聯群結黨上同事屋企打邊爐，其實之前已經去過幾次，但最近呢次就遇著有人上門追數，以為係爭財仔，原來係欠租，對方兩男一女，話我同事已經冇交租3個月，而最奇怪係我同事仲惡過佢哋。
雖然同事幾分鐘就打發咗嗰兩男一女，不過我哋幾個多少有啲嚇親，同埋睇住你畀人追租有啲尷尬囉！
我：「房署夜晚都會搵人上門追租㗎咩？」
同事：「唔係房署，呢間公屋係頭先個女人租畀我，另外嗰兩條仔我都係第一次見，應該係傍住壯膽啩！唔使理！」
原來同事之前上網搵到呢個「暗盤」，間公屋本來係千幾蚊租，但個戶主就以6千蚊暗盤價放租（租上租），即係頭先條女濫用公屋資源，有需要嘅人好多年都輪唔到公屋，佢就用嚟賺錢，呢啲咪自私精囉！點知我同事都係一個無賴，交咗兩個月租之後就強迫人減到4千，如果唔肯就一直唔交，雙方僵持咗3個月，同事已經3個月冇交租。
最癲係我同事自己換咗鎖，亦唔驚個女戶主搵人再換鎖或者搞大件事，因為佢講明有咩事會向房署舉報，實行一鑊熟。
同事：「睇下邊個驚啲囉！佢出租公屋係犯法，沒收單位就梗㗎喇，隨時監都有得佢坐，夠膽就破門搞我，再唔係淋埋紅油，間屋佢嘅，一陣畀鄰居知道仲隨時舉報，而家我冇話唔交，係6千蚊太貴，佢肯收4千我即刻交返租。」
兩個都咁衰，呢啲係咪叫黑吃黑？其實諗諗下又有道理，戶主喺犯法情況下出租公屋單位，個租客就算刻意唔交租甚至破壞間屋，戶主自己犯緊法都唔敢大聲嘈，PK遇正無賴，呢場戲精彩。
不過我唔敢再上呢位同事屋企打邊爐喇，費事有不必要嘅麻煩，唔知最終屈唔屈到個戶主減租呢？