我叫James，喺公司做咗3年，老闆每日都嗌我做Jason……「Jason你個客咩環境？」「Jason一齊食飯啦！」「Jason你幫我約陳生lunch meeting吖！」左一句Jason，右一句Jason，頂你個肺我叫James呀，做咗3年喇，減埋星期六日同大假，我哋都共事咗幾百日，你幾時先叫得啱呀？
老闆啲記性唔係講笑，嗰次我約咗陳生第二日lunch meeting，然後第二日朝早提佢，老闆咁樣問返我：「Lunch meeting？無啦啦做咩lunch meeting？邊個陳生？」結果我要講返啲前文後理，老闆先叫做勉強記得，嘩，好擔心你喎！
當年初初入嚟做，其實我會好在意，情況許可之下一定會糾正佢：「其實呢……我叫James呀老闆。」
老闆聽完之後就笑，然後解釋：「因為你上一手同事叫Jason，佢做咗5年，嗌慣咗，又係J字頭，又係嗰啲音，哈哈，你哋班後生仔，個個啲英文名都差唔多，唔好意思Jason，我會記得㗎喇！」
都話我叫James咯！
耐唔耐老闆都會叫我James，不過就曇花一現，叫完一兩次又會叫返我Jason……
其他同事最初聽到都會笑下，跟住就習以為常冇晒反應，因為個個都知老闆同《逃學威龍》裡面曾近榮飾演嘅化學老師一樣。
不過曾經有新人剛入職，朝早我先同人介紹自己叫James，然後個新人下晝聽到老闆嗌我Jason……
新人細細聲問返我：「你唔係叫James咩？定係我記錯？」
我：「你冇記錯，係老闆記錯啫！」
「點解你唔同佢講？」
我：「講過好多次喇，隔幾日佢都係會叫返我做Jason，是但啦！」
見客當然都試過出醜啦！老闆試過講錯人哋公司名，搞到個客黑晒面，唔通我好似電視劇咁撞你手肘咩！
佢又試過喺個客面前話：「得㗎喇，冇問題，一陣返到公司，我叫Jason send返正式嘅文件畀你吖！」
個客都聽到頭昂昂，邊L個Jason呀？之前又冇介紹。
我唯有自己同返個客講：「我陣間連埋公司印send個PDF畀你吖，我叫James呀！」
有朋友問我，覺唔覺得老闆係明玩我，其實我又唔覺，因為佢真係好多嘢都唔記得，頭先講過啦，佢兜口兜面嗌錯客人公司名都試過，點會搵自己生意嚟玩吖！
至於尊重問題，我唔係唔重視，只係由頭到尾都當呢份工係「中轉站」，貪佢永世唔使OT，方便我嗰幾年進修，你記得準時出糧就得喇！好在公司有人係負責出糧，如果真係由老闆處理，咁應該甩咗好多期糧。
兩個月前我冇做喇，頭先有舊同事WhatsApp我講：「公司請咗個人代你，而家老闆日日叫佢做James！」
我：「新同事叫咩名？」
「William！」
我：「嘩！點搞呀！之前就話James同Jason都係J字頭啫，而家William係W字頭喎！」
「新同事好介意，更正咗老闆好多次，但老闆都係不斷叫錯佢做James……」
估唔到我同梵高一樣，「生前」冇人識，「走咗之後」先至被記住，舊老闆，你份人真係念舊….
我而家去咗一間大公司做，同事多咗好多，坦白講做咗差唔多兩個月，我仲未可以完全記晒咁多個同事啲名，但係唔記得或者冇把握，咁咪簡單say個hello，打下招呼咪算囉！如果真係有公事上要接觸，再唔係就稱呼對方一聲靚仔靚女，你年年月月日日叫錯名，人哋個感覺肯定唔好受，唔清楚你為人仲會覺得係玩嘢，雖然老細係出糧畀員工啫，都唔好咁吖！
聽講我呢個舊老闆離過3次婚，我懷疑都係衰記錯老婆個名，以佢嘅行為同思想邏輯去推斷，應該係長期向現任老婆嗌前妻個名。
Btw，唔係個個客都唔介意㗎，老闆有次連續幾個email稱呼client做Dear Edmond，真係屌你咩！人哋個email都好清楚係Edward@xxxxx 啦！最終呢個客做唔成呀，我懷疑多多少少係同上款寫錯名有關，提咗佢都係咁，真係神仙都難救。（完）