「老細，係咪幫你訂去東京嘅機票？羽田個時間好啲，又近市區，成田就有啲遠，你仲要搵人揸車接怕會好塞車，幫你訂羽田啦好唔好？」作為私人助理，平時我會幫老細處理好多公事同私人事務，訂機票就係其中一環。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
老細：「無所謂啦……都係唔好，成田吖，我見到平啲，好似好近上野㗎嘛，落機時間都唔係差好遠啫！成田吖！」
坦白講，我預咗老細係咁，機票價錢雖然好浮動，但係嗰次成田同羽田只係相差300蚊左右，而且羽田落機之後仲有大半日時間，反而成田嗰班如果出埋關都夜晚，再加上我老細係住涉谷，我唔知成田近上野又關佢咩事，不過唔緊要，我就盡咗做私人助理嘅本份，老細最後決定買成田嗰班機都冇辦法，條路自己揀，仆街唔好喊！
果然不出我所料，當日老細去到東京，夜晚已經msg我抱怨，佢係錄語音：「屌！個成田機場真係……嘩！出市區塞到吖！而家都夜晚8點幾，商場又閂晒，得返啲居酒屋吉野家，想行下都唔得，第日真係唔好book成田，遠到呢！」
屌咩吖！你屌自己啦！同埋你住涉谷又唔係住上野，差三嚿水仲要晏啲飛，我都唔知你棄羽田揀成田做乜勁？同埋我好熟悉老細份人，如果最初我嗌佢揀成田，佢就一定揀羽田，條友好奇怪，勁鍾意包拗頸，日常工作已經係咁㗎喇！
記得有一次佢想book餐廳同個客食飯，我畀咗幾間佢揀，佢問我ABC邊間好，咁我就同佢講A同B都ok，又就腳，高級得嚟仲唔算貴，肯定唔會失禮個客，點知條撚樣真係走去揀C……
其實老細揀C餐廳係冇理據㗎，純粹你講咗A同B好，佢偏偏就要作對，而最後亦一如以往，佢會返嚟投訴C餐廳唔掂，鑊鑊都係咁。
買電腦問我應該揀Mac定Lenovo，我根據佢嘅用途同埋「能力」而叫佢揀Lenovo，最後佢買Mac；公司新年佢問我買一棵桃花定兩棵，我話一棵，佢買兩棵，例子多不勝數，而最後你都會發覺佢做錯決定。
不過老細呢種性格對我嚟講並唔陌生，因為我貼身嘅人－－－老公，都一樣係咁。
老公：「買水先定去廁所先呢？」
我：「你急就去廁所先囉！」
老公：「唔好喇，我都係買水先。」
－－－－－
老公：「搭巴士定搭的士好呢？」
我：「你遲大到喇，搭的士啦！又唔係成日搭！」
老公：「差唔多啫，我都係搭巴士。」
其實你唔知呢啲撚人點解要問你，最後又要揀相反嘅嘢。
因為老公對得耐啲，有時我會好忟憎同埋特登玩嘢，例如老公問我夜晚想出去食韓燒定壽司，我怕油煙味又怕熱氣，其實想就咁同佢講食壽司，但我太了解佢嘅性格，所以我而家會答：「食韓燒啦！」
跟住我老公就會話：「韓燒呀？都係食壽司啦！」
老公問我睇《掃毒3》定《奧本海默》，我答佢：「睇《奧本海默》啦！」
老公：「都係睇《掃毒3》啦！好耐冇睇港產片。」喂，唔該晒，我就係想睇《掃毒3》！
係老公點醒我要「逆操作」，所以慢慢地我都將呢一招用喺老細身上。
早兩日同老細食完lunch，老細問我：「想飲咖啡喎！買唔買埋畀其他同事呢？而家買定係一陣叫外賣好呢？」
其實咁簡單嘅事，我唔明佢要考慮啲乜，不過我知道如果而家買仲要買埋畀其他同事，我就一定會攞到仆街，所以我就同老細講：「而家買啦，唔使買埋畀同事咁麻煩啦！」
老細：「都係唔好，未想飲住，返到去叫外賣，你問埋啲同事飲唔飲吖！」正！就係想咁！
「逆操作」呢招如果你夠爐火純青，其實仲有其他用法㗎！例如你想佢仆街嘅時候……
老細：「你有冇玩開美股呀？Meta而家190蚊放唔放好呢？」
其實嗰陣Meta講緊裁員，識股票嘅人都知道股價短期內一定升，所以我答佢：「Meta裁員喎，可能會升一段，大行好似睇240蚊。」
老細：「都係唔好喇，Meta都係信唔過，而家邊有人玩Facebook㗎！我180蚊買，賺10蚊算啦，而家放晒佢先。」
哦，好呀！而家係2023年7月30號，Meta已經325蚊喇，老細放完之後係咁升，325蚊－190蚊，冇咩嘅，賺少咗百幾蚊啫！
有時對住我老公同埋我老細呢啲專唱反調，問完你意見就揀相反答案嘅人，絕對唔使勞氣，只要學識「逆操作」呢一招就得㗎喇！至於點樣運用就自行決定啦！(完）
公司旅行請上船睇足立の花火，同事竟然甩底？花火船形屋幾錢位？
