其實我做錯咩呢？
我遞信之後，公司隔兩個星期就請咗人，我亦順理成章要同呢位新人交接，教佢做嘢之類。不過新人返咗幾日就意識到唔對路，因為呢個position好似兩個人做緊三個人嘅嘢，所以佢亦問我應唔應該繼續做落去。
當然我冇畀到一啲Yes or No嘅肯定答案，只係將實情告知，包括呢個position本身真係有三個人做，但一年前走第一個，公司冇請返，結果就兩個人做三個人嘅嘢，半年過後，第二個都走埋，公司依然冇補充人手，所以我呢半年就係一個人做三個人嘅工作。
「如果唔係連我都遞埋信，老細未必會咁快請人，你嚟緊會變返一個人頂三個人嘅workload，或者你自己考慮下啦！」
新人聽完之後即日話唔做，臨放工老細捉咗我入房鬧：「新同事返幾日就辭職，你開心啦！」
老細話我講公司壞話嚇到新人閃電辭職，又話忙同埋唔忙，易做定係難做，全部係個人主觀感受，每個人接受程度唔一樣，我唔應該咁多口向新同事畀意見。
我都係有嗰句講嗰句啫，又冇加鹽加醋。