早幾日咪有單新聞，講馬來西亞有老闆用高薪請人，然後以公司旅行名義請30幾個員工去泰國，再賣晒佢哋去緬甸詐騙園區嘅，呢件事勾起咗我嘅回憶，因為喺疫情之前我曾經做過一份工，又係有差唔多嘅遭遇，有時諗起可以安全返到香港都算好運，真係抹一把汗。
當時我返嗰間公司係做泰國樓盤，我負責搞啲香港賣樓講座，其實返咗個幾星期㗎啫，所以啲工作一直係紙上談兵，並未真正租任何場地搞講座嘅，嗰陣梗係覺得正常啦，始終event呢啲嘢要前期籌備，而家睇返咪覺得好鬼囉！咁個老細有一日就叫我同另一個同事出差去泰國曼谷。
其實同我一齊去嗰位都係新同事，我哋係同時入職，當年我同佢仲覺得好興奮，嘩！返得兩個星期唔夠，試用期都未過，咁就有得去曼谷旅行，公司包機票酒店喎！點計都賺啦！個trip得三日兩夜，第一日晚機到，最後一日中午機走，計埋落機上機，講真逗留嘅時間唔多，住嘅係普通酒店，好過劏房，少少簡陋。
所謂嘅三日行程基本上冇工作，因為老細安排咗個泰國人招呼我同另一位同事，嗰個人嘅身份係泰國樓盤公司嘅接頭人，佢除咗第二日同我哋食咗個lunch之外，根本就冇講公事，然後夜晚叫我哋去bar飲嘢，同事想去，我堅持唔去，當時條泰國佬算係威迫利誘㗎，係咁拉我哋落bar！
結果點打發佢走呢？就係最老土嗰招－－－詐肚痛，我用英文同條泰國佬講自己水土不服，話肚痛到就嚟瀨屎，又話要call白車入醫院又盛，可能係聽到我要call白車啩，結果條泰國佬放棄，而我同事仲唔醒水，返酒店途中係咁話我痛得不合時宜，好似唔領人哋情。
講真，當晚我係冇諗咁多嘢嘅，亦冇諗咩賣豬仔呢啲黑暗嘢（當時冇而家咁多KK園新聞），始終係老細派我哋嚟，香港公司又唔係不務正業，假假地做投資買樓喎！但我咁抗拒同條泰國佬去夜場，最大原因係到達曼谷第二日佢根本冇傾過公事，咁我哋第三日中午已經走喇，呢個trip究竟係咩事㗎？
總之我就有種怪怪嘅感覺，唔知點樣形容，我有懷疑過係咪自己多心嘅，始終第三日中午都走啦，完全冇時間剩。
一般去機場要提前兩個鐘，但嗰朝我提早三個鐘，個同事本身唔肯跟我出發，佢話太早喎，我又解釋唔到啲咩，咪求其話想去機場掃啲手信，同埋想喺機場食早餐囉，仲諗住個同事唔行，我都一樣自己去機場先，不過佢最後都屈服同我一齊出發。
人到咗曼谷機場，條泰國佬打電話嚟，佢話要車我哋，嗱！我最擔心就係咁，所以就答佢：「我哋已經去緊機場喇！」
跟住我感受到條泰國佬「出招」喇，佢首先埋怨我哋太早去機場，然後就猛咁叫我哋等等，話有文件要我哋拎返香港，然後香港老細又打長途過嚟，叫我哋唔好入閘住，因為有份文件好重要喎！
香港老細最奇怪係有一句：「你哋未到機場㗎嘛？行李寄艙未呀？啲文件好重要㗎！你同我擺入行李拎返嚟！」
你唔覺得怪咩？咁重要仲寄艙？重要就梗係跟身啦！我大約估到係咩事，但當然唔肯定，結果我同同事去到機場先，我打算違抗指令排隊寄存行李，我同事仲傻更更叫我唔好，話要等埋泰國佬份文件。
我記得自己當時好驚，不過太多人排隊check in，快唔過泰國佬，條友嚟到畀兩個公文袋我同同事，叫我哋擺埋入行李寄艙，屌你咩！橫睇掂睇都唔似文件啦！唔知裡面係咩嚟，但一定唔係A4 B4呢種文件，又厚又實，好似裝咗嚿磚入去咁，我堅持要佢打開畀我哋睇，泰國佬唔肯。
呢個時候，我feel到個傻更更嘅同事開始擔憂（如果佢一個嚟泰國應該死得），因為香港老細唔再打畀我，改咗打畀我同事，條泰國佬又迫我哋將個公文袋擺入行李，仲叫我哋唔好排隊住，行埋一邊搞掂呢單嘢先。
睬你都傻啦！呢度有航空公司職員，有地勤，有其他旅客，有咩事我仲可以大嗌，甚至有人證，行埋一邊你溶咗我都得啦，泰國你地頭喎！
或者係人多怕搞大件事，泰國佬都冇我哋符，佢行埋一邊打電話，唔知佢同邊個傾，但我同同事個電話亦輪流響，因為香港老細打嚟，話之你，有咩事都係行李寄艙同行入禁區先，臨過關我仲特登摷下自己個身有冇咩「奇怪嘢」，點知你有冇偷偷放嘢喺我個身㗎！
安全入閘之後，香港老細係咁打嚟炒蝦拆蟹鬧我同埋個同事，佢仲叫我哋唔使再返工，嘩！好呀！我都好驚要返公司面對你，其實你唔講我都會辭職，好在佢又冇追我哋機票酒店錢，可能都驚我哋報警或者搞事啩！不過我仲驚啦！入職時填晒個人資料，佢要尋仇我真係冇得避，好在冇發生。
一路搭飛機一路同個同事傾，大家都估嗰包嘢係毒品，唔係毒都一定係其他違禁品㗎喇，總之一定唔會係文件，但我哋冇證據，始終冇睇到裡面係乜，所以到而家都係得個估字，不過從老細同埋泰國佬嘅反應嚟睇，點都唔係咩好嘢。
畀人炒，返咗個幾星期有冇人工？梗係冇啦！坦白講我都唔敢追，佢唔搞我就算喇，如果真係毒，呢個老細都唔會係善男信女，當我蝕畀你！呢單嘢後來愈諗就愈驚，雖然我冇穿冇爛，否則今時今日都投唔到稿，但如果當時抵受唔住威迫或者真係袋埋過關，可能今日我已經喺泰國坐緊監或者死咗。
順帶一提，返到香港我有keep住留意呢間公司，但後來發覺佢哋唔知係搬咗、執咗，還是改咗名去第二個地方營運，已經搵唔返喇，如果真係做犯法嘢，相信都唔會一直用同一個公司名租同一個office，所以大家搵工真係要小心啲，硬係覺得呢種公司同埋手法仍然存在，未必得馬來西亞先有，或者香港有人已經瀨過嘢，只係連揭發嘅機會都冇啫，總之恐怖啦！
我覺得個泰國佬係最大敗筆，老細話佢係曼谷樓盤公司嘅接頭人，但個look完全唔似囉！同埋你一係做戲做全套，去到泰國又唔講公事，如果佢交到戲，我可能已經落疊幫佢哋「帶貨」喇！