每個星期五六日，Sarah都會叫我出去食飯，大部分時間係dinner，只係偶爾一兩次食lunch，最重要係次次都食得好豪，有一段時間我覺得就算冇人工都制，因為Sarah同我去嘅地方真係太離地，我肯定自己將來搵到錢都唔捨得去，想唔想聽下我哋食過邊幾間？
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
有一次去Ritz Carlton食Tosca di Angelo，印象中好似食咗5千幾蚊，個侍應臨尾拎甜品嚟嘅時候，我非常大鄉里咁問：「甜品？係咪上錯？頭先你哋上咗甜品喇！」
侍應：「頭先嗰個係Pre Dessert，呢個係Dessert，請慢慢享用。」
因為我對食不嬲唔講究，完全唔知佢講乜同埋唔明白個用意，甜品就甜品，一般最後上，但你甜品之前仲有個Pre甜品？咩概念呀？咁我頭先食牛扒點解會冇Pre牛扒？上意粉之前又點解冇Pre意粉？當然我冇講出口啦，高級嘢我都知講究㗎喇！
我哋又食過一間叫Yonjugo嘅日本嘢，呢間最後4千幾銀埋單，其實你數得出嘅香港大名餐廳例如萬豪金殿、Fortnum & Mason、Arbor、CIAK……等等全部去勻，連帶依附住五星級酒店嘅食府同扒房亦通通食過晒。
覺得啲餐廳名好熟口面，好似唔知咩雜誌網站介紹過，係咪抄出嚟？冇錯呀，因為Sarah正正係跟住呢啲指引同推介去食，但佢係唔會帶你去食澳牛，印象中每餐都係幾千銀落樓，少過二千已經算平喇，印象中好似未試過埋單平過二千。
我：「其實你唔一定要次次同我食咁貴喎，去茶記都得㗎！你都係想有人陪你食飯啫！」
Sarah：「我同你去嗰啲餐廳都有個共通點，就係一個人去食會好怪，我試過一個人去文華東方間The Aubrey食，周圍啲人唔係成雙成對，就係幾個朋友或者一家大細，自己入去由坐低嗰一刻開始已經好唔聚財，好多人會覺得你係孤獨精，個感覺好可憐，但我真係好想試呢啲餐廳吖嘛！」
每個人對「孤獨」兩個字都有唔同嘅感覺同詮釋，如果換轉係我，真係完全唔介意一個人去食，高級餐廳又使乜驚喎，與其驚其他人嘅目光，不如驚冇錢埋單仲好啦！
我身邊其實都有啲人好似Sarah一樣唔悶得，不過就冇Sarah咁「極致」，亦都冇Sarah咁有財力。
我：「係呢？你有冇拍拖呀？如果你唔想答可以唔答㗎！」
Sarah：「我唔鍾意拍拖，自從上次遇到個渣男之後就對拍拖冇晒信心，個個男人都賤格，睇實你男朋友呀！呢個世界冇唔食魚嘅貓，唔好信晒佢講嘢，做女人要識得保護自己，我哋冇男人都一樣得。」
我唔係冇興趣知，只係好幾次講到感情問題，Sarah就一味炮轟啲男人，愈講愈激動，我從說話中大約知道佢前男友偷食，仲有借咗佢錢唔還，但太深入嘅嘢就永遠點到即止，唔肯定係Sarah唔想講，抑或覺得我同佢之間始終係賓主關係，冇必要將私人事講得太deep。
Sarah要我小心啲男人，同埋覺得全世界男人都賤格嘅言論，我並冇同男友提及過，費事啦，我男友本身已經好唔鍾意Sarah，佢覺得要用$12,000請人陪食飯好怪，仲話一個人冇拖拍可以賴緣份同命運，但係連朋友都冇就肯定性格有問題。
男朋友：「曹操都有知心友啦！再難頂嘅人都會有朋友。」
我：「我咪佢個知心友囉！」
男朋友：「用錢請返嚟都叫朋友？話時話，呢個Sarah係咪鍾意女人㗎？」
Sarah應該唔係鍾意女人，至少佢肯定唔係鍾意我先，因為職業飯腳呢份工愈返得耐，我就愈睇得清楚Sarah有咩問題，有次我唔舒服想「請假」……自己講完都想笑，職業飯腳陪食飯都走去請假，但真係冇辦法，嗰日我發冷，凌晨同朝早分別嘔咗一次，狀態極差，企都企唔穩。
我好早就WhatsApp Sarah「請假」，佢第一時間係咁覆：「吓！咁點呀？今晚間餐廳我3個月前book㗎，呢間嘢好full，再約又要等幾個月㗎喇！」好想叫佢搵其他friend去，但佢似乎冇其他friend。
又咁講，老闆唔係奉旨要關心員工嘅，呢一點我明白，但Sarah竟然因為呢一次請假而keep住畀說話我聽：「你一定唔係病，你係陪男友去街啫係咪？」
