Mandy仲話自己有潔癖（其實我唔覺，佢咁講我咁聽啦！），Mandy自言唔鍾意請外傭，話唔想有個外人留喺佢屋企瞓喎，所以返呢份工之後就搵咗個鐘點，每日會去佢屋企清潔同埋煮定晚飯，呢度幾千蚊一個月喎！究竟你係真潔癖定間屋長期多塵呀？
基於以上嘅種種事例，我試過好直接咁問佢：「你仲返工做乜？呢種模式根本係倒蝕，我係你就留喺屋企瞓覺煲劇，再唔係周圍high tea好過啦！份糧都唔夠cover泊車、油錢、請鐘點，你擺明就唔等錢使，好傻喎！」
Mandy：「因為老公覺得我唔返工會洗好多錢，所以叫我求其搵份clerk，咁又真係洗少咗好多嘅，如果唔係嚟咗呢間公司，困住咗我啲時間，呢個月我應該買咗兩個袋喇！」
哦！原來返工唔係為賺錢，而係為慳錢，明白晒！新境界！
冇壓力就自然冇動力，何況Mandy又身嬌肉貴唔志在，所以佢每個星期梗有兩三日係遲到，其實一個星期都係得5個工作日之嘛……
佢話唔知醒，同埋有時Mandy都遲得幾離譜，我哋返9點，佢就返11點，卒之未夠一個月就畀人炒，仲要係電話炒，因為嗰朝佢又唔知醒，阿頭都費事理佢，指示人事部直接打去話解僱，順便叫Mandy返公司拎支票，嗰陣仲未搞好autopay出糧，據聞Mandy好瀟灑咁話：「唔緊要啦！唔使出畀我喇。」
公司冇可能唔出糧啦！犯法㗎！結果人事部「求」佢返嚟拎，聽阿頭講，已經打咗好多次畀Mandy，但佢都係懶懶閒唔返，最癲係叫人事部捐咗佢！
最終嘅解決方法就係寄cheque畀Mandy，問題又嚟喇，而家過咗3個月，會計部話Mandy仲未入張票……
我覺得公司呢下係抵鬧，Mandy有型係佢嘅事，不過呢啲情況就唔好講咩傳統制度啦！又寄票，又等人入票，簡單事情複雜化，根本一早應該主動入數畀Mandy，再唔係會計部拎住張票幫佢入去啲存票機囉！而家半天吊咁，你話幾麻煩呢！
