老細大半年前派咗我駐上海間公司，嗰度仲有一個女同事係香港人，佢比我更早入嚟做。由於成個office得我同佢會用廣東話溝通，同聲同氣所以好快熟絡，其實我好早已經對佢有好感，不過真真正正喺辦公時間以外獨處就要等到一次團體晚飯之後。
當時上海公司有個飯局，食完就四散，而呢位女同事就同我講：「而家好早咋喎！返屋企好悶，有冇地方去呀？落唔落bar飲嘢？」咁梗係好啦！講到尾我都係單身寡仔，仲要對住有好感嘅女同事，結果佢就帶咗我去一間酒吧，大家一齊飲酒吹水直至凌晨。
再之後嘅老土細節就唔講喇，大家飲到醉醉地，佢問可唔可以去我度，最終我哋就發生咗第一次關係。可能係我太老土，以為咁樣已經代表拍拖，但女同事好似即刻抽離咗，平時喺公司都係「工作式」咁樣對我，真係除咗公事以外就唔會有其他話題同接觸。
咁我哋係幾時再發生第二次、第三次，同埋更多次嘅關係呢？就係每逢星期五，因為佢次次都係星期五叫我去飲嘢，飲完就會直接去搞嘢，場地有時係佢屋企，有時係我屋企，有時係酒店，第二朝起身大家就會「分手」，因為女同事話自己星期六慣咗瞓足大半日。
我哋之間除咗上床，係唔會行街睇戲食飯，只會有時WhatsApp傾下無聊嘢，可以傾啲好鳩嘅嘢，但唔會傾deep嘅嘢。
其實我開頭都係同「天下間男人」一樣，諗住有食唔食，罪大惡極，不過唔知係人在異鄉特別寂寞，抑或我真係好鍾意佢，漸漸地我就想得到更多，唔止係肉體，我仲想同佢開展一段認真嘅情侶關係，雖然女同事做咗一啲令我好失望嘅事……
由於佢每逢星期五都會帶我落不同嘅bar，有啲係類似清吧齋飲嘢，有啲就有舞池，會成堆唔識嘅人跳舞，好幾次我都睇住佢喺酒吧跟其他陌生男人走，其中一次佢走之前同我講：「走先，下星期公司見。」跟住呢個模式就好似變咗「各自搵食」嘅共識。
我目睹過好多次佢喺酒吧同新認識幾分鐘嘅人kiss，又目睹過佢同唔同國籍嘅人拖住手離開搵下場，有啲酒吧會有外國人，甚至印度人同韓國人，佢好似只要合眼緣就可以跟人走，有時佢應該係睇唔啱，最終就會搵返我，總之你會覺得佢每逢星期五晚都要盡興發洩咁，我唔清楚佢係好享受畀人溝，定係有好大嘅需要。
每次我遭遇呢種情況都會覺得好挫敗同埋好難受，我認自己已經沉咗船，亦好肯定我係呢位女同事嘅其中一個SP，僅此而已。因為我人生從來未試過有SP，香港嗰陣冇，嚟到上海冇friend就更加冇，唔肯定對住SP都呷醋係咪正常，好想有人可以話到畀我聽呢種係咩心理狀態。
女同事近一個月已經冇向我「點燈」，因為近幾次落酒吧佢都搵到食，而我其實已經有一段表白嘅說話準備好同佢講，我想佢明白大家一開始發生關係雖然唔認真，但我好想彼此之間可以成為正式嘅情侶，無論心靈同肉體都唔應該再四處飄泊，有穩定伴侶一樣可以得到滿足，仲可以分享生活上所有事。
以上嘅說話我已經喺腦裡面練習咗好多次，只係仲未有機會講，次次都係佢決定我去留，呢個星期五我想主動叫佢唔好走，飲完嘢上我度。
唯一令我猶豫係雙方嘅同事關係，我今次駐上海雖然名義上唔係長駐，不過都仲要留一段時間，起碼過完農曆新年假期仍然要返嚟上海。
萬一女同事拒絕咗我，尷尬都係事小，我好驚佢以後唔會再同我飲嘢，唔會再同我發生關係，因為曾經諗過女同事係咪feel到我認真，所以先至喺我面前跟其他陌生男人離開酒吧，可能佢係故意做畀我睇，所以我咁認真去示愛，隨時會連每星期一次單獨相處嘅機會都冇埋。
明白想從SP轉為固定拖友係好傻，但我個情況係日日返工都對住佢，好難抑制自己胡思亂想，再old school啲咁講，有時喺office見住佢，我更加會諗起呢兩句歌詞：「我再也不願見你在深夜裡買醉，不願別的男人見識你的嫵媚。」
點都好，呢個星期五我會為自己嘅幸福放膽一次。