我：「唔係呀，我真係好唔舒服㗎，我屋企人半夜差啲call白車。」
Sarah冷笑，佢真係冷笑：「得啦，知道嘅，女仔都係拍拖大過天，但你下次早啲講吖嘛，間餐廳好難book㗎，而家又要online重新book過。」
呢度我睇到幾個問題，Sarah疑心好重，唔相信人，而且佢唔係太care身邊人，佢只係care自己。
又有一次我遲咗5分鐘到達餐廳，因為我跟住個map搵路好亂，Sarah約嘅地方係蘭桂坊再上斜嗰堆大廈，未去過真係會好陌生，而我其實做佢職業飯腳咁耐以嚟只係遲過一次，其餘時間都係我到先，但Sarah仍然接受唔到，仲要咁講：「你知唔知我一個人企喺度等好戇居㗎，又費事上去自己坐。」
究竟Sarah有幾介意一個人坐？又有幾介意別人嘅眼光？我用實際情況話畀你知，同一晚我就畀佢兜口兜面話咗幾句。
Sarah：「喂，你講下嘢吖，我咪話咗出嚟食飯唔好有悶場囉，而家好似你有你食，我有我食，冇交流好怪㗎！你睇下隔籬枱，有講有笑。」
我敢保證，自己每次食飯已經不斷搵話題，佢講咩我都會接落去，但你冇可能做到每一分鐘都講緊嘢，就算朋友、男朋友，或者屋企人出嚟食飯，有時都唔係分分秒秒有嘢傾啦，可能會靜一靜，可能會抖一抖，好正常啫，而Sarah所謂嘅悶場其實係講緊兩三分鐘嘅事，我唔係連續半個鐘冇講嘢㗎！
我仲畀Sarah鬧過食飯睇電話msg，雖然我只係睇咗一眼，但之後就唔敢喇，直接連電話都唔擺喺枱面，但佢都仲有嘢唔滿意。
Sarah：「你可唔可以主動幫我影下相呀？上次食法國嘢你已經全程冇幫我影相，淨係影啲嘢食，我下下自己開聲叫你影就好怪㗎喇！」
冤枉呀，其實我有影㗎！但係影幾多張你先滿意？可唔可以畀個標準我呀？影得唔靚佢又會發脾氣，可能你會話唔靚咪再影囉！有難度呀，因為Sarah見到啲相唔啱心水，之後就會黑面同發晦氣，你要氹佢㗎！
呢份工我做咗幾耐？前前後後三年啦，其實唔係好長，因為中間經歷過禁晚市堂食，咁冇出嚟食飯人工又點計呢？Sarah會將$12,000 除12（一星期3餐，一個月12餐，佢係咁計），例如禁晚市堂食試過成個月冇出去食，咁我咪冇糧出囉，嗰個月出得6次，人工咪收$6,000囉！
最初我覺得呢份係筍工，免費食靚嘢仲有錢收喎！試想像下我去Tosca di Angelo食幾千蚊嘢仲學識呢個世界有Pre Dessert嘅時候係幾興奮，但係compare返，如果我出去搵份文職，肯定唔止$12,000一個月，有病仲可以正常sick leave，即使政府禁晚市禁午市禁堂食都唔會影響份糧（我指一般office工），星期五六日更加唔會冇晒私人時間，逐漸地我就開竅喇！
你或者會問：禁晚市堂食都一段時間之前啦，開竅都做咗職業飯腳咁長時間？
你啱呀！人就係有惰性，特別係我呢種冇鬥心嘅人，我認衰。
不過認真講句，如果將我辭職嘅原因用百份比去分配，手停口停只係佔20%，星期五六日冇得陪男友亦只係佔10%，我辭職有70%係因為Sarah嗰種疑心重、說話愛單單打打、一秒都唔容許有悶場，仲有影相太少同影得唔靚會發脾氣嘅性格。
我對Sarah係採取好嚟好去嘅態度，直接話自己想搵返份正職，因為唔想第日份CV太難睇（而家已經好難睇），同埋打算進修，星期五六要上堂好難抽時間出嚟食飯。
Sarah冇留我，不過就留低咗說話畀我聽：「肯定係你男朋友唔畀你做啦！我同你講咗男人都係賤，你唔聽都冇辦法，有人請食飯仲有錢收嘅工都唔做？你唔好後悔喎，我好易搵到人㗎咋！到時你想做我都唔會搵返你㗎喇！」
我最後笑住答佢：「唔係受男朋友影響，真係想進修，冇辦法啦，多謝你之前成日請我食好嘢。」
辭咗呢份職業飯腳工作都一段日子，但上星期六我仲收到Sarah嘅WhatsApp：「Cathy，今晚有冇時間食飯呀？」
你出飯錢再出糧我都唔想出去食啦，何況而家已經結束賓主關係，你搵其他朋友啦！（如果有的話）－－（完）
【職場信箱】最唔尊重求職者行為，CV掉垃圾桶、見工見到失蹤、食住煙interview乜都齊！
