記得你好耐之前出過一篇稿係講「黑腳」，話有個人去親邊度做都會執笠，CV上面全部公司都有名氣，但全部倒閉，當時我見到覺得好好笑，太巧合喇啩，點知上星期我遇到一個求職者仲癲，佢做過3份工啫，啲老闆唔係死咗就係殘廢。
約咗呢位求職者上嚟，等佢填完資料入房見，其他細節冇咩特別就唔交代喇，去到working experience嗰部分，因為我哋張application form有一欄係畀人填離職原因（佢自己份CV冇列明），我驚見連環3份工嘅離職原因分別係「老闆死了」、「意外後老闆要坐輪椅，最後結業」、「冇糧出」……
我：「唔好意思，見你上一份工個離職原因係……老闆死咗？」
「係呀，心臟病，聽講係做緊運動嘅時候突然暈低，救唔返。」
我承認係覺得有啲誇張：「哦……」
「新聞都有報㗎，不過可能佢唔係咩名人，冇人留意，我屋企人買東方，報紙有一格細細嘅位都有講。」
我：「明白，咁但係間公司再冇人打理然後執咗？」
「因為間公司好細㗎咋，得6個人，開發嗰啲mobile app嘅game，老闆死咗之後，佢有個淨係夾錢嘅partner就話唔在行，又唔算好好生意，跟住就執咗喇，其實都幾可惜，個老闆好後生，40歲咋。」
我：「真係好可惜，世事好多嘢預計唔到。」
「係啦，我再對上一份工個老闆已經夠慘，但都叫留住條命吖。」
即刻抽離，再望一望佢所講嘅對上一份工~意外後老闆要坐輪椅，最後結業。
我：「請問呢份又咩事？」
「呢間呢，個老闆就好好人嘅，但係有次交通意外，之後要坐輪椅，從此意志消沉，好在佢本身有錢，真係打跛腳都唔使憂。」
我：「咁最後都結業？」
「係呀，佢坐輪椅之後就唔返工，好似話性情大變，咁其實佢都唔係等呢間公司開飯，最後老闆有個屋企人過嚟收拾殘局，出咗啲遣散俾我哋成班同事就結束營業喇！呢份真係好唔捨得。」
我：「咁第一份工呢？你寫住冇糧出所以走。」
「嘩，嗰份慘烈喇！個老闆欠好多街數，聽講係出面炒咩窩輪嗰啲輸身家，跟住問人借，仲記得後來返工日日有人走上office追數，做做下嘢出面淋紅油又試過，用鎖鏈鎖住道門又試過，報晒警呀！」
我都唔知可以講咩好：「都幾驚……」
「驚呀！最後兩個月都冇糧出，又搵唔到人，老闆直頭著咗草。」
佢做過嘅公司，啲老闆唔係死，就係斷腳，再唔係就成身債走佬，我明白唔關佢事，咁但係有啲邪喎，如果有細心發現，仲會發覺一個老闆比一個老闆嘅下場更慘，當時我心入面講咗句：「大佬，我點敢請你呀…」
其實有少少想教呢位求職者修改下啲離職原因，例如結業就結業，唔使列明老闆死咗，因為咁樣去見工好蝕底，相信聽完佢嘅經歷之後有避忌嘅肯定唔止我一個，當我猶豫緊好唔好分享少少個人意見同埋睇法嘅時候，佢突然又自爆一件事。
「我仲做過份summer job，不過你張form冇位填，嗰個都好慘㗎，老闆娘連續兩次流產，日日返嚟喊，嗰陣我細吖嘛，又唔識得點樣安慰人，最後佢都冇心機做落去喇，冇咗個BB又係好陰公，仲要兩次喎！」
嘩，乜咁搞呀？唔怕老實講，我都啱啱知道自己有小朋友，仲未見肚，早兩日先睇完婦產科咋！雖然我唔係呢間公司嘅老闆，只係一個HR，不過聽完都不寒而慄，份工我可以唔做，但小朋友我唔可以唔要，請問我同佢淨係interview有冇事㗎？冇請應該冇事啩！
其實我唔想因為對方呢啲「邪住老闆」嘅經驗而唔請佢，真心佢都唔想，我仲有少少希望佢係堆砌出嚟，因為有人會覺得成日轉工係唔好，搵啲身不由己嘅原因支持自己離職，interview嘅時候就唔會畀HR扣分，但係聽落又唔似吖，首先，佢做過3份工啫，絕對唔算多，無需要搵藉口支持自己resign，正常講轉變新環境已經足夠。
其次係，佢每個「死老闆」嘅經歷都好逼真，有頭有尾，講到繪聲繪形，絕對唔似老作，不過咁樣先至驚，我到而家仲記得佢形容summer job個老闆娘兩度流產。
後來唔係因為「黑腳」而冇請佢，只係另一個嚟見工嘅求職者更突出，個department head一見就話要請，喺度希望嗰位「終極黑腳」搵工順利，唔好再有咁多奇怪同不幸嘅遭遇啦！
PS：搵返舊record，原來之前講職場黑腳嘅post已經係2017年6月8號，時間真係過得好快，你當時follow咗《辦公室日報》未？有冇睇過以下呢篇？
《職場黑腳寸草不生 做邊間執邊間》
https://hkofficedaily.com/?p=21670