呢單嘢真係搞著公司個pantry lady，不過我撐發脾氣嘅Samuel……
上星期同事Samuel喺pantry叮飯，啱啱喺微波爐拎緊個飯盒出嚟嘅時候，有個同事阿俊無啦啦喺佢後面大聲「嘩」咗一下，然後Samuel嚇到彈起，成個飯盒跌咗，飯菜亦散落一地。
不如我補充少少先，呢個阿俊無厘頭大叫嚇人已經唔止一次，似足嗰啲低B網紅整蠱人嘅橋段一樣，然後阿俊見人嚇到彈起仲會大笑，今次亦唔例外，我當時都喺pantry食緊嘢，一樣有嚇親。
成個飯盒跌落地冇得食，Samuel無名火起，執起個lunch box一嘢飛埋去阿俊個頭度，血就冇流喇，不過飯盒跌完始終仲有少少餸汁同幾條菜，而且Samuel飛埋去嘅力度都好大，只見阿俊按住自己額頭話好痛，膊頭有條菜心，件白恤衫就啡咗一撻染晒肉汁，頭髮都有汁滴緊。
估唔到阿俊仲好意思講：「使唔使咁呀？」
Samuel嘅眼神好似想殺人咁，回應咗句粗口就走咗，最難為係pantry lady要善後。
嗰日頂癮呀，阿俊請咗半日假，因為成頭成身都係餸汁，佢話要返屋企沖涼換衫。
而家Samuel同阿俊喺office互相當對方透明，對我嚟講，Samuel嬲係可以理解，咁阿俊又嬲咩呢？佢話Samuel唔玩得喎，又話個飯盒飛埋嚟差少少整盲隻眼，喂，咁即係雙重標準啫，你嚇人就得，人哋飛個飯盒去你個頭度又唔得，你咪一樣唔玩得